រាជធានីភ្នំពេញ ៖ ថ្មីៗនេះ នាយកដ្ឋានប្រឆាំងបទល្មើសបច្ចេកវិទ្យា បានសង្កេតឃើញថា មានជនអនាមិកប្រើប្រាស់ទំព័រហ្វេសប៊ុកមួយបានបង្ហោះវីដេអូក្លែងក្លាយ ដែលបង្កើតដោយបច្ចេកវិទ្យាបញ្ញាសប្បនិមិត្ត (AI) ដោយក្លែងបន្លំជាសម្ដេចមហាបវរធិបតី ហ៊ុន…
រាជធានីភ្នំពេញ ៖ ថ្មីៗនេះ នាយកដ្ឋានប្រឆាំងបទល្មើសបច្ចេកវិទ្យា បានសង្កេតឃើញថា មានជនអនាមិកប្រើប្រាស់ទំព័រហ្វេសប៊ុកមួយបានបង្ហោះវីដេអូក្លែងក្លាយ ដែលបង្កើតដោយបច្ចេកវិទ្យាបញ្ញាសប្បនិមិត្ត (AI) ដោយក្លែងបន្លំជាសម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រី នៃព្រះរាជាណាចក្រកម្ពុជា ដែលក្នុងខ្លឹមសារវីដេអូនោះនិយាយអូសទាញអ្នកចូលមើល
ឱ្យចូលរួមវិនិយោគ ទៅលើវេបសាយ ដែលមានភ្ជាប់មកជាមួយវីដេអូ ។
យោងតាមបទបញ្ជារបស់ឯកឧត្ដមនាយឧត្ដមសេនីយ៍ ស ថេត អគ្គស្នងការនគរបាលជាតិ និងតាមការចង្អុលណែនាំពី ឯកឧត្ដម ឧត្ដមសេនីយ៍ឯក អគ្គស្នងការរងនគរបាលជាតិ នាយកដ្ឋានប្រឆាំងបទល្មើសបច្ចេកវិទ្យា បានចាត់វិធានការ ដើម្បីបិទទំព័រហ្វេសប៊ុក និងគេហទំព័រខាងលើនេះហើយ ។ ជាមួយគ្នានេះ នាយកដ្ឋានបានសង្កេតឃើញថា ជនអនាមិកនៅបន្តយកវីដេអូនេះ បង្ហោះផ្សព្វផ្សាយតាមប្រព័ន្ធបណ្តាញទំនាក់ទំនងសង្គមផ្សេងៗ នាយកដ្ឋាន ក៏កំពុងមានចំណាត់ការស្រាវជ្រាវទៅលើការបង្ហោះផ្សព្វផ្សាយនេះផងដែរ ។
នាយកដ្ឋានប្រឆាំងបទល្មើសបច្ចេកវិទ្យា សូមសារធារណជន មេត្តាប្រុងប្រយ័ត្ន និងពិនិត្យបានហ្មត់ចត់មុននឹងចុចតំណភ្ជាប់ណាមួយ ដែលគ្មានប្រភពច្បាស់លាស់ ចៀសវាងការចាញ់បោកគេ ដោយប្រការណាមួយ ៕
ចែករំលែកព័តមាននេះ