ខេត្តស្វាយរៀង ៖ ចាប់ពីថ្ងៃទី១៥ ដល់១៧ កក្កដា នៅមន្ទីរកិច្ចការនារីខេត្ត អង្គការស្តារកម្ពុជា បានរៀបចំវគ្គបណ្តុះបណ្តាលមួយស្តីពីច្បាប់ប្រឆាំងអំពើពុករលួយដល់មន្ត្រីអង្គការសង្គមស៊ីវិលជាសមាជិកបណ្តាញ NACN ចំនួន២៧រូប ដែលកំពុងធ្វើសកម្មភាពអភិវឌ្ឍន៍នៅក្នុងខេត្តស្វាយរៀង ។
លោកវ៉ាន់ ប៊ុនធឿន នាយកអង្គការ SADA និងជាប្រធានបណ្តាញសម្របសម្រួលតស៊ូមតិអង្គការមិនមែនរដ្ឋាភិបាលខេត្តស្វាយរៀង បានមានប្រសាសន៍បើកវគ្គនោះថា វគ្គបណ្តុះបណ្តាលនេះគឺគាំទ្រដោយអង្គការស្តារកម្ពុជា ក្នុងគោលបំណងផ្តល់ចំណេះដឹងផ្នែកច្បាប់ និងយន្តការនានាដល់អង្គការសមាគមដែលជាសមាជិកបណ្តាញបានយល់ដឹង ដើម្បីធ្វើការរួមគ្នាទប់ស្កាត់ប្រឆាំងអំពើពុករលួយដែលកើតមានឡើងនៅក្នុងសង្គម ។ ជាមួយនេះ ធ្វើការរួមគ្នារវាងអង្គការសង្គមស៊ីវិលជាមួយស្ថាប័នរដ្ឋនៅថ្នាក់ក្រោមជាតិ អនុវត្តគោលនយោបាយអភិវឌ្ឍន៍ជាតិឱ្យមានអភិបាលកិច្ចល្អ ប្រកបដោយតម្លាភាព គណនេយ្យភាព និងសមភាពយេនឌ័រក្នុងសង្គម។
លោកហេង ហាក់ មន្ត្រីកម្មវិធីបណ្តុះបណ្តាលអង្គការស្តារកម្ពុជា មានប្រសាសន៍ថា អង្គការស្តារកម្ពុជាគាំទ្របណ្តាញអង្គការសង្គមស៊ីវិលតាមបណ្តាខេត្តដែលធ្វើការផ្ទាល់ជាមួយសហគមន៍ ឱ្យមានចំណេះដឹងអំពីច្បាប់ប្រឆាំងអំពើពុករលួយ និងច្បាប់អាពាហ៍ពិពាហ៍និងគ្រួសារ ក្រមព្រហ្មទណ្ឌ ក្រមនីតិវិធីព្រហ្មទណ្ឌ និងយន្តការនានា ដើម្បីទៅផ្សព្វផ្សាយបន្តនៅសហគមន៍ ពង្រឹងអភិបាលកិច្ចល្អនៅថ្នាក់មូលដ្ឋាន ដើម្បីឱ្យប្រជាពលរដ្ឋទទួលបាននូវសេវា សាធារណៈប្រកបដោយតម្លាភាព គណនេយ្យភាព និងយុត្តិធម៌សង្គម ។
លោកសាស្ត្រាចារ្យ អុឹម ឧត្តម អគ្គលេខាធិការក្រុមប្រឹក្សាអ្នកច្បាប់ទីស្តីការគណៈរដ្ឋមន្ត្រី មានប្រសាសន៍ថា ស្ថាប័នប្រឆាំងអំពើពុករលួយ មានក្រុមប្រឹក្សាជាតិប្រឆាំងអំពើពុករលួយ និងអង្គភាពប្រឆាំងអំពើពុករលួយ ហើយការប្រឆាំងអំពើពុករលួយជាការងារអាទិភាពរបស់រាជរដ្ឋាភិបាលនៅក្នុងអាណត្តិទី៤នេះក៏ដូចជាអាណត្តិបន្តបន្ទាប់ទៀត ដោយប្រកាន់យកវិធានការប្រទាក់ក្រឡាគ្នាចំនួន៣គឺការអប់រំ បង្ការទប់ស្កាត់ ការអនុវត្តច្បាប់បង្ក្រាបបទល្មើសពុករលួយ ការចូលរួមគាំទ្រពីមហាជន និងកិច្ចសហប្រតិបត្តិការអន្តរជាតិ ។ លោកអុឹង ឧត្តម បន្តទៀតថា ច្បាប់ស្តីពីការប្រឆាំងអំពើពុករលួយត្រូវបានរដ្ឋសភាអនុម័តនៅថ្ងៃទី១១ មីនា ២០១០ និងប្រកាសឱ្យប្រើដោយព្រះរាជក្រមចុះថ្ងៃទី១៧ ខែមេសា ២០១០ ។ ក្រោយពេលច្បាប់នេះត្រូវបានប្រកាសឱ្យប្រើ រាជរដ្ឋាភិបាលកម្ពុជាមានភារកិច្ចរៀបចំដំណើរការស្ថាប័ននេះឱ្យស្របតាមច្បាប់ស្តីពីការប្រឆាំងអំពើពុករលួយ។
ភារកិច្ចរបស់អង្គភាពប្រឆាំងអំពើពុករលួយគឺអនុវត្តច្បាប់ បទបញ្ជា និងបទប្បញ្ញត្តិពាក់ព័ន្ធនឹងបទល្មើសពុករលួយជាធរមាន និងដឹកនាំការងារទប់ស្កាត់និងបង្ក្រាបអំពើពុករលួយ ។ តាមដានស៊ើបអង្កេតត្រួតពិនិត្យ និងធ្វើការស្រាវជ្រាវសិក្សា ព្រមទាំងលើកវិធានការនានាពាក់ព័ន្ធនឹងបទល្មើសពុករលួយនៅតាមក្រសួងស្ថាប័ន អង្គភាពសាធារណៈនិងឯកជនទាំងអស់ស្របតាមនីតិវិធីជាធរមាន ។ ទទួលនិងពិនិត្យរាល់ពាក្យបណ្តឹងដែលពាក់ព័ន្ធអំពើពុករលួយ ព្រមទាំងចាត់ការតាមនីតិវិធីស្វែងរកនិងពិនិត្យរៀបចំឯកសារ និងព័ត៌មានពាក់ព័ន្ធអំពើពុករលួយ ។រក្សាសម្ងាត់ជាដាច់ខាត ចំពោះប្រភពព័ត៌មាន ចាត់វិធានការចាំបាច់ដើម្បីរក្សាសន្តិសុខដល់បុគ្គលិកព័ត៌មាន។ ដឹកនាំការងារឃោសនាអប់រំ មហាជន អំពីផលវិបាកនៃអំពើពុករលួយ និងលើកទឹកចិត្តឱ្យមហាជនចូលរួមទប់ស្កាត់ និងកម្ចាត់អំពើពុករលួយ ធ្វើសហប្រតិបត្តិការជាមួយអង្គការជាតិ អង្គការតំបន់ អង្គការអន្តរជាតិនានាដើម្បីប្រយុទ្ធប្រឆាំងអំពើពុករលួយឆ្លង ដែន ។
លោកសាស្ត្រាចារ្យអ៊ឹង ឧត្តម បន្តទៀតថា អង្គភាពប្រឆាំងអំពើពុករលួយអាចមានការិយាល័យរបស់ខ្លួននៅគ្រប់ខេត្ត រាជធានីនៃព្រះរាជាណាចក្រកម្ពុជាដើម្បីធ្វើជាបណ្តាញការងាររបស់ខ្លួន ។ អំពើពុករលួយគឺជាឥរិយាបថមិនស្របច្បាប់ អសីលធម៌ មិនស្មោះត្រង់ ដែលប្រព្រឹត្តឡើង ជាពិសេសបុគ្គលទាំងឡាយដែលមានអំណាច ។ ឧទាហរណ៍ អំពើសូកប៉ាន់បុគ្គលណាម្នាក់នូវអ្វីមួយដើម្បីឱ្យគេបំពេញកិច្ចអ្វីមួយតបវិញ ។ មាត្រា៦០៥ បទសូកប៉ាន់ ជាប់ទោសពី៥ឆ្នាំទៅ១០ឆ្នាំ អំពើទទួលផលបន្តពីបទល្មើសពុករលួយត្រូវផ្តន្ទាទោសដាក់ពន្ធនាគារពី២ឆ្នាំទៅ៥ឆ្នាំ និងពិន័យជាប្រាក់ពី៤លានរៀលទៅ១០លានរៀល។ បទល្មើសពុករលួយដែលមានបញ្ញត្តិនៅក្នុងក្រមព្រហ្មទណ្ឌ មាត្រា៥៩៤ បទស៊ីសំណូកត្រូវជាប់ទោសដាក់ពន្ធនាគារពី៧ឆ្នាំទៅ១៥ឆ្នាំ និងពិន័យជាប្រាក់ពី៤លានរៀលដល់១០លានរៀល ។
មាត្រា៣៨ នៃច្បាប់ប្រឆាំងអំពើពុករលួយ បទមិនប្រកាសទ្រព្យសម្បត្តិនិងបំណុល ជនណាដែលមិនបានប្រកាសទ្រព្យសម្បត្តិ និងបំណុល ឬបានប្រកាសមិនត្រឹមត្រូវនូវទ្រព្យរបស់ខ្លួនទៅតាមបទប្បញ្ញត្តិដែលមានចែងក្នុងមាត្រា១៧ «សមាសភាពបុគ្គលដែលត្រូវប្រកាសទ្រព្យសម្បត្តិ និងបំណុល» ច្បាប់នេះ ត្រូវផ្តន្ទាទោសដាក់ពន្ធនាគារពីមួយខែទៅ១ឆ្នាំ និងពិន័យជាប្រាក់ពីមួយសែនរៀលទៅ២លានរៀល។ ដោយឡែកចំពោះថ្នាក់ដឹកនាំអង្គការសង្គមស៊ីវិល អង្គភាពប្រឆាំងអំពើពុករលួយមានភារកិច្ចរំលឹកជាលាយលក្ខណ៍អក្សរដល់ថ្នាក់ដឹកនាំនៃអង្គការសង្គមស៊ីវិល មុននឹងអនុវត្តមាត្រានេះ។ លោកសាស្ត្រាចារ្យបានលើកយកគ្រប់មាត្រានៃច្បាប់ប្រឆាំងអំពើពុករលួយមកបកស្រាយពន្យល់យ៉ាងពិស្តារ ធ្វើឱ្យសិក្ខាកាមបានយល់កាន់តែច្បាស់អាចយកទៅបម្រើការងារក្នុងអង្គការ បាន ៕
ចែករំលែកព័តមាននេះ