​
រាជធានីភ្នំពេញ៖ យោងតាមការផ្សាយរបស់មន្ទីរពេទ្យកាល់ម៉ែត បានឱ្យដឹងថា មហារីកសាច់ថ្លើមភាគច្រើន (៨០-៩០%) គឺកើតឡើងបន្ទាប់ពីថ្លើមមានបញ្ហា រលាក​រ៉ាំរ៉ៃ (Chronic Hepatitis) ដែលបណ្តាលមកពីមេរោគរលាកថ្លើមប្រភេទ B, C ឬការពិសាគ្រឿងស្រវឹងរយៈពេលយូរ រហូតវិវត្តទៅជា ថ្លើម​ក្រិន។

ទោះជាយ៉ាងណា ក្រៅពីមូលហេតុចម្បងទាំងនេះ ក៏មានកត្តា​ផ្សេង​ទៀត​ដែល​បង្កើន​ហានិភ័យ​ខ្ពស់​ផងដែរ៖

១. គ្រោះថ្នាក់​ពី​ចំណី​អាហារ​មិន​ឆ្អិន​ល្អ

ការទទួលទានខ្ចៅ ខ្យង ឬត្រី​ដែល​ចម្អិន​មិន​ឆ្អិន​ល្អ អាច​ឆ្លង​សត្វ​ល្អិត​ប៉ារ៉ាស៊ីត​ម្យ៉ាង (Liver Fluke) ដែល​រស់នៅ​តាម​ដង​ទន្លេ​មេគង្គ​លើ (ម្តុំ​ខេត្តក្រចេះ និង​ស្ទឹងត្រែង)។

• របៀប​ឆ្លង៖ សត្វល្អិតនេះមានពង ឬកូនរស់នៅក្នុងខ្ចៅ ខ្យង ឬត្រីទឹកសាប។ នៅពេលមនុស្សបរិភោគមិនឆ្អិនល្អ សត្វល្អិតនេះនឹងចូលទៅបង្កបញ្ហានៅក្នុងថ្លើម និងបង្កើនហានិភ័យមហារីក។

២. ការ​បរិភោគ​អាហារ​មាន​ជាតិពុល​ផ្សិត​ខ្ពស់

• អាហារ​ផ្អាប់​យូរ និង​ដុះ​ផ្សិត​: ការបរិភោគអាហារផ្អាប់យូរដែលមានដុះផ្សិតពុលម្យ៉ាងឈ្មោះ Beta Aflatoxin ជាប្រចាំ អាចបណ្តាលឲ្យកើតមហារីកថ្លើមមាន អត្រា​ខ្ពស់​ជាង មេរោគរលាកថ្លើម B និង C រួមបញ្ចូលគ្នាទៅទៀត។

ចំណាំ៖ ដុំមហារីកថ្លើមក៏អាចកើតមានលើអ្នកជំងឺដែល មិន​ទាន់​មាន​បញ្ហា​ក្រិនថ្លើម ផងដែរ (១០% ទៅ ២០%)។ ករណីនេះកើតមានជាពិសេសលើអ្នកជំងឺដែលមានផ្ទុកមេរោគ រលាក​ថ្លើម​ប្រភេទ B រ៉ាំរ៉ៃ៕

​