ទីក្រុងគូឡាឡាំពួរ៖ នៅឯកិច្ចប្រជុំរដ្ឋមន្ត្រីការពារជាតិអាស៊ានថ្ងៃនេះ ម៉ាឡេស៊ីបានជំរុញឱ្យប្រទេសមហាអំណាចពិភពលោកបន្តគោរពច្បាប់ និងខិតខំលើកកម្ពស់សន្តិភាពនៅក្នុងតំបន់។ កិច្ចប្រជុំនេះជាវេទិកាជួបជុំរដ្ឋជាសមាជិកអាស៊ានទាំង១១ បូករួមទាំងក្រុមប្រទេសជាដៃគូសន្ទនាចំនួន៨ប្រទេសទៀត។ ក្នុងនោះមានអាមេរិក ចិន ជប៉ុន កូរ៉េខាងត្បូង…
ទីក្រុងគូឡាឡាំពួរ៖ នៅឯកិច្ចប្រជុំរដ្ឋមន្ត្រីការពារជាតិអាស៊ានថ្ងៃនេះ ម៉ាឡេស៊ីបានជំរុញឱ្យប្រទេសមហាអំណាចពិភពលោកបន្តគោរពច្បាប់ និងខិតខំលើកកម្ពស់សន្តិភាពនៅក្នុងតំបន់។ កិច្ចប្រជុំនេះជាវេទិកាជួបជុំរដ្ឋជាសមាជិកអាស៊ានទាំង១១ បូករួមទាំងក្រុមប្រទេសជាដៃគូសន្ទនាចំនួន៨ប្រទេសទៀត។ ក្នុងនោះមានអាមេរិក ចិន ជប៉ុន កូរ៉េខាងត្បូង ឥណ្ឌា អូស្ត្រាលី នូវែលហ្សេឡង់ និងរុស្ស៊ី។
ប្រមុខការពារជាតិអាមេរិក និងចិនក៏មានវត្តមាននៅក្នុងកិច្ចប្រជុំនោះផងដែរ។ នៅពេលថ្លែងបើកកិច្ចប្រជុំ រដ្ឋមន្ត្រីការពារជាតិម៉ាឡេស៊ី លោកមហាមេត ខាលីត ន័រឌីន (Mohamed Khaled Nordin) បានអំពាវនាវឱ្យពិភពលោកខិតខំធ្វើឱ្យមានសន្តិភាព និងមានស្មារតីទទួលខុសត្រូវចំពោះបញ្ហាមនុស្សធម៌នៅពេលដែលពិភពលោកកំពុងមានជម្លោះកាន់តែខ្លាំងឡើងៗ។
លោកថ្លែងបន្តទៀតថាម៉ាឡេស៊ីសូមជំរុញឱ្យបណ្ដាប្រទេសទាំងអស់ ជាពិសេសក្រុមប្រទេសមហាអំណាចធំៗប្រើប្រាស់ឥទ្ធិពលរបស់ខ្លួនស្របទៅតាមការអនុញ្ញាតពីច្បាប់អន្តរជាតិ។ លោកក៏និយាយរំលឹកអំពីផែនការសន្តិភាពរបស់អាមេរិកដើម្បីបិទបញ្ចប់ជម្លោះនៅតំបន់ហ្កាហ្សាផងដែរ។ លោកមហាមេតបានវាយតម្លៃខ្ពស់ចំពោះការគំាទ្រពីក្រុមប្រទេសជាដៃគូ ជាពិសេសអាមេរិក អាស៊ាន និងចិនដែលជំរុញឱ្យមានដំណោះស្រាយជម្លោះនៅក្នុងតំបន់ដោយសន្តិវិធី។
គេរំពឹងថាកិច្ចប្រជុំរដ្ឋមន្ត្រីការបរទេសអាស៊ាន និងក្រុមប្រទេសជាដៃគូនៅម៉ាឡេស៊ីលើកនេះក៏នឹងផ្ដោតសំខាន់ទៅលើសន្តិសុខលំហសមុទ្រ, ការផ្ដល់ជំនួយមនុស្សធម៌, ការប្រយុទ្ធប្រឆាំងនឹងអំពើភេរវកម្ម និងការបង្កើនកិច្ចសហប្រតិបត្តិការនៅក្នុងវិស័យការពារជាតិនៅឥណ្ឌូ-ប៉ាស៊ីហ្វិចផងដែរ។ នេះបើយោងតាមការផ្សាយរបស់រ៉យទ័រ និងប្រភពដទៃទៀត៕
ចែករំលែកព័តមាននេះ