រាជធានីភ្នំពេញ ៖ វិស័យព័ត៌មានវិទ្យានៅកម្ពុជាបានរីកចម្រើនទៅរកការអនុវត្តតាមស្តង់ដាអាជីវកម្មអន្តរជាតិ។ នេះសែ្តងឱ្យឃើញតាមរយៈការរៀបចំសិក្ខាសាលាមួយស្តីអំពីការបន្តអាជីវកម្ម និងការស្តារឡើងវិញនៅពេលក្រុមហ៊ុនជួបគ្រោះមហន្តរាយដែលប្រព្រឹត្តទៅកាលពីថ្ងៃទី៣ ខែមីនា។ នៅក្នុងសិក្ខាសាលានេះ លោកអ្នកនឹងបានយល់ពីចំណុចសំខាន់ៗដែលទាក់ទងទៅនឹងការបន្តអាជីវកម្មនៅពេលក្រុមហ៊ុនជួបគ្រោះមហន្តរាយ។ សិក្ខាកាមអញ្ជើញមកពីគ្រប់ក្រុមហ៊ុនអាជីវកម្មទាំងអស់នៅកម្ពុជា។ កម្មវិធីនេះសហការរៀបចំដោយក្រុមហ៊ុន Microsoft, EZECOM, Panduit និង Ciswork ។
នៅក្នុងសិក្ខាសាលានេះអ្នកឯកទេសជាច្រើនបង្ហាញឱ្យឃើញពីជំនាញផ្ទាល់របស់ពួកគេក្នុងការកាត់បន្ថយបញ្ហានៅពេលដែលគ្រោះមហន្តរាយកើតឡើង។ ផ្នែកមួយក្នុងចំណោមផ្នែកផ្សេងទៀតនៅក្នុងសិក្ខាសាលានេះអ្នកចូលរួមទាំងអស់នឹងទទួលបានចំណេះដឹងក្នុងការកំណត់ឱ្យឃើញពីមុខងារ និងដំណើរការសំខាន់ៗដែលអាចឱ្យអង្គភាពលោកអ្នកបន្តអាជីវកម្មបានបើទោះបីជាមានរឿងអ្វីកើតឡើងក៏ដោយ។ គ្រប់ដំណើរការសំខាន់ៗទាំងអស់ត្រូវែតមានផែនការបម្រុងដើម្បីការពារនៅពេលមានមុខងារណាមួយមិនដំណើរការ។ អ្នកជំនាញបានសង្កត់ធ្ងន់ថា ការសាកល្បងអនុវត្តផែនការបម្រុងគ្រោះមហន្តរាយទាំងនេះជួយឱ្យម្ចាស់អាជីវកម្មទាំងអស់យល់ដឹង និងមានជំហរកាន់តែរឹងមាំក្នុងការទប់ទល់នឹងវិបត្តិដែលអាចកើតមានឡើង។ ជាលទ្ធ ផលប្រសិនបើមានហេតុការណ៍កើតឡើងពិតមែននោះ បុគ្គលិកទាំងអស់នឹងមានប្រតិកម្មបានលឿន និងមានប្រសិទ្ធភាពជាងមុន។
ការបង្កើតឡើងសិក្ខាសាលានេះអាចផ្តល់ឱ្យប្រទេសកម្ពុជាយើងនូវឱកាសក្នុងការចាប់យកនូវនិន្នាការ និងការអនុវត្តតាមស្តង់ដាអន្តរជាតិ។ បណ្តាអង្គភាពដែលបានបង្កើតគោលការណ៍ស្តីអំពីការបន្តអាជីវកម្ម និងការស្តារឡើងវិញនៅពេលក្រុមហ៊ុនជួបគ្រោះមហន្តរាយនឹងអាចអភិវឌ្ឍនូវកម្រិតស្ថិរភាពអាជីវកម្មរបស់គេឱ្យកាន់តែខ្ពស់ ដូច្នេះគេនឹងអាចផ្តល់ទំនុកចិត្ត និងឯកទេសភាពរបស់គេកាន់តែខ្លាំងទៅដល់សាធារណជន ៕
ចែករំលែកព័តមាននេះ