ខេត្តកំពង់ឆ្នាំង ៖ លោកកែវ រិទ្ធី អនុប្រធានមន្ទីរកសិកម្មខេត្ត និងលោកក្រឹង សំអាត ប្រធានការិយាល័យបសុព្យាបាល កាលពីថ្ងៃទី១៤ កក្កដា បានដឹកនាំមន្ត្រីពេទ្យសត្វចុះចាក់ថ្នាំការពារជំងឺសារទឹកសត្វគោរបស់ប្រជាពលរដ្ឋចំនួន៤៩៥ក្បាល ស្ថិតក្នុងភូមិចំនួន៣ ក្នុងឃុំសែប ស្រុកកំពង់ត្រឡាច។
លោកក្រឹង សំអាត ប្រធានការិយាល័យពេទ្យសត្វបានមានប្រសាសន៍ថា ដោយពេលនេះជារដូវធ្វើស្រែចម្ការ ដែលប្រជាកសិករពឹងផ្អែកលើកម្លាំងអូសទាញ ដើម្បីភ្ជួររាស់ និងជាការទប់ស្កាត់ក្រែងសត្វពាហនៈទាំងនោះមានជំងឺជាហេតុបង្ករឱ្យខាតបង់ពេលវេលា ទ្រព្យសម្បត្តិ ទើបលោកប្រធានមន្ទីរកសិកម្មចាត់វិធានការចុះចាក់វ៉ាក់សាំងការពារលើសត្វគោរបស់ប្រជាពលរដ្ឋរយៈពេលតែមួយព្រឹកថ្ងៃទី១៤កក្កដានោះយើងសម្រេចបានចំនួន៤៩៥ក្បាល តែយើងនឹងបន្តចាក់នៅតាមភូមិ-ឃុំមួយចំនួនក្នុងខេត្តជាបន្តទៀត។
លោកកែវ រិទ្ធី អនុប្រធានមន្ទីរកសកម្មខេត្តបានណែនាំដល់ប្រជាពលរដ្ឋដែលបានយកសត្វគោមកចាក់ថ្នាំក្នុងពេលនេះថា ត្រូវយកចិត្តទុកដាក់ ថែទាំសត្វបន្ថែមទៀត ដែលមានស្រាប់ដូចជា មាន់ ទា ជ្រូក និងគោ ក្របី ជាដើម ហើយបងប្អូនដែលពុំទាន់បានយកសត្វគោមកចាក់ថ្នាំវ៉ាក់សាំងការពារជំងឺសារទឹកដែលតែងកើតឡើងក្នុងរដូវវស្សានេះ សូមប្រញាប់ប្រញាល់យកមកចាក់ការពារព្រោះខាងពេទ្យសត្វមកចាក់ការពារឱ្យបង ប្អូន ជាបន្តបន្ទាប់ទៀត។
លោកបន្តទៀតថា ក្រៅពីនេះសូមបង ប្អូន ប្រជាពលរដ្ឋយកចិត្តទុកដាក់ថែបំប៉នដល់សត្វដែលជាកម្លាំងអូសទាញឱ្យបានល្អ ដើម្បីបញ្ចៀសនូវរាល់ជំងឺដង្កាត់ផ្សេងៗ៕
ចែករំលែកព័តមាននេះ