កីឡាករអង់គ្លេស ម៉ាក កាវ៉ឹនឌីស បានទុកការបរាជ័យរបស់ខ្លួនកាលពីដំណាក់ទី១០ មួយឡែកដោយប្រឹងប្រែងរហូតយកឈ្នះដំណាក់ទី១១ នៃការប្រណាំងកង់ក្របខណ្ឌ Tour de France នៅប្រទេសបារាំងកាលពីថ្ងៃពុធទី១៣ខែកក្កដាកន្លងមក។ ការប្រណាំងដំណាក់ខាងលើនេះ បានបញ្ចប់នៅទីក្រុង Lavaur ប្រទេសបារាំង។
កីឡាករអង់គ្លេស ម៉ាក កាវ៉ឹនឌីស បានទុកការបរាជ័យរបស់ខ្លួនកាលពីដំណាក់ទី១០ មួយឡែកដោយប្រឹងប្រែងរហូតយកឈ្នះដំណាក់ទី១១ នៃការប្រណាំងកង់ក្របខណ្ឌ Tour de France នៅប្រទេសបារាំងកាលពីថ្ងៃពុធទី១៣ខែកក្កដាកន្លងមក។ ការប្រណាំងដំណាក់ខាងលើនេះ បានបញ្ចប់នៅទីក្រុង Lavaur ប្រទេសបារាំង។
កាវ៉ឹនឌីស ដែលជាអ្នកជិះកង់ឲ្យក្រុមHTC-Highroadបានយកឈ្នះដំណាក់ដែលមានចម្ងាយផ្លូវ១៦៨គីឡូម៉ែត្រ ចេញដំណើរពីទីក្រុង Blaye-les-Minesឆ្ពោះទៅកាន់ទីក្រុងLavaurប្រទេសបារាំង ដោយប្រើអស់ថិរវេលា៣ម៉ោង៤៦នាទីនិង៧វិនាទី យកឈ្នះកីឡាករអាល្លឺម៉ង់អង់ដ្រេ ហ្គ្រេប៉េល ជិះកង់ឲ្យក្រុមOmega Pharma-Lottoនិងយកឈ្នះកីឡាករអាមេរិកថៃល័រហ្វារ៉ារបស់ក្រុម Team Garmin Cervelo ដែលទាំងពីរនាក់បានប្រើថិរវេលាច្រើនជាងដូចៗគ្នា ។
បន្ទាប់ពីទទួលបានជ័យជម្នះកីឡាករកាវ៉ឹនឌីសបានបញ្ជាក់ថា៖ «ទីបំផុត ខ្ញុំអាចពាក់អាវកាក់ពណ៌បៃតងបានហើយ។ ខ្ញុំនឹងរក្សាអាវនេះរហូតដល់ទីក្រុងប៉ារីស»។ កីឡាករវ័យ២៦ឆ្នាំរូបនេះបានបន្តថា៖ «វាពិតជាពុំគួរឲ្យជឿដែលខ្ញុំអាចដណ្តើមបានអាវកាក់នេះ។ ជ័យជម្នះលើកនេះបានបង្ហាញថា ក្រុមរបស់យើងគឺជាក្រុមខ្លាំងមួយក្នុងលោក។ ខ្ញុំសូមថ្លែងអំណរគុណដល់មិត្តរួមក្រុមរបស់ខ្ញុំទាំងអស់ដែលបានជួយជ្រោមជ្រែងឲ្យខ្ញុំឈ្នះការប្រណាំងក្នុងដំណាក់នេះ។ នៅមានការជិះឡើងទីទួលជាច្រើនលើកទៀត ដូច្នេះខ្ញុំនឹងព្យាយាមយកជ័យជម្នះឲ្យខាងតែបាន តែយ៉ាងណា ការរក្សាលទ្ធផលឲ្យល្អដូចជាថ្ងៃនេះគឺពិតជាការងារដ៏ពិបាកមួយ»។
សម្រាប់កីឡាករកាវ៉ឹនឌីស បើទោះណាជាគេដណ្តើមបានជ័យជម្នះលើកនេះពិតមែន ប៉ុន្តែគេនៅតែមិនទាន់អាចសន្សំពិន្ទុបានគ្រប់គ្រាន់ក្នុងការនាំមុខគេលើតារាងពេលវេលាសរុបបាននៅឡើយទេ។ ចំណែកកីឡាករបារាំង វ៉ូអែកក្លេ បើទោះបីជាក្នុងដំណាក់នេះគេបញ្ចប់ក្នុងលំដាប់ទី៧៥ក៏ដោយ ប៉ុន្តែគេនៅតែអាចសន្សំពិន្ទុបានគ្រប់គ្រាន់បន្តនាំមុខគេនិងគ្រងអាវកាក់ពណ៌លឿងដដែល។
បន្ទាប់ពីឆ្លងកាត់ការប្រណាំងអស់១១ដំណាក់មកនេះ កីឡាករវ៉ូអែកក្លេ បានប្រើអស់ថិរវេលាតិចជាងគេបំផុតគឺ៤២ម៉ោង៥២នាទីនិង៣៩វិនាទី។ ឯកីឡាករល្វីស ឡេអុនសាន់ឆេស ដែលបានយកឈ្នះដំណាក់ទី៩ស្ថិតនៅលំដាប់ទី២ ដដែលបន្ទាប់ពីប្រើថិរវេលាច្រើនជាង១នាទីនិង៤៩វិនាទី។ ស្ថិតនៅលំដាប់ទី៣គឺកីឡាករអូស្ត្រាលីកាដែល អេវែន។ អេវែន ដែលជិះកង់ឲ្យក្រុម BMC Racing Teamបានប្រើពេលច្រើនជាង២នាទីនិង២៦វិនាទី។
សូមបញ្ជាក់ថា ការប្រណាំងកង់ក្នុងកម្មវិធីTour de France ឆ្នាំនេះ មាន២១ដំណាក់លើចម្ងាយផ្លូវសរុប៣.៤៣០,៥គីឡូម៉ែត្រ។ ដោយឡែកដំណាក់ទី១២ដែលជាដំណាក់បន្តមានចម្ងាយផ្លូវ២០៩គីឡូម៉ែត្រ ចេញដំណើរពីទីក្រុង Cugnaux ឆ្ពោះទៅកាន់ទីក្រុង Luz-Ardiden ប្រទេសបារាំង ៕
ចែករំលែកព័តមាននេះ