ខេត្តកណ្តាល ៖ កាលពីព្រឹកថ្ងៃទី១៣ កក្កដា ឆ្នាំ២០១១ នៅសាលប្រជុំសាលាខេត្ត កណ្តាល បានបើកកិច្ចប្រជុំលើកទី៣ ឆ្នាំ២០១១ស្តីពីការអនុវត្តយន្តការទប់ស្កាត់និងការកាត់បន្ថយបញ្ហាគ្រឿងញៀនរួមចំណែកឆ្ពោះទៅ រកអាស៊ានឆ្នាំ២០១៥ គ្មានគ្រឿងញៀនរវាងការិយាល័យBLOខេត្តកណ្តាលនៃព្រះរាជាណាចក្រកម្ពុជា និងការិយាល័យBLOខេត្តអានយ៉ាង នៃសាធារណរដ្ឋសង្គមនិយមវៀតណាម ។
កិច្ចប្រជុំនេះធ្វើឡើងក្រោមការអញ្ជើញចូលរួមពីតំណាងគណៈកម្មការត្រួតពិនិត្យគ្រឿងញៀនខេត្តកណ្តាល លោកវរសេនីយ៍ឯកលន់ សុផាត ស្នងការរងនគរបាលខេត្ត និងជាអនុប្រធានប្រចាំការការិយាល័យBLOខេត្ត ព្រមទាំងមន្ត្រីស្ថាប័នពាក់ព័ន្ធ ចំណែកឯតំណាងគណៈកម្មការត្រួតពិនិត្យគ្រឿងញៀនខេត្តអានយ៉ាងដឹកនាំដោយលោកវរសេនីយ៍ឯកឡេ វ៉ាន់ទៀន ស្នងការរងខេត្តអានយ៉ាងនិងជាប្រធានការិយាល័យBLOខេត្តអានយ៉ាង ព្រមទាំងមន្ត្រីជាច្រើនរូបដែលបានអមដំណើរ។
លោកវរសេនីយ៍ឯក លន់ សុផាត ឱ្យដឹងថា ខ្លឹមសារសំខាន់នៃកិច្ចប្រជុំនេះ គឺពង្រឹងប្រឆាំងបទល្មើសគ្រឿងញៀននៅតាមព្រំដែននិងបន្តកិច្ចសហប្រតិបត្តិការឱ្យបានល្អរវាងខេត្តទាំងពីរនៃប្រទេសទាំងពីរ។ អង្គប្រជុំក៏បានខិតខំរកគ្រប់វិធីពិភាក្សាប្តូរយោបល់គ្នាដើម្បីកាត់បន្ថយការប្រើប្រាស់និងការផ្គត់ផ្គង់គ្រឿងញៀននិងគ្រប់គ្រងមុខសញ្ញាចេញចូលធ្វើសកម្មភាពបទល្មើសនៅតាមតំបន់ព្រំដែន ជាពិសេសពង្រឹងសមត្ថភាពមន្ត្រីនៅតាមច្រកព្រំដែននៃខេត្តទាំងពីរក៏ដូចជាការកសាងភូមិឃុំតាមតំបន់ព្រំដែនមិនឱ្យកើតមានបទល្មើសគ្រឿងញៀន។
បើយោងតាមរបាយការណ៍បូកសរុបលទ្ធផលសកម្មភាពការងាររបស់ការិយាល័យBLO ឆមាសទី១ ឆ្នាំ២០១១របស់ខេត្តកណ្តាល ប្រតិបត្តិការបង្ក្រាបបទល្មើសគ្រឿងញៀននៅតាមតំបន់ព្រំដែនបានចំនួន៨ករណី ឃាត់ខ្លួនជនសង្ស័យ២៣នាក់ គឺមានស្រី៤នាក់ ក្នុងនោះជនជាតិខ្មែរ១៤នាក់ ជនជាតិវៀតណាម៧នាក់ និងជនជាតិខ្មែរអ៊ិស្លាម៧នាក់។ វត្ថុតាងចាប់បានសរុបមានថ្នាំញៀនប្រភេទមេតំហ្វេតាមីនទម្ងន់៦០,៤៥៥ក្រាម ហេរ៉ូអុីនចំនួន១ តែប កញ្ឆាក្រៀមទំហំប៉ុនមេដៃចំនួន២០០ដុំ ប្រាក់រៀល២០០.០០០រៀល ប្រាក់ដុល្លា១៥ដុល្លារ និងប្រាក់ដុង៦០០.០០០ដុង ព្រមទាំងម៉ូតូ២គ្រឿង ទូរស័ព្ទដៃ៦គ្រឿងដាវ១ សម្ភារសម្រាប់វេចខ្ចប់ និងប្រើប្រាស់គ្រឿងញៀនមួយចំនួនធំ៕
ចែករំលែកព័តមាននេះ