តាមប្រភព AFP ផ្សាយថា អូស្ត្រាលីបានប្រកាសពីផែនការប្រមូលពន្ធលើជាតិពុលកាបូនឌីអុកស៊ីដក្នុងតម្លៃ២៣ដុល្លារអូស្ត្រាលី ឬប្រហែល២ដុល្លារអាមេរិកក្នុង១តោន សម្រាប់ជួយកាត់បន្ថយកម្តៅផែនដី។ ស្របពេលជាមួយគ្នានេះ រដ្ឋាភិបាលក្រុងកេនប័ររ៉ា ក៏បានត្រៀមជំរុញកម្មសិទ្ធិបញ្ញាពាណិជ្ជកម្មបញ្ចេញជាតិពុល រួមទាំងបង្កើតមូលនិធិទ្រទ្រង់អ្នកផលិតឱ្យងាកទៅរកការប្រើប្រាស់ថាមពលជំនួស។
លោកជូលីយ៉ា ហ្គីលឡាដ នាយករដ្ឋមន្ត្រីនៃប្រទេសអូស្ត្រាលីថ្លែងថា នឹងកំណត់ពន្ធលើកាបូនឌីអុកស៊ីដ ដែលជាបញ្ហា ធ្វើឱ្យកើនកម្តៅផែនដី ក្នុងអត្រាទាបចាប់តាំងពីឆ្នាំក្រោយទៅ នៅមុនពេលចាប់ផ្តើមប្រើច្បាប់កម្មវិធីពាណិជ្ជកម្មបញ្ចេញជាតិពុល ក្នុងឆ្នាំ២០១៥ ។ នាយករដ្ឋមន្ត្រីអូស្ត្រាលីបានថ្លែងប្រាប់ប្រជាជនតាមរយៈទូរទស្សន៍ថា «យើងបានពិភាក្សា ពីបញ្ហាផ្លាស់ប្តូរអាកាសធាតុនៅក្នុងប្រទេសអស់រយៈពេលជាយូរ និងនៅក្នុងឆ្នាំ២០១១នេះ ជាឆ្នាំដែលយើងបានសម្រេចចិត្តក្នុងនាមជាប្រទេសដែលត្រូវការអនាគត មានថាមពលស្អាត បច្ចុប្បន្នដល់ពេលវេលាដែលយើងត្រូវប្តូរពីទ្រឹស្តីទៅជាការអនុវត្តហើយ » ។
ក្រោមបទដ្ឋានការប្រមូលពន្ធកាបូនឌីអុកស៊ីដ ដែលចាប់ផ្តើមនៅថ្ងៃទី១ កក្កដា ២០១២ ក្រុមហ៊ុនដែលបង្កស្ថានភាពបរិយាកាសអួអាប់ ប្រហែល៥០០កន្លែងនៅអូស្ត្រាលី នឹងបង់ពន្ធក្នុងអត្រាទាបចាប់ផ្តើមពី២៣ដុល្លារអូស្ត្រាលី (២ដុល្លារអាមេរិក) ក្នុងមួួយតោន សម្រាប់ការបញ្ចេញឧស្ម័នកាបូនឌីអុកស៊ីដ ក្នុងអំឡុងពេល៣ឆ្នាំដំបូង ។ បន្ទាប់មកប្រព័ន្ធការប្រមូលពន្ធនឹងចាប់ផ្តើមប្រើប្រាស់ផែនការកម្មសិទ្ធិបញ្ញាពាណិជ្ជកម្មបញ្ចេញជាតិពុលដោយអត្រាពន្ធស្របតាមលក្ខណៈទីផ្សារ ដោយរដ្ឋាភិបាលជាអ្នកកំណត់ថ្លៃមូលដ្ឋាន ។
លោកជូលីយ៉ា ហ្គីលឡាដ បានបញ្ជាក់ថា កំណែទម្រង់លើកនេះ នឹងបង្កើតកម្លាំងជំរុញផ្នែកសេដ្ឋកិច្ចដល់ក្រុមហ៊ុនបង្កជាតិពុលធំៗទាំងឡាយត្រូវរិះរកបទដ្ឋានកាត់បន្ថយការបញ្ចេញឧស្ម័នផ្ទះកញ្ចក់ឬឧស្ម័នកម្តៅផែនដី ។ ស្របពេលជាមួយគ្នានេះ រដ្ឋាភិបាលនឹងបង្កើតមូលនិធិថាមពលស្អាត(Clean Energy Finance Corporation) មានតម្លៃ១០.០០០លានដុល្លារអូស្ត្រាលី ឬ១.០០០លានដុល្លារអាមេរិក សម្រាប់ទ្រទ្រង់ការប្រើថាមពលជំនួសដោយឧស្សាហកម្មអណ្តូងរ៉ែ ធ្យូងថ្ម នឹងបានទទួលថវិកា១.៣០០លានដុល្លារអូស្ត្រាលី សម្រាប់ជួយពលករ និងជាថ្លៃសំណងលើពន្ធរយៈពេល៥ឆ្នាំ ។
សម្រាប់លោកថូនី អេបបុត មេដឹកនាំគណបក្សប្រឆាំងបានវាយប្រហាររដ្ឋាភិបាលថា «ពួកសង្គមនិយមបង្ហាញឫកពាធ្វើជាអ្នកអនុរក្សបរិស្ថាន» ។ ស្របពេលជាមួយគ្នានេះ លោកបានព្យាករណ៍ថាបទដ្ឋាននេះ នឹងធ្វើឱ្យប្រជាជនជាច្រើននាក់គ្មានប្រាក់ និងអត្រាអត់ការងារធ្វើនឹងកើនខ្ពស់ ខណៈពេលក្រុមហ៊ុន«រីយ៉ូ ធីនដូ» ធ្វើការព្រមានថា ការប្រមូលពន្ធលើកាបូនឌីអុកស៊ីដ នឹងក្លាយជាឧបសគ្គដល់ការវិនិយោគទុន និងការជួលពលករនៅអូស្ត្រាលី ៕
ចែករំលែកព័តមាននេះ