សារព័ត៌មានវៀតណាម បានឲ្យដឹងថា គិតត្រឹមតែរយៈពេល៥ខែនៃឆ្នាំ២០២៥នេះទេ ក្រុមហ៊ុនវៀតណាម បាននាំចូលគ្រាប់ស្វាយចន្ទីពីកម្ពុជា ប្រមាណជា៨៧៣.២០០តោន ដែលមានតម្លៃប្រមាណ១,៣២ពាន់លានដុល្លារ ។ បរិមាណនៃការនាំចូលនេះ មានកំណើនកើនឡើង១៥ភាគរយ…
សារព័ត៌មានវៀតណាម បានឲ្យដឹងថា គិតត្រឹមតែរយៈពេល៥ខែនៃឆ្នាំ២០២៥នេះទេ ក្រុមហ៊ុនវៀតណាម បាននាំចូលគ្រាប់ស្វាយចន្ទីពីកម្ពុជា ប្រមាណជា៨៧៣.២០០តោន ដែលមានតម្លៃប្រមាណ១,៣២ពាន់លានដុល្លារ ។
បរិមាណនៃការនាំចូលនេះ មានកំណើនកើនឡើង១៥ភាគរយ រីឯតម្លៃវិញ គឺកើនឡើងជាង៣៦ភាគរយ បើធៀបនឹងរយៈពេលដដែលកាលពីឆ្នាំ២០២៤កន្លងទៅ ។
បរិមាណនៃគ្រាប់ស្វាយចន្ទី មិនទាន់កែច្នៃរបស់កម្ពុជា ដែលនាំចូលទៅវៀតណាមនេះ គឺមានប្រមាណជាជិត៦៣ភាគរយ នៃតម្រូវការគ្រាប់ស្វាយចន្ទី ដើម្បីកែច្នៃនាំចេញបន្ត ប៉ុន្តែទោះបីជាយ៉ាងណាក៏ដោយ បើគិតពីការនាំចេញវិញបរិមាណនៃការនាំចេញរបស់វៀតណាម នៅឆមាសទី១ គឺធ្លាក់ចុះ ទោះបីជាតម្លៃវាកើនឡើងក៏ដោយ ។
សារព័ត៌មាន Vietnam Plus បានឲ្យដឹងថា នៅឆមាសទី១ ដើមឆ្នាំវៀតណាម នាំចេញគ្រាប់ស្វាយចន្ទីបានត្រឹម៣៤៦.៨០០០តោន ធ្លាក់ចុះ២,៧ភាគរយ ខណៈដែលតម្លៃនៃការនាំចេញវិញ គឺបាន២,៣៦ ពាន់លានដុល្លារ គឺកើនឡើង២០ភាគរយឯណោះ ។
ការដែលបរិមាណនៃការនាំចេញធ្លាក់ចុះនេះហើយ ដែលវាជាបច្ច័យមួយដែលវៀតណាម អាចនឹងបន្ថយល្បឿននៃការនាំចូលគ្រាប់ស្វាយចន្ទីពីកម្ពុជាបន្ថែមទៀត បើទោះបីជាវៀតណាម នៅតែកំណត់គោលដៅ បង្កើនការនាំចេញផលិតផលនេះទៅទីផ្សាររបស់ខ្លួនក៏ដោយចុះ ៕
ចែករំលែកព័តមាននេះ