ទីក្រុងបាងកក៖ ស្ថានឯកអគ្គរាជទូតថៃប្រចាំទីក្រុងហាណូយ ប្រទេសវៀតណាម សូមអំពាវនាវទៅជនជាតិថៃដែលកំពុងធ្វើដំណើរទេសចរណ៍ ឬស្នាក់នៅវៀតណាមខាងជើងសូមមេត្តាប្រុងប្រយ័ត្នឱ្យមែនទែនព្រោះខ្យល់ព្យុះឈ្មោះវីផាកំពុងតែបោកបក់ជិតដល់ទីនោះហើយ។ គេរំពឹងថាខ្យល់ព្យុះនេះនឹងពាំនាំទៅជាមួយនូវភ្លៀងធ្លាក់ខ្លាំងអមដោយខ្យល់កន្ត្រាក់ ភ្លៀង ផ្គរ រន្ទះ និងរលកសមុទ្រធំៗ។…
ទីក្រុងបាងកក៖ ស្ថានឯកអគ្គរាជទូតថៃប្រចាំទីក្រុងហាណូយ ប្រទេសវៀតណាម សូមអំពាវនាវទៅជនជាតិថៃដែលកំពុងធ្វើដំណើរទេសចរណ៍ ឬស្នាក់នៅវៀតណាមខាងជើងសូមមេត្តាប្រុងប្រយ័ត្នឱ្យមែនទែនព្រោះខ្យល់ព្យុះឈ្មោះវីផាកំពុងតែបោកបក់ជិតដល់ទីនោះហើយ។ គេរំពឹងថាខ្យល់ព្យុះនេះនឹងពាំនាំទៅជាមួយនូវភ្លៀងធ្លាក់ខ្លាំងអមដោយខ្យល់កន្ត្រាក់ ភ្លៀង ផ្គរ រន្ទះ និងរលកសមុទ្រធំៗ។
ការអំពាវនាវនេះធ្វើឡើងបន្ទាប់ពីក្រសួងឧតុនិយមវៀតណាមទើបតែប្រកាសឱ្យប្រជាជនរស់នៅតាមតំបន់មាត់សមុទ្រប្រុងប្រយ័ត្នខ្ពស់។ ក្រសួងព្យាករថាខ្យល់ព្យុះវីផានឹងបក់ទៅដល់វៀតណាមខាងជើងនៅដើមសប្ដាហ៍ក្រោយ។ កាលពីថ្ងៃទី១៨ ខែកក្កដា ក្រសួងអះអាងថាខ្យល់ព្យុះនឹងបក់ទៅដល់សមុទ្រចិនខាងត្បូងនៅយប់ថ្ងៃទី១៩ ខែកក្កដា ពោលគឺយប់ថ្ងៃសៅរ៍។
ក្រសួងប្រកាសបន្តទៀតថានៅថ្ងៃទី២២ ខែកក្កដានឹងមានខ្យល់កន្ត្រាក់បោកបក់នៅតំបន់មាត់សមុទ្រវៀតណាម។ ខ្យល់អាចមានល្បឿនចន្លោះពី១០០ទៅ១៣៥គីឡូម៉ែត្រក្នុងមួយម៉ោង។ បណ្ដាខេត្តនៅតាមមាត់សមុទ្រចាប់ពីក្វាងនិញ (Quang Ninh) រហូតដល់ថាញ់ហាវ (Thanh Hoa) នឹងមានភ្លៀងធ្លាក់ខ្លាំង ហើយអាចនឹងមានហេតុការណ៍គ្រោះទឹកជំនន់ និងការបាក់ដី។
ក្រសួងកសិកម្ម និងអភិវឌ្ឍជនបទវៀតណាមបានណែនាំឱ្យអាជ្ញាធរថ្នាក់ក្រោមត្រៀមជម្លៀសមនុស្ស ក៏ដូចជាធានាសុវត្ថិភាពនៃហេដ្ឋារចនាសម្ព័ន្ធ និងខិតខំការពារប្រជាជនដែលរស់នៅតំបន់រងគ្រោះ។ ឆ្លៀតនៅក្នុងឱកាសនេះ ស្ថានទូតថៃនៅហាណូយសូមជំរុញឱ្យជនជាតិថៃរស់នៅតាមបណ្ដាខេត្តមាត់សមុទ្រដូចរៀបរាប់ខាងលើបន្តតាមដានបញ្ហានេះដោយយកចិត្តទុកដាក់ និងស្ដាប់តាមការណែននាំរបស់អាជ្ញាធរ។ បើត្រូវការជំនួយជាបន្ទាន់ សូមទាក់ទងទៅស្ថានទូតថៃនៅហាណូយ៕
ចែករំលែកព័តមាននេះ