រដ្ឋមន្ត្រីការពារប្រទេសអាមេរិកថ្មី លោក LEON PANETTA បានមកបំពេញទស្សនកិច្ចគួរឱ្យភ្ញាក់ផ្អើលមួយនៅអាហ្វហ្គានីស្ថាន។ លោក PANETTA បានមកកាន់មូលដ្ឋានអាកាសចរណ៍យោធាបាហ្ក្រាម ចម្ងាយប្រមាណជា៥០គីឡូម៉ែត្រខាងជើងក្រុងកាប៊ុល ហើយជួបពិភាក្សាជាមួយប្រធានាធិបតីអាហ្វហ្គានីស្ថាន លោកហាមីដ កាហ្សៃ ។ យោងតាមប្រជាជនមូលដ្ឋានថា អាជ្ញាធរអាហ្វហ្គានីស្ថានបានពង្រឹងវិធានការសន្តិសុខដោយរាំងខ្ទប់រាល់ផ្លូវថ្នល់ទាំងអស់មកកាន់វិធានប្រធានាធិបតី។
នេះជាទស្សនកិច្ចលើកដំបូងរបស់លោក PANETTA នៅអាហ្វហ្គានីស្ថានក្រោយពីលោកធ្វើសច្ចាប្រណិធានចូលកាន់តំណែងរដ្ឋមន្ត្រីការពារប្រទេសអាមេរិកកាលពីថ្ងៃទី១ កក្កដា កន្លងទៅនេះមក ។
លោក LEON PANETTA ដែលមកដល់អាហ្វហ្គានីស្ថានកាលពីថ្ងៃទី៩ កក្កដា អះអាងថា ជ័យជំនះជាយុទ្ធសាស្ត្រមួយលើអាល់កៃដា ស្ថិតក្នុងដៃរបស់សហរដ្ឋអាមេរិក ។ មុនពេលមកដល់ក្រុងកាប៊ុល លោកថ្លែងទៅកាន់ក្រុមអ្នកកាសែតថា ពេលវេលាមកដល់ហើយសម្រាប់សហរដ្ឋអាមេរិក បង្កើនការខិតខំប្រឹងប្រែងប្រឆាំងថ្នាក់ដឹកនាំអាល់កៃដា និងបណ្តាមេៗសាខាអាល់កៃដាក្រោយការស្លាប់របស់អូសាម៉ា ប៊ីនឡាដេន ៕
ចែករំលែកព័តមាននេះ