រាជធានីភ្នំពេញ ៖ គណៈគ្រប់គ្រង លោកគ្រូ អ្នកគ្រូ និងមាតាបិតាសិស្សនៅសាលាបឋមសិក្សាភូមិឫស្សី ស្ថិតក្នុងភូមិឫស្សី សង្កាត់ស្ទឹងមានជ័យ ខណ្ឌមានជ័យ កាលពីថ្ងៃទី៩ កក្កដា បានអំពាវនាវដល់លោកប្រធានភូមិ ចៅ សង្កាត់ អភិបាលខណ្ឌ ឱ្យជួយសំអាតអ្នកលក់ដូរបែបអនាធិបតេយ្យលើចិញ្ចើមផ្លូវ និងនៅខាងមុខសាលារៀន ចេញឱ្យអស់ផង ព្រោះការលក់ដូរទាំងនោះរញ៉េរញ៉ៃប៉ះពាល់ដល់ការរៀនសូត្ររបស់សិស្សខ្លាំងណាស់។
ការអំពាវនាវនេះធ្វើឡើងនៅពេលដែលអ្នកលក់ដូរនាំគ្នាមកដាក់លក់នៅខាងមុខសាលាច្រើនឡើងៗ ហើយដេញមិនព្រមចេញ ដែលអាចបណ្តាលឱ្យមានគ្រោះថ្នាក់ដល់សិស្សនៅពេលឆ្លងផ្លូវ និងធ្វើឱ្យបាត់បង់សណ្តាប់ធ្នាប់នៅខាងមុខទីធ្លាសាលាផងដែរ។ យោងតាមលិខិតរបស់មាតាបិតាសិស្ស ដែលកោះសន្តិភាពទទួលកាលពីថ្ងៃទី៩ កក្កដា ដោយមានចុះហត្ថលេខា និងស្នាមមេដៃរបស់តំណាងមាតាបិតាសិស្សជាង១០០នាក់ បានឱ្យដឹងថា មាតា បិតា និងអាណាព្យាបាលសិស្សមានការព្រួយបារម្ភយ៉ាងខ្លាំងនៅពេលឃើញមានការធ្វើតូប ស្តង់ រោង និងកន្លែងលក់ដូរផ្សេងៗយ៉ាងអនាធិបតេយ្យនៅខាងមុខសាលាបឋមសិក្សាភូមិឫស្សីនាពេលប៉ុន្មានខែនេះ ព្រោះវាអាចធ្វើឱ្យមានគ្រោះថ្នាក់ចរាចរណ៍កើតឡើងនៅពេលក្មេងចេញពីរៀនរួចឆ្លងផ្លូវ។
ការលក់ដូរចំណីអាហារនៅខាងក្រៅបរិវេណសាលាបែបនេះវានឹងបណ្តាលឱ្យសិស្សចេញមកខាងក្រៅច្រវាត់ច្រវែង និងអាចបង្កឱ្យមានអសន្តិសុខដល់សិស្សតូចៗ និងបង្កឱ្យសិស្សកើតជំងឺតម្កាត់ផ្សេងៗ ដោយសារតែចំណីអាហារខ្វះអនាម័យ។ ក្រុមលោកគ្រូ អ្នកគ្រូបង្រៀននៅសាលានេះបានប្រាប់កោះសន្តិភាពថា តាមពិតទៅ លោកនាយក នាយករង សាលាធ្លាប់បានហាមឃាត់អ្នកលក់ដូរទាំងនោះមិនឱ្យលក់នៅខាងមុខសាលាញឹកញាប់ដែរ តែពួកគេមិនស្តាប់ ហើយបាននាំគ្នាកាន់តែច្រើនឡើងមកបោះតង់ប្រក់ដំបូលយ៉ាងអនាធិបតេយ្យ ធ្វើឱ្យសាលារៀនស្ទើរក្លាយទៅជាផ្សារលក់ដូរទៅហើយ។
ពេលនេះលោកគ្រូ អ្នកគ្រូ និងអាណាព្យាបាលសិស្សកំពុងតែរង់ចាំមើលអន្តរាគមន៍ពីអាជ្ញាធរថាតើមានដំណោះស្រាយយ៉ាងណា ដើម្បីធានាសុវត្ថិភាពសិស្ស អនាម័យ និងសណ្តាប់ធ្នាប់សាលា?
ចែករំលែកព័តមាននេះ