ខេត្តកណ្តាល ៖ សង្កាត់រដ្ឋបាលព្រៃឈើខ្សាច់កណ្តាលបានរៀបចំពិធីចែកចាយ និងដាំ កូនឈើជាង១ម៉ឺនដើមដល់វត្តអារាម និងប្រជាពលរដ្ឋ ព្រមទាំងអាជ្ញាធរ ដើម្បីអបអរបុណ្យរុក្ខទិវា ៩ កក្កដា ២០១១ ដោយមានការអញ្ជើញចូលរួមពីផ្នែករដ្ឋបាលព្រៃឈើកណ្តាល លោកមេឃុំ លោកភូមិ និងប្រជាពលរដ្ឋយ៉ាងច្រើន
ខេត្តកណ្តាល ៖ សង្កាត់រដ្ឋបាលព្រៃឈើខ្សាច់កណ្តាលបានរៀបចំពិធីចែកចាយ និងដាំ កូនឈើជាង១ម៉ឺនដើមដល់វត្តអារាម និងប្រជាពលរដ្ឋ ព្រមទាំងអាជ្ញាធរ ដើម្បីអបអរបុណ្យរុក្ខទិវា ៩ កក្កដា ២០១១ ដោយមានការអញ្ជើញចូលរួមពីផ្នែករដ្ឋបាលព្រៃឈើកណ្តាល លោកមេឃុំ លោកភូមិ និងប្រជាពលរដ្ឋយ៉ាងច្រើនកុះករ។ ពិធីនេះបានប្រារព្ធធ្វើឡើងកាលពី ព្រឹកថ្ងៃទី៥ កក្កដា ក្នុងបរិវេណវត្តព្រៃលាក់ម្ចាស់ ស្ថិតក្នុងឃុំវិហារសួគ៌ ស្រុកខ្សាច់កណ្តាល។
លោកសោម ខ័ន្ធរិទ្ធ នាយសង្កាត់រដ្ឋបាលព្រៃឈើខ្សាច់កណ្តាល បានថ្លែងថា ថ្ងៃនេះ សង្កាត់រដ្ឋបាលព្រៃឈើខ្សាច់កណ្តាល មានកិត្តិយសដ៏ឧត្តុង្គឧត្តម និងសប្បាយរីករាយបំផុត ដោយបានរួមសហការជាមួយអាជ្ញធរស្រុកខ្សាច់កណ្តាល ព្រមទាំងមន្រ្តីរាជការ សិស្សានុសិស្សរៀបចំពិធីចែកចាយ និងដាំកូនឈើនាឱកាសនេះក្នុងបរិវេណវត្តព្រៃលាក់ម្ចាស់ ដើម្បីអបអរសាទរថ្ងៃបុណ្យរុក្ខទិវា ៩ កក្កដា ២០១១។ លោកបានបន្តថា ប្រជាជនរាប់រយលាននាក់នៅលើពិភពលោកបានពឹងផ្អែកមួយផ្នែកធំទៅលើផលិតផលដែលប្រមូលយកចេញពីព្រៃឈើ។ កន្លងមករហូតដល់បច្ចុប្បន្ន យើងតែងតែទទួលស្គាល់ថា ព្រៃឈើមានផលប្រយោជន៍ និងសារសំខាន់លើសលប់បំផុតចំពោះមនុស្សជាតិ ដូចជាផ្តល់ឈើប្រើប្រាស់ក្នុងសំណង់គ្រប់យ៉ាង ជាអុសសម្រាប់ដុត ជាគ្រឿងសង្ហារិមសម្រាប់ប្រើប្រាស់ក្នុងជីវភាពរស់នៅ ជាជម្រកសត្វព្រៃគ្រប់ប្រភេទ បង្កើនជីជាតិដល់ដី ទប់ទល់ការហូរច្រោះដី និងកែសម្រួលធាតុអាកាសជាដើម។
លោកនាយសង្កាត់រដ្ឋបាលព្រៃឈើខ្សាច់កណ្តាលបានបន្តទៀតថា ដោយមើលឃើញនូវផលប្រយោជន៍នៃព្រៃឈើ សង្កាត់រដ្ឋបាលព្រៃឈើខ្សាច់កណ្តាលចំណុះឱ្យផ្នែករដ្ឋបាលព្រៃឈើកណ្តាល បានរៀបចំថ្នាលបណ្តុះកូនឈើមួយកន្លែងស្ថិតក្នុងភូមិព្រែកយាយហិន២ ឃុំឫស្សីជ្រោយ ស្រុកមុខកំពូល ដើម្បីចែកចាយជូនប្រជាពលរដ្ឋតាមសាលារៀន វត្តអារាម និងស្ថាប័នរដ្ឋក្នុងស្រុកមុខកំពូល និងស្រុកខ្សាច់កណ្តាលទាំងមូល។ ចំពោះការងារបណ្តុះកូនឈើនៅក្នុងឆ្នាំ២០១១នេះ សង្កាត់រដ្ឋបាលព្រៃឈើខ្សាច់កណ្តាលបានបណ្តុះកូនឈើសរុបចំនួន២៤.៨០០ដើម ក្នុងនោះមានកូនឈើគគីរចំនួន១.៨០០ដើម កូនបេង៩.៣៥០ដើម កូនច្រេស២.០០០ដើម កូនខ្នុរ៧៥០ដើម កូនស្វាយ៤០០ដើម និងកូនអាកាស្យា១០.៥០០ដើម។ ទន្ទឹមនឹងនេះ សង្កាត់រដ្ឋបាលព្រៃឈើខ្សាច់កណ្តាល បានចែកចាយកូនឈើប្រភេទប្រណីត (បេង) ចំនួន៣.៥០០ដើមដល់វត្តអារាមចំនួន១០វត្ត កូនឈើអាកាស្យាចំនួន៥.០០០ដើមដល់សាលាស្រុកខ្សាច់កណ្តាល និងកូនឈើហូបផ្លែជូនប្រជាពលរដ្ឋយកទៅដាំជាលក្ខណៈគ្រួសារចំនួន៥.១៥០ដើម សរុបទាំងអស់ចំនួន១៣.៦៥០ដើម។ លោកបានបន្តថា ថ្ងៃនេះកូនឈើដែលត្រូវដាំនិងចែកចាយជូនប្រជាពលរដ្ឋ និងវត្តអារាមសរុបចំនួន៤.១៥០ដើម ក្នុងនោះដាំក្នុងបរិវេណវត្តមានកូនបេង កូនច្រេស កូនគគីរ និងកូនអាកាស្យាសរុបចំនួន១.៥៥០ដើម។ ចែកចាយជូនប្រជាពលរដ្ឋយកទៅធ្វើការដាំដុះជាលក្ខណៈគ្រួសារមានកូនស្វាយ កូនខ្នុរ កូនច្រេស និងកូនអាកាស្យាសរុបចំនួន២.៦០០ដើម។
លោកសោម ខ័ន្ធរិទ្ធ បានថ្លែងអំណរគុណ និងសម្តែងនូវមនោសញ្ចេតនាអបអរសាទរយ៉ាងកក់ក្តៅចំពោះលោកនាយផ្នែករដ្ឋបាលព្រៃឈើកណ្តាល លោកមេឃុំ លោកមេភូមិ ប្រជាពលរដ្ឋ ព្រមទាំងលោកគ្រូអ្នកគ្រូ សិស្សានុសិស្សទាំងអស់ ដែលបានអញ្ជើញចូលរួមក្នុងពិធីចែកចាយ និងដាំកូនឈើក្នុងថ្ងៃនេះ ហើយលោកក៏បានសំណូមពរដល់ប្រជាពលរដ្ឋទាំងអស់រួមគ្នាយកកូនឈើទៅធ្វើការដាំដុះ និងថែទាំឱ្យបានល្អ៕
ចែករំលែកព័តមាននេះ