ខេត្តប៉ៃលិន ៖ ក្រោយពីបានចុះជួបសំណេះសំណាលជាមួយប្រជាកសិកររយៈពេលមួយព្រឹកថ្ងៃទី១២ កញ្ញា លោកបណ្ឌិតចាន់ សារុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទបានមានប្រសាសន៍ថា ប្រជាកសិករហាក់ដូចជានៅឆ្ងាយពីមន្ត្រីជំនាញកសិកម្មនៃមន្ទីរកសិកម្មខេត្ត ។ លោកបានមានប្រសាសន៍បែបនេះនៅក្នុងឱកាសជួបសំណេះសំណាលសួរសុខទុក្ខ និងបំពាក់មេដាយជូនដល់មន្ត្រីរាជការនៃមន្ទីរកសិកម្ម រដ្ឋបាលព្រៃឈើ និងជលផលខេត្តដែលបានធ្វើឡើងនៅល្ងាចថ្ងៃដដែលនោះ នៅមន្ទីរកសិកម្មខេត្ត ។
លោករដ្ឋមន្ត្រីចាន់ សារុន បានមានប្រសាសន៍បន្តថា មន្ត្រីនៃមន្ទីរកសិកម្មមានតួនាទី ផ្សព្វផ្សាយបំផុសឱ្យប្រជាកសិករខិតខំបង្កបង្កើនផលទាំងចំការ ស្រែ និងការចិញ្ចឹមសត្វដូចជាការចិញ្ចឹមគោ ជ្រូក មាន់ ទា ត្រី និងកង្កែបជាដើម ដើម្បីបំរើការផ្គត់ផ្គង់គ្រួសារប្រចាំថ្ងៃរបស់ប្រជាពលរដ្ឋក្នុងខេត្ត ចៀសវាងការនាំចូលផលិតផលទាំងអស់នេះពីខាងក្រៅដូចជា ប្រទេសថៃជាដើម ។ ចំណែកឯមន្ទីរកសិកម្មជាអ្នកផ្តល់នូវបច្ចេកទេសសព្វបែបយ៉ាងជូនពួកគាត់ ។ ប៉ុន្តែមន្ត្រីកសិកម្មគ្រប់ផ្នែក គ្រប់ជំនាញ ហាក់ដូចជាមានការធ្វេសប្រហែសចំពោះការងាររបស់ខ្លួន ។ ប្រជាកសិករហាក់ដូចជាមិនដែលទទួលបានការណែនាំ ឬបណ្តុះបណ្តាលបច្ចេកទេសផ្នែកកសិ កម្មពីមន្ត្រីជំនាញរបស់មន្ទីរកសិកម្មឡើយ ហើយម្យ៉ាងទៀតការបំរើសេវាកម្មជូនប្រជាពលរដ្ឋក៏ហាក់ដូចជាមានការទន់ខ្សោយជាខ្លាំងដែរ ។
លោកមានប្រសាសន៍បន្តទៀតថា ខេត្តប៉ៃលិនតូចមួយសោះ តែមន្ត្រីជំនាញហាក់ដូចជាមិនដឹងថា មានជនខិលខូចយកគ្រាប់ពូជក្លែងក្លាយមកលក់ចែកចាយឱ្យប្រជាពលរដ្ឋយកទៅដាំ ។ ហើយម្យ៉ាងទៀតនៅពេលដែលសត្វចិញ្ចឹមរបស់ប្រជាកសិករបានជួបប្រទះនូវជំងឺមកយាយី ក៏មន្ត្រីជំនាញហាក់ដូចជាមិនបានដឹង និងមិនបានចុះជួយអន្តរាគមន៍បានទាន់ពេលវេលា ។ តើមន្ត្រីទាំងអស់កំពុងធ្វើអ្វីរាល់ថ្ងៃ?
ក្នុងឱកាសនៃការជួបសំណេះសំណាលសួរសុខទុក្ខ និងបំពាក់មេដាយជូនដល់មន្ត្រីរាជការនៃមន្ទីរកសិកម្ម រដ្ឋបាលព្រៃឈើ និងជលផលខេត្ត ហើយបានសន្យាថា នឹងបញ្ជូនមន្ត្រីជំនាញទៅជួយបណ្តុះបណ្តាល ផ្នែកបច្ចេកទេស ដល់ប្រជាពលរដ្ឋ និងបានសន្យាផ្តល់ជូនកុំព្យូទ័រដល់សហគមន៍អភិវឌ្ឍន៍កសិកម្មក្នុងខេត្តតាមសំណូមពររបស់តំណាងសហគមន៍ ៕
ចែករំលែកព័តមាននេះ