ក្រុងប៉ោយប៉ែត ៖ បុរសជនជាតិសៀមម្នាក់ត្រូវបានគេប្រទះឃើញដេកស្លាប់នៅក្នុងបន្ទប់ជួលមួយក្បែរមាត់អូរព្រំដែន ស្ថិតក្នុងភូមិក្បាលស្ពាន សង្កាត់ប៉ោយប៉ែត ហើយត្រូវជនជាតិសៀមដែលដេកនៅបន្ទប់ជាមួយគ្នាដឹងនៅវេលាម៉ោង៣ទៀបភ្លឺឈានចូលព្រឹកថ្ងៃទី៨ កក្កដា កន្លងមក។
តាមព័ត៌មានបានឱ្យដឹងថា បុរសដេកស្លាប់នោះឈ្មោះឡាក់ ភីភុន ថេបយ៉ា យុន អាយុ៦៣ឆ្នាំ ជនជាតិថៃចូលមកកម្ពុជាដើម្បីលេងល្បែងតាមកាស៊ីណូ មានស្រុកកំណើតនៅខេត្តឈៀងរ៉ៃ ប្រទេសសៀម ។ ក្នុងបន្ទប់កើតហេតុមានដេកគ្នាចំនួន៣នាក់ ដោយអ្នកផ្សេង២នាក់ទៀតអះអាងជាមិត្តភក្តិ និងជាប្អូនធម៌ មាន ១-ឈ្មោះខ្វាន់ឆៃ តៀងនីម ភេទប្រុស អាយុ៦៣ឆ្នាំ មកពីខេត្តសារៈបូរី និង២-ឈ្មោះសុម៉ាលី ប៊ុនតាណង ភេទស្រី អាយុ៣៦ឆ្នាំ មកពី ខេត្តសុផាផន ។ ឈ្មោះខ្វាន់ឆៃតៀងនីម បានប្រាប់ថា រូបគេមកកម្ពុជាជាលក្ខណៈភ្ញៀវទេសចរ មិនមែនមកលេងល្បែងដូចអ្នកស្លាប់ទេ ហើយមានទិដ្ឋាការឆ្លងដែនត្រឹមត្រូវ។ ឯស្ត្រីឈ្មោះសុម៉ាលី ប៊ុនតាណង បានអះអាងថា ខ្លួនមកកម្ពុជាជាអ្នកដើរលេងល្បែង ហើយមកស្នាក់នៅស្រុកខ្មែរចំនួន៤ទៅ៥ឆ្នាំហើយ ដោយជួលបន្ទប់នៅជាមួយអ្នកស្លាប់នេះរហូតមក។
អ្នកទាំង២បន្តថា មុនពេលស្លាប់ កាលពីវេលាម៉ោងជាង១២ថ្ងៃត្រង់ ថ្ងៃទី៧ កក្កដា បុរសរងគ្រោះមានអាការវិលមុខដួលនៅក្នុងកាស៊ីណូម្តង ខណៈចូលទៅ លេងល្បែងនៅទីនោះ ហើយក៏ត្រឡប់មកបន្ទប់ដេកវិញតាំងពីក្បាលល្ងាច។ ប្រភពបន្តទៀតថា នៅវេលាម៉ោងប្រហែលរំលងអធ្រាត្រចូលថ្ងៃទី៨ កក្កដា បានឮសំឡេងជនរងគ្រោះថ្ងូរទំនងមានអាការពិបាកក្នុងខ្លួន ប៉ុន្តែពេលសួរនាំ និងស្ទាបខ្លួនគ្មានអ្វីកើតឡើងនោះទេ ។
ស្ត្រីឈ្មោះសុម៉ាលី បញ្ជាក់ថា លុះម៉ោងប្រហែល៣ទៀបភ្លឺ នាងយកដៃស្ទាបសាច់ជនរងគ្រោះត្រជាក់ដូចទឹកកក ក៏ដាស់ ស្រាប់តែស្លាប់បាត់ទៅហើយ ។
នៅព្រឹកថ្ងៃទី៨ កក្កដា គេឃើញសមត្ថកិច្ចជំនាញសហការជាមួយអាជ្ញាធរដែនដីបានចុះទៅដល់ចំណុចកើតហេតុ ក្នុងនោះមានទាំងសមត្ថកិច្ចជំនាញមកពីការិយាល័យបច្ចេកទេសវិទ្យាសាស្ត្រនៃស្នងការនគរបាលខេត្តបន្ទាយមានជ័យផងដែរ។
ជុំវិញបញ្ហាខាងលើនេះ លោកចាន់ សុភី នាយផ្នែកបច្ចេកទេសនៃអធិការនគរបាលក្រុងប៉ោយប៉ែតបានប្រាប់តាមទូរស័ព្ទថា ផ្អែកលើការចុះពិនិត្យលើរាងកាយសាកសព លោកបានសន្និដ្ឋានថា ជនរងគ្រោះអាចស្លាប់ដោយគាំងបេះដូង ឬលើសឈាម មិនមែនឃាតកម្មទេ ៕
ចែករំលែកព័តមាននេះ