រាជធានីភ្នំពេញ ៖ កាលពីព្រឹកថ្ងៃទី៨ កក្កដា លោកស្រីសោម ភឹមភតារា អាយុ៤៥ឆ្នាំដែលគេស្គាល់ច្បាស់ថា ជាភរិយាលោកឧត្តមសេនីយ៍ត្រីពេជ ពណ្ណរាយ អាយុ៥៤ឆ្នាំ ជានាយរងមជ្ឈមណ្ឌលស្រាវជ្រាវយុទ្ធសាស្ត្រយោធានៃអគ្គបញ្ជាការកងយោធពលខេមរភូមិន្ទ អមដំណើរដោយកូនប្រុស២នាក់ បាននាំយកកាំភ្លើងវែងខ្លីចំនួន៤ដើម និងគ្រាប់ទៅប្រគល់ឱ្យសមត្ថកិច្ចកងរាជអាវុធហត្ថខណ្ឌ៧មករា។
កាំភ្លើង៤ដើម និងគ្រាប់ដែលលោកស្រីសោម ភឹមភតារា យកទៅប្រគល់ឱ្យកងរាជអាវុធហត្ថនោះ ១-កាំភ្លើង AK47 លេខ NT.263 ១ដើម បង់៤ និងគ្រាប់១២០គ្រាប់ ២-កាំភ្លើងម៉ាក M16 លេខ៤៩២៣១៦២ ១ដើម បង់១ និងគ្រាប់៨០គ្រាប់ ៣-កាំភ្លើងបាញ់សត្វម៉ាកអែសស្កាទូ លេខ NB.04666 ១ដើម បង់១គ្រាប់២០គ្រាប់ និង៤-កាំភ្លើងខ្លីម៉ាក RUGER លេខ២១៦៩៣៨ ១ដើម បង់១។
នៅចំពោះមុខសមត្ថកិច្ចកងរាជអាវុធហត្ថខណ្ឌ៧មករា លោកស្រីសោម ភឹមភតារា បានឱ្យដឹងថា លោកស្រីមានប្តីឈ្មោះពេជ ពណ្ណរាយអាយុ៥៤ឆ្នាំ មានឋានន្តរស័ក្តិជាឧត្តមសេនីយ៍ត្រី និងមានតួនាទីជានាយរងមជ្ឈមណ្ឌលស្រាវជ្រាវយុទ្ធសាស្ត្រយោធានៃអគ្គបញ្ជាការកងយោធពលខេមរភូមិន្ទ។ ប្តីលោកស្រីបានទទួលមរណភាព កាលពីថ្ងៃទី១៩ មេសា ឆ្នាំ២០១១ កន្លងទៅដោយរោគាពាធ។
ក្រោយពីប្តីលោកស្រីស្លាប់ទៅ លោកស្រីបានប្រមែប្រមូលអាវុធយុទ្ធភណ្ឌត្រៀមទុកប្រគល់ឱ្យទៅអង្គភាពវិញ ដោយលោកស្រីគិតថា រង់ចាំធ្វើបុណ្យ១០០ថ្ងៃជូនសពស្វាមីរួចរាល់សិន។ ប៉ុន្តែមកដល់ពេលនេះ បុណ្យខួប១០០ថ្ងៃ នៅមិនទាន់បានធ្វើទេ លោកស្រីគិតថា បើទុកអាវុធនោះយូរពេកទៅអាចពាក់ព័ន្ធផ្លូវច្បាប់ ទើបសម្រេចចិត្តជាមួយកូនយកទៅប្រគល់ឱ្យអង្គភាពកងរាជអាវុធហត្ថខណ្ឌ៧មករាតែម្តងទៅ។
លោកស្រីសោម ភឹមភតារា មានកូន៦នាក់ស្នាក់នៅផ្ទះលេខ១៥១E2 ផ្លូវលេខ១៦៩ សង្កាត់វាលវង់ ខណ្ឌ៧មករា រាជធានីភ្នំពេញ ។ លោកស្រីគ្មានមុខរបរអ្វីក្រៅតែពីបៀវត្សរ៍របស់ប្តីឡើយ។ លោកស្រីបានត្អូញត្អែរនៅចំពោះមុខសមត្ថកិច្ចកងរាជអាវុធហត្ថខណ្ឌថា ប្រាក់បៀវត្សរ៍ប្តីលោកស្រីក្នុងខែមិថុនាកន្លងមកនេះ ហាក់ដូចជាមានការយឺតយ៉ាវបន្តិច មកដល់ពេលនេះអង្គភាពមិនទាន់បើកឱ្យទេ ខុសពីសព្វមួយដង។
លោកវរសេនីយ៍សយ ចាន់ឌី មេបញ្ជាការកងរាជអាវុធហត្ថខណ្ឌ៧មករា បានឱ្យដឹងថា លោកស្រីសោម ភឹមភតារា ពិតជាប្រជាពលរដ្ឋល្អចេះយល់ដឹងអំពីច្បាប់។ បានជាអះអាងយ៉ាងដូច្នេះ ព្រោះនៅពេលប្តីលោកស្រីស្លាប់ទៅ លោកស្រីមានគំនិតប្រមូលអាវុធយុទ្ធភណ្ឌប្រគល់ឱ្យសមត្ថកិច្ច។
លោកសយ ចាន់ឌី បន្តថា នេះជាគំរូមួយសម្រាប់ពលរដ្ឋដ៏ទៃទៀត កាលណាមានអាវុធ និងគ្រាប់រំសេវនៅក្នុងផ្ទះ ឬប្រទះឃើញនៅទីណាមួយនោះ ត្រូវយកទៅប្រគល់ ឬរាយការណ៍ជូនទៅអង្គភាពមានសមត្ថកិច្ច។ លោកមេបញ្ជាការកងរាជអាវុធហត្ថរូបនេះ បានថ្លែងការកោតសរសើរនូវទង្វើដ៏ល្អរបស់ភរិយាលោកឧត្តមសេនីយ៍ត្រីពេជ ពណ្ណរាយ ហើយលោកបានសន្យាថា នឹងធ្វើរបាយការណ៍ជូនទៅថ្នាក់លើ ដើម្បីរកការជួយឧបត្ថម្ភជាទឹកប្រាក់សម្រាប់លើកទឹកចិត្តដល់ពលរដ្ឋល្អដូចជាលោកស្រីសោម ភឹមភតារា រូបនេះ៕
ចែករំលែកព័តមាននេះ