រាជធានីភ្នំពេញ ៖ ក្នុងខែកុម្ភៈនេះគ្រាន់តែអ្នកធ្លាក់ពីលើដើមត្នោតចូលមកព្យាបាលនៅមន្ទីរពេទ្យព្រះកុសុមៈមាន៣ករណី គឺលើកទី១- ថ្ងៃទី៩ កុម្ភៈ នៅភូមិត្រោកវែង ឃុំសែនដី ស្រុកសំរោងទង ខេត្តកំពង់ស្ពឺ លើកទី២-ថ្ងៃទី២៥ កុម្ភៈ ភូមិបឹង ឃុំព្រះខែ ស្រុកបសេដ្ឋ ខេត្តកំពង់ស្ពឺ និងលើកទី៣-នេះថ្ងៃទី២៨ កុម្ភៈ ស្ថិតនៅក្នុងភូមិព្រៃទូក ឃុំអង្កាញ់ ស្រុកទ្រាំង ខេត្តតាកែវ។
បុរសដែលធ្លាក់ពីលើដើមត្នោតទើបតែបញ្ជូនទៅដល់មន្ទីរពេទ្យព្រះកុសុមៈវេលាម៉ោងប្រមាណ៩យប់ថ្ងៃទី២៨ កុម្ភៈ មានឈ្មោះតួយ ទី អាយុ៤៩ឆ្នាំ មានស្រុកកំណើតនៅភូមិព្រៃទូក ឃុំអង្កាញ់ ស្រុកទ្រាំង ខេត្តតាកែវ ។ តាមការរៀបរាប់ពីប្រពន្ធបុរសរងគ្រោះឈ្មោះស៊ឹម នា អាយុ៤៨ឆ្នាំ បានឱ្យដឹងថា បច្ចុប្បន្នគ្រួសារគាត់មានកូន៥នាក់ ហើយប្តីរបស់គាត់ប្រកបរបរឡើងត្នោត តាំងពីអាយុ១៦ឆ្នាំ ពោលគឺឡើងត្នោតចាប់ពីរៀបការរួចមក ។ ដោយសារខែនេះត្នោតទើបនឹងផ្កា ធ្វើឱ្យគាត់ត្រូវឡើងយកទឹកផង ឡើងកៀបផ្កាផង ដូច្នេះក្នុងមួយថ្ងៃគិតជាមធ្យមគាត់ឡើងបាន១២ដើម យកមករម្ងាស់ធ្វើស្ករត្នោតបាន៥គីឡូក្រាម ក្នុង១ថ្ងៃ ប៉ុន្តែបើកៀបផ្កាបានលឿនគឺឡើងក្នុងមួយថ្ងៃរហូតដល់ជាង២០ដើមឯណោះ ការរម្ងាស់ស្ករត្នោតបានដល់ទៅ២៥គីឡូក្រាម។
ស្ត្រីជាប្រពន្ធបានបន្តថា នៅថ្ងៃទី២៤ កុម្ភៈ កន្លងមកនេះ ព្រលឹមស្រាងៗ ប្តីរបស់គាត់បានឡើងយកទឹកត្នោតពីដើមចម្ងាយពីផ្ទះ៧០០ម៉ែត្រ… ចំណែករូបគាត់យកគោទៅឱ្យស៊ីស្មៅនៅឯវាលស្រែ ស្រាប់តែវេលាម៉ោង៦និង២៥នាទីព្រឹក មានអ្នកទៅចងគោក្បែរដើមត្នោតដែលប្តីគាត់ឡើង ក៏ប្រទះឃើញធ្លាក់ រួចរត់មកប្រាប់ថា ប្តីឯងធ្លាក់ពីលើដើមត្នោតសន្លប់ហើយ ។ ក្រោយពីជួយសង្គ្រោះប្តីនៅកន្លែងកើតហេតុហើយ ក៏សម្រេចចិត្តបញ្ជូនទៅព្យាបាលបន្តនៅមន្ទីរពេទ្យព្រះកុសុមៈ ៕
ចែករំលែកព័តមាននេះ