រាជធានីភ្នំពេញ ៖ នៅវេលាម៉ោង១០ និង៤០នាទីព្រឹកថ្ងៃទី៤ កក្កដា កម្លាំងចម្រុះដែលដឹកនាំដោយលោកជាម ប៉ង នាយផ្នែករដ្ឋបាលជលផលប្ញស្សីកែវ រួមជាមួយលោកកែ វិជ្ជរ៉ា នាយសង្កាត់សែនសុខ សហការជាមួយសង្កាត់រដ្ឋបាលជលផលច្រាំងចំរេះ និងអាជ្ញាធរសង្កាត់ជ្រោយចង្វា បានបង្ក្រាបបទល្មើសជលផលក្នុងរដូវបិទនេសាទតាមបណ្តោយដងទន្លេសាប និងចាប់ដាយស្បៃមុងចាប់កូនត្រីប្រាម្សៅបាន២មាត់សរុបប្រវែង៦០ម៉ែត្រ នៅមាត់ទឹកស្ថិតក្នុងភូមិដើមគ សង្កាត់ជ្រោយចង្វា ខណ្ឌប្ញស្សីកែវ រាជធានីភ្នំពេញ ។
មន្ត្រីជលផលឱ្យដឹងថា ជនល្មើសបានលួចដាក់ដាយស្បៃមុងយកកូនត្រីក្នុងទន្លេ ពេលដែលសមត្ថកិច្ចទៅដល់ម្ចាស់ដាយបានរត់គេចខ្លួនអស់ រីឯដាយស្បៃមុង២មាត់ ត្រូវចាប់រឹបអូសដឹកយកទៅរក្សាទុកនៅផ្នែករដ្ឋបាលជលផលប្ញស្សីកែវ រង់ចាំថ្នាក់លើទៅដុតកំទេចចោល ។
លោកជាម ប៉ង ឱ្យដឹងថា លោកនឹងបន្តចាប់ទាំងយប់ទាំងថ្ងៃចំពោះបទល្មើសនេសាទខុសច្បាប់ដូចជាឆក់ត្រី ការដាក់ព្រួលស្បៃមុង អួនស្បៃមុង ដាយស្បៃមុង និងការចិញ្ចឹមត្រីឆ្តោ ត្រីចាប ដែលច្បាប់ហាមឃាត់ ហើយលោកបានសំណូមពរឱ្យអ្នកនេសាទខុសច្បាប់ទាំងឡាយ សូមបញ្ឈប់ជា បន្ទាន់ ។ បើសិនជានៅមានការនេសាទខុសច្បាប់ទៀត លោកអំពាវនាវប្រជាពលរដ្ឋជួយរាយការណ៍ឱ្យកម្លាំងមានសមត្ថកិច្ចដឹង ដើម្បីបង្ក្រាប ៕
ចែករំលែកព័តមាននេះ