ក្រុងប៉ោយប៉ែត ៖ បុរសម្នាក់បានបែកគ្រាប់ភ្នែកម្ខាងដោយសារតែរៀលកៃកាំភ្លើងខ្យល់ កាលពីវេលាម៉ោង៥និង៤០នាទីល្ងាច ថ្ងៃទី៤ កក្កដា នៅភូមិកូបធំ សង្កាត់និមិត្ត ក្រុងប៉ោយប៉ែត ក្រោយពីហុចកាំភ្លើងខ្យល់នោះឱ្យគេបាញ់មាន់យកមកធ្វើម្ហូបក្លែម ។
បុរសរងគ្រោះឈ្មោះលាវ ហេង អាយុ៤១ឆ្នាំ បានរងរបួសបែកគ្រាប់ភ្នែកខាងស្តាំ។ តាមប្រភពព័ត៌មានថា មុនពេលហេតុការណ៍កើតឡើងគឺមនុស្សមួយក្រុមមានគ្នា៤ទៅ៥នាក់ បានទៅ អង្គុយលេងនៅផ្ទះរបស់ឈ្មោះសុខ ហាន់ ភេទប្រុស អាយុ៥១ឆ្នាំ បន្ទាប់មកដោយមានភ្ញៀវច្រើនគិតចង់ផឹកស៊ីគ្មានសាច់ក្លែម ទើបម្ចាស់ផ្ទះខាងលើឱ្យកាំភ្លើងខ្យល់របស់ខ្លួនទៅឱ្យគេបាញ់មាន់យកមកធ្វើសាច់ក្លែម ។ ដំបូងឈ្មោះសុខ ហាន់ បានឱ្យកាំភ្លើងនោះទៅឈ្មោះលាវ ហេង ជាជនរងគ្រោះបាញ់មាន់ ប៉ុន្តែដោយសារឈ្មោះលាវ ហេង បាញ់មិនត្រូវក៏ហុចឱ្យទៅឈ្មោះអ៊ាប អំ ភេទប្រុស អាយុ២៦ឆ្នាំ ដែលធ្វើជាកម្មករក្រុមហ៊ុនចិនឱ្យបាញ់ម្តង ។ ខណៈហុចឱ្យនោះឈ្មោះលាវ ហេង បានហុចខាងកៃកាំភ្លើងទៅមុន ឯកាណុងបែរមកខាងខ្លួន មិនតែប៉ុណ្ណោះថែមទាំងសប់បញ្ចូលគ្រាប់រួចជាស្រេចផង លុះឈ្មោះអ៊ាប អំ ចាប់ចំកៃក៏រៀលកៃត្រូវភ្នែកឈ្មោះលាវ ហេង រហូតបែកគ្រាប់ភ្នែកម្ខាង ។
ក្រោយហេតុការណ៍កើតឡើង សាច់ញាតិបានបញ្ជូនជនរងគ្រោះទៅកាន់មន្ទីរពេទ្យមិត្តភាពកម្ពុជា-ជប៉ុន ស្រុកមង្គលបុរី ឯឈ្មោះអ៊ាប អំ ត្រូវបានសមត្ថកិច្ចប៉ូលិសប៉ុស្តិ៍សង្កាត់និមិត្ត ឃាត់ខ្លួនបញ្ជូនទៅកាន់អធិការដ្ឋាននគរបាលក្រុងប៉ោយប៉ែត ដើម្បីធ្វើកំណត់ហេតុ និងសួរនាំ។ ទោះបីជាបែបណា ជនដែលត្រូវឃាត់ខ្លួននេះ ពុំទាន់សុំការបំភ្លឺបានទេ ប៉ុន្តែរឿងរ៉ាវនេះភាគីទាំង២ បានចរចាសម្រួលគ្នាមិនប្តឹងប្តល់គ្នានោះទេ។
ការប្រើអាវុធខុសច្បាប់បើទោះបីជាកាំភ្លើងច្នៃក្តី ក៏អាចបង្កគ្រោះថ្នាក់បានដែរ ៕
ចែករំលែកព័តមាននេះ