ខេត្តកំពង់ឆ្នាំង-ពោធិ៍សាត់ ៖ កាលពីព្រឹកថ្ងៃទី៤ ខែកក្កដា នៅសាលប្រជុំសាលាខេត្តកំពង់ឆ្នាំង មានរៀបចំពិធីប្រកាសតែងតាំងនាយខណ្ឌរដ្ឋបាលជលផលកំពង់ឆ្នាំងថ្មី ក្រោមអធិបតីភាពលោកប៉ោ ទ្រី រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ លោកទូច ម៉ារីម អភិបាលខេត្តកំពង់ឆ្នាំង និងលោកណៅ ធួក ប្រធានរដ្ឋបាលជលផល និងមានការចូលរួមពីមន្ត្រីរាជការជុំវិញខេត្តជាច្រើនរូបទៀត ។
លោកណៅ ធួក បានមានប្រសាសន៍ថា លោកកែវ ថាយ អតីតនាយខណ្ឌរដ្ឋបាលជលផលកំពង់ឆ្នាំង ត្រូវបានផ្ទេរភារកិច្ចឱ្យទៅបម្រើការងារនៅរដ្ឋបាលជលផលថ្នាក់កណ្តាល និងតែងតាំងជំនួសដោយលោកសេង ប៊ុនឈឿន ជានាយរងខណ្ឌទទួលបន្ទុករួមវិញ ។ លោកបានបញ្ជាក់ថា នេះជាការផ្ទេរភារកិច្ចដែលតាមក្រឹត្យក្រមនាយខណ្ឌ នាយអធិការគឺមានកំណត់ត្រឹមតែ២ឬ៣ឆ្នាំប៉ុណ្ណោះ ត្រូវផ្ទេរដាក់អ្នកថ្មីជំនួសវិញ ។ លោកប្រធានរដ្ឋបាលជលផលក៏បានលើកឡើងនូវប្រសាសន៍របស់សម្តេចតេជោហ៊ុន សែន នាយករដ្ឋមន្ត្រីថា បើយើងលែងកូនត្រីរាប់លានក្បាលចូលក្នុងទន្លេតែគ្មានការបង្ក្រាបក៏នៅតែវិនាសដែរ ព្រោះលបឬអួន ស្បៃមុង បើយើងមិនបង្ក្រាបទេ ក្នុង១យប់វាបានចាប់បំផ្លាញកូនត្រីរាប់សិបតោនច្រើនជាងការដែលយើងលែង នោះទៀត ។ តាមគម្រោងក្នុងឆ្នាំនេះ យើងនឹងលែងកូនបង្កងឱ្យបានកន្លះលានក្បាល ។
លោកទូច ម៉ារីម អភិបាលខេត្ត មានប្រសាសន៍ថា ជាទិសដៅបន្តគឺយើងផ្សព្វផ្សាយបទបញ្ជាលេខ០១តទៅទៀតឱ្យបានជ្រាបដល់ប្រជាពលរដ្ឋ១០០% បំផុសការចូលរួមការពារធនធានជលផលពីសំណាក់ប្រជាពលរដ្ឋ ជំរុញការត្រួតពិនិត្យជាប្រចាំកុំឱ្យបទល្មើសនេសាទកើតឡើងវិញ ធ្វើការយ៉ាងម៉ឺងម៉ាត់ការបង្ក្រាបបទល្មើស នាំយកជនល្មើសមកផ្តន្ទាទោសតាមច្បាប់ ។ ចំណែកនាយរងខណ្ឌថ្មីនេះ នឹងដាក់បញ្ចូលជាមួយគណៈបញ្ជាការឯកភាពខេត្តហើយរាល់ការប្រជុំប្រចាំសប្តាហ៍ត្រូវរាយ ការណ៍ ។ លោកក៏បានសំណូមពរ ត្រូវបង្កើនសាមគ្គីភាពផ្ទៃក្នុងឱ្យបានល្អ សហការជាមួយកម្លាំងសមត្ថកិច្ចនិងអាជ្ញាធរមូលដ្ឋានឱ្យបានល្អដើម្បីបង្ក្រាបបទល្មើសនេសាទ ប្រើប្រាស់កម្លាំងតាមឋានានុក្រមឱ្យអស់លទ្ធភាព ។
លោកប៉ោ ទ្រី រដ្ឋលេខាធិការក្រសួងកសិកម្មរុក្ខា ប្រមាញ់ និងនេសាទមានប្រសាសន៍ថា ការផ្លាស់ប្តូរសម្រួលភារកិច្ច គឺជារឿងធម្មតាទេ ដើម្បីជាការដកបទពិសោធន៍ឱ្យកាន់តែល្អប្រសើរ ។ ក្រសួងកសិកម្មមានរដ្ឋបាលជលផលជាសេនាធិការក្នុងការការពារធនធានជលផលឱ្យបានគង់វង្ស និងមាននិរន្តរភាព ។
ដោយឡែកនៅខេត្តពោធិ៍សាត់ ពិធីប្រកាសចូលកាន់តំណែងនាយខណ្ឌរដ្ឋបាលជលផលពោធិ៍សាត់ថ្មី បានប្រារព្ធធ្វើនៅសាលប្រជុំសាលាខេត្តនាព្រឹកថ្ងៃទី៤ កក្កដានោះដែរក្រោមអធិបតីភាពលោកប៉ោ ទ្រី រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ ដោយមានការចូលរួមពីលោកណៅ ធួក ប្រធានរដ្ឋបាលនិងលោកខូយ សុខា អភិបាលខេត្ត ។
តាមប្រកាសលេខ៣៩០ ចុះថ្ងៃទី១ កក្កដា ២០១១ របស់ក្រសួងកសិកម្ម រុក្ខាប្រមាញ់ និងនេសាទ បានសម្រេចប្រគល់ភារកិច្ចជូនលោកផា ស្រូយ ជានាយរងខណ្ឌរដ្ឋបាលជលផលពោធិ៍សាត់ថ្មីទទួលបន្ទុករួមជំនួសលោកសេង ស៊ុនហ៊ួត ដែលត្រូវផ្ទេរភារកិច្ចឱ្យទៅបម្រើការងារនៅរដ្ឋបាលជលផលថ្នាក់កណ្តាលវិញ ។
លោកណៅ ធួក ថ្លែងថា ខណ្ឌរដ្ឋបាលជលផលជាខ្សែបណ្តោយរបស់រដ្ឋបាលជលផល ហើយស្ថិតនៅក្រោមការគ្រប់គ្រងរបស់អភិបាលខេត្តដូចជា ការចូលជាសមាជិកអភិ វឌ្ឍន៍ខេត្ត និងសមាជិកគណៈបញ្ជាការឯកភាពខេត្តជាដើម ដូចមន្ទីរឬអង្គភាពនានាដែរ ប៉ុន្តែកន្លងមកប្រហែលជាមានអ្នកយល់ខុសឬបកស្រាយខុស ទើបបណ្តាលឱ្យមានការភាន់ច្រឡំថា ខណ្ឌរដ្ឋបាលជលផលឯករាជ្យដាច់ដោយឡែកតែឯង មិនចំណុះឱ្យខេត្ត ។ ដោយសារបន្ទាន់ពេក ទើបថ្ងៃនេះយើងប្រកាសជានាយរងខណ្ឌទទួលបន្ទុករួមសិន ព្រោះត្រូវការឆ្លងមុខងារសាធារណៈទៀត ។ អង្គទូតឬអង្គការក្រៅរដ្ឋាភិបាលនានា ២ឬ៣ឆ្នាំ តែងតែធ្វើការដោះដូរទៅកន្លែងផ្សេងដើម្បីដកស្រង់បទពិសោធន៍គ្នា យ៉ាងណាមិញ នាយខណ្ឌរដ្ឋបាលជលផលយើងក៏ដូចគ្នាដែរ ។
លោកខូយ សុខា បានកោតសរសើរលោកសេង ស៊ុនហ៊ួត អតីតនាយខណ្ឌរដ្ឋបាលជលផលពោធិ៍សាត់ ដែលកន្លងមកបានចូលរួមសហការជាមួយអាជ្ញាធរ និងសមត្ថកិច្ច គ្រប់សកម្មភាពក្នុងការអភិវឌ្ឍ ការបង្ក្រាបបទល្មើស និងជួយឧបត្ថម្ភដល់កងទ័ព ប៉ុន្តែទោះជាយ៉ាងណានៅតែមានការខ្វះចន្លោះខ្លះៗ ព្រោះមន្ត្រីមានតិច ឯបទល្មើសនេសាទមានភាពស្មុគស្មាញមហាសាល ។ អ្នកត្រូវផ្លាស់ចេញ និងអ្នកចូលថ្មី សុទ្ធតែមានភារកិច្ច តាមតួនាទីរបស់ខ្លួន ក្រោមការប្រគល់ភារកិច្ចជូនរបស់រដ្ឋបាលជលផលថ្នាក់កណ្តាល។
លោកប៉ោ ទ្រី បានស្នើឱ្យលោកសេង ស៊ុនហ៊ួត នឹងនរក្នុងចិត្ត ព្រោះថាការផ្ទេរភារកិច្ចជារឿងធម្មតារបស់មន្ត្រីរាជការនៅគ្រប់ស្ថាប័ន ក្រសួង មន្ទីរ គ្មានអ្វីប្លែកទេ ជាការផ្លាស់ប្តូរបទពិសោធន៍ និងរៀនសូត្រពីគ្នាទៅវិញទៅមកដើម្បីពង្រឹងការដឹកនាំគ្រប់គ្រងឱ្យកាន់តែរីកចម្រើន។ គ្មានអ្នកណាម្នាក់ឈរជើងនៅមួយកន្លែងរហូតទេ ព្រោះជាតម្រូវការរបស់រាជរដ្ឋាភិបាល ហើយអស់លោក លោកស្រីនៅទីនេះក៏ប្រហែលមួយចំនួនធ្លាប់ផ្លាស់ប្តូរដែរ ជាក់ស្តែងដូចជារូបលោកជាដើម។ លោករដ្ឋលេខាធិការបានផ្តាំផ្ញើដល់លោកផា ស្រូយ សូមខិតខំបន្តដឹកនាំការងារលើការបង្ក្រាបបទល្មើសនេសាទឱ្យថយចុះជាលំដាប់ចាប់ពីពេលនេះតទៅ ៕
ចែករំលែកព័តមាននេះ