វិទ្យុជាតិទុយនីស៊ីរាយការណ៍ថា តុលាការមួយនៅក្នុងទីក្រុងទុយនីស រដ្ឋធានីទុយនីស៊ី កាលពីថ្ងៃទី៤ កក្កដា កន្លងមក បានសម្រេចកាត់ទោសអតីតប្រធានាធិបតីលោកហ្ស៊ីនអែល អាប៊ីឌីន បេនអាលី កំបាំងមុខ ដាក់ពន្ធនាគាររយៈពេល១៥ឆ្នាំកន្លះ ពីបទចោទប្រកាន់រកស៊ីផ្នែកគ្រឿងញៀន និងសព្វាវុធ និងរងការពិន័យប្រាក់១៤០.០០០ ដុល្លារ
វិទ្យុជាតិទុយនីស៊ីរាយការណ៍ថា តុលាការមួយនៅក្នុងទីក្រុងទុយនីស រដ្ឋធានីទុយនីស៊ី កាលពីថ្ងៃទី៤ កក្កដា កន្លងមក បានសម្រេចកាត់ទោសអតីតប្រធានាធិបតីលោកហ្ស៊ីនអែល អាប៊ីឌីន បេនអាលី កំបាំងមុខ ដាក់ពន្ធនាគាររយៈពេល១៥ឆ្នាំកន្លះ ពីបទចោទប្រកាន់រកស៊ីផ្នែកគ្រឿងញៀន និងសព្វាវុធ និងរងការពិន័យប្រាក់១៤០.០០០ ដុល្លារ អាមេរិក ។ នេះជាការកាត់ទោសលើកទី២ សម្រាប់លោកបេន អាលី ដែលក្នុងអំឡុងពេលនៃការកាត់ទោសនោះ មេធាវីរបស់លោកបានដើរចេញក្រៅបន្ទប់តុលាការ ក្រោយពីសំណើសុំពន្យារពេលកាត់ទោសរបស់ខ្លួនត្រូវបានច្រានចោល។
មុននេះអតីតមេដឹកនាំទុយនីស៊ីរូបនេះដែលចាកចេញប្រទេស ក្រោយពីមានការធ្វើបាតុកម្មអស់រយៈពេលជាច្រើនសប្តាហ៍ប្រឆាំងការកាន់អំណាចរយៈពេល២៣ឆ្នាំ របស់លោក ត្រូវបានកាត់ទោសដាក់ពន្ធនាគាររយៈពេល៣៥ឆ្នាំ និងពិន័យ៦៤លានដុល្លារអាមេរិក ពីបទចោទប្រកាន់កិបកេងប្រាក់រដ្ឋ និងពីបទរត់ពន្ធវត្ថុបុរាណ។
លោកបេន អាលី ប្រឈមមុខនឹងការចោទប្រកាន់១៨២ករណីផ្សេងទៀត ក្នុងនោះមានដូចជាអំពើមនុស្សឃាតក្រោមយុត្ថាធិការរបស់យោធា ដែលការចោទប្រកាន់នេះអាចធ្វើឱ្យលោកប្រឈមមុខនឹងទោសប្រហារជីវិត ៕
ចែករំលែកព័តមាននេះ