ខេត្តកំពង់ឆ្នាំង ៖ រថយន្តកាមរីគូទស្វិតមួយគ្រឿងបានឆេះផ្នែកម៉ាស៊ីនខាងមុខ កកើតអណ្តាតភ្លើង និងផ្សែងខ្មៅអាប់ បណ្តាលឱ្យម្ចាស់ភ័យស្លន់ស្លោ ហើយត្រូវបានម្ចាស់ស្ថានីយប្រេងឥន្ធនៈនៅជិតនោះ ទាញបំពង់ឧស្ម័នពន្លត់អគ្គិភ័យមកបាញ់ពន្លត់ទាន់ពេលវេលា ប៉ុន្តែទោះជាយ៉ាងណាម៉ាស៊ីនរថយន្ត និងថ្នាំរថយន្តបានឆេះខ្ទេចទៅហើយ។
ហេតុការណ៍នេះ បានកើតឡើងកាលពីវេលាម៉ោង៣និង៣០នាទីរសៀលថ្ងៃទី៤ កក្កដា ២០១១ នៅក្បែរចំណតរថយន្តផ្សារលើខេត្តកំពង់ឆ្នាំង។
តាមការឱ្យដឹងពីអ្នករត់តាក់ស៊ីដែលបានឃើញហេតុការណ៍នោះនិយាយថា មុនពេលកើតហេតុ ម្ចាស់រថយន្តកាមរីកាលីហ្វ័រនីញ៉ា ពណ៌កណ្តុរល្មែះ ពាក់ស្លាកលេខ ក-៨៤០៧ ភព២ ដែលមានឈ្មោះរុំ ជាអ្នករត់តាក់ស៊ី បានហៅម៉ូយ និងដាក់អីវ៉ាន់ពេញរថយន្ត ហើយបានចូលបញ្ឆេះម៉ាស៊ីន ដើម្បីចេញដំណើរ ប៉ុន្តែគ្រាន់តែដេម៉ារ័រភ្លាម ក៏ស្រាប់តែផ្ទុះឆេះចេញពីចំណុចអាគុយ បន្ទាប់មកឆេះរាលដាលពេញម៉ាស៊ីនតែម្តង។ ខណៈនោះ ម្ចាស់រថយន្ត និងអ្នកជិះបានបើកទ្វាររថយន្តរត់ចេញព្រាត សូម្បីតែតាក់ស៊ីជាង១០គ្រឿងដែលនៅក្បែរនោះក៏បើករត់ចេញអស់ដែរ ព្រោះខ្លាចរាលដាលដល់រថយន្តផ្សេងៗទៀត។ ចំណែកអ្នកដែលភ័យជាងគេនោះគឺរថយន្តប្រើហ្គាស និងអ្នកលក់ហ្គាសក្បែរនោះ ព្រោះខ្លាចផ្ទុះឆេះទៀត៕
ចែករំលែកព័តមាននេះ