ខេត្តសៀមរាប ៖ សមត្ថកិច្ចចម្រុះមួយក្រុមបានរងការចោទប្រកាន់ពីស្ដ្រីម្ចាស់កសិដ្ឋានចិញ្ចឹមមាន់យកសាច់មួយកន្លែងនៅឯជាយដែនខ្មែរ-សៀមថា បានស្ទាក់ចាប់បង្ខាំងទុករថយន្ដដឹកមាន់ស្របច្បាប់របស់គាត់យូរម៉ោងពេក បណ្ដាលឱ្យមាន់ទាំងនោះងាប់រដូករណែលមិនអាចលក់នៅទីផ្សារបាន ធ្វើឱ្យគាត់មានការខាតបង់រាប់ពាន់ដុល្លារ។ ទោះជាយ៉ាងណា ស្ដ្រីម្ចាស់កសិដ្ឋានរូបនេះមិនបានធ្វើការប្ដឹងប្ដល់ទៅតាមផ្លូវច្បាប់ប្រឆាំងទៅនឹងក្រុមសមត្ថកិច្ចចម្រុះទាំងនោះទេ គ្រាន់តែទទូចឱ្យមន្ដ្រីថ្នាក់លើជួយពិនិត្យករណីនេះផង ដើម្បីការពារផលប្រយោជន៍ប្រជាពលរដ្ឋស្លូតត្រង់។
អ្នកស្រីផុន សុភ័ណ្ឌ អាយុ៤៤ឆ្នាំ រស់នៅភូមិបាលិលេយ្យ ក្រុងប៉ោយប៉ែត ខេត្ដបន្ទាយមានជ័យ ដែលអះអាងថា ជាម្ចាស់កសិដ្ឋានចិញ្ចឹមមាន់យកសាច់នៅតំបន់ព្រំដែនខ្មែរ-សៀម បានថ្លែងប្រាប់តាមទូរសព្ទ័កាលពីព្រឹកថ្ងៃទី៤ កក្កដា ថា មាន់របស់គាត់ប្រមាណជាង៧០០ក្បាលក្នុងចំណោមមាន់យកសាច់ជាងមួយពាន់ក្បាលបានងាប់មិនអាចលក់ទៅឱ្យម៉ូយបាន បន្ទាប់ពីសមត្ថកិច្ចចម្រុះស្ទាក់ចាប់កាលពីវេលាម៉ោងជាង១រំលងអធ្រាត្រឈានចូលថ្ងៃទី៣ កក្កដាកន្លងទៅ ដោយសង្ស័យថាមាន់ទាំងនោះនាំចូលពីស្រុកសៀម និងបង្ខាំងទុករហូតដល់២៤ម៉ោង។
ស្ដ្រីដដែលបញ្ជាក់ថា កូនប្រុសរបស់គាត់បានដឹកមាន់ទាំងនោះចេញពីកសិដ្ឋានចិញ្ចឹមដែលមានច្បាប់ត្រឹមត្រូវដើម្បីយកទៅបោះដុំឱ្យម៉ូយនៅខេត្ដសៀមរាប និងរាជធានីភ្នំពេញ លុះទៅដល់ភូមិសាស្ដ្រស្រុកពួកនៃខេត្ដសៀមរាប នាវេលាម៉ោងជាង១រំលងអធ្រាត្រឈានចូលថ្ងៃទី៣ កក្កដា ក៏មានសមត្ថកិច្ចចម្រុះមួយក្រុមនោះស្ទាក់ចាប់រថយន្ដដឹកមាន់របស់គាត់ ហើយកូនប្រុសរបស់គាត់បានបង្ហាញលិខិតស្នាមទៅឱ្យសមត្ថកិច្ច ប៉ុន្ដែគេប្រាប់ថាលិខិតនោះមានភាពមិនប្រក្រតី រួចធ្វើការសម្លុតគំរាមកំហែងអូសរថយន្ដគាត់ទៅកាន់ស្នងការដ្ឋាននគរបាលខេត្ដ។
ស្ដ្រីរូបនេះបានបញ្ជាក់ទៀតថា ក្រោយពីដឹងថា គេអូសរថយន្ដទៅស្នងការដ្ឋានកូនប្រុសរបស់គាត់បានអង្វរករសមត្ថកិច្ចទាំងនោះសូមកុំឱ្យអូសរថយន្ដទៅអី ព្រោះមាន់ចិញ្ចឹមហ្នឹងវាមានអាយុតែ៤៥ថ្ងៃទេ បើទុកយូរពេកវាប្រាកដជាងាប់អស់មិនខាន តែគ្មានអ្នកណាម្នាក់ស្ដាប់ពីហេតុផលនេះសោះ។ បន្ទាប់មកគេក៏អូសរថយន្ដនោះទៅកន្លែងរក្សាទុករហូតដល់២៤ម៉ោង ទីបំផុតមាន់ចាប់ផ្ដើមងាប់រដូករណែល ហើយគ្មានអ្នកទទួលខុសត្រូវ ។
ដោយសំឡេងអួលដើមកស្ទើរនឹងទ្រហោយំ អ្នកស្រីផុន សុភ័ណ្ឌ រៀបរាប់ប្រាប់ថា មាន់ដែលសមត្ថកិច្ចចាប់នោះមានចំនួនជាងមួយពាន់ក្បាល មានតម្លៃប្រមាណមួយម៉ឺនដុល្លារ តែមានច្បាប់តែមួយពាន់ក្បាលប៉ុណ្ណោះ គឺគាត់បានដាក់លើសបន្ដិចដើម្បីទុកដោះស្រាយបាយទឹកឱ្យសមត្ថកិច្ចតាមដងផ្លូវ ហើយសមត្ថកិច្ចដែលចាប់មាន់គាត់ហ្នឹងក៏គាត់ធ្លាប់បង់លុយឱ្យមួយជើង៥ម៉ឺនរៀលដែរ តែជើងក្រោយនេះមិនបានបង់ក៏គេចាប់តែម្ដង។ ទោះបីជាបែបនេះក្ដីក៏ស្ដ្រីម្ចាស់កសិដ្ឋានរូបនេះមិនបានប្រាប់អំពីជំហរច្បាស់លាស់ណាមួយក្នុងការដាក់ពាក្យបណ្ដឹងតាមផ្លូវច្បាប់ប្រឆាំងទៅនឹងសមត្ថកិច្ចចម្រុះនៅឡើយទេ ដោយគ្រាន់តែទទូចសុំឱ្យមន្ដ្រីថ្នាក់លើជួយពិនិត្យទង្វើរបស់សមត្ថកិច្ចថ្នាក់ក្រោមទាំងនោះផង ដើម្បីកុំឱ្យពួកគាត់ប្រព្រឹត្តកំហុសឆ្គងបែបហ្នឹងតទៅទៀត។
នាព្រឹកថ្ងៃទី៤ កក្កដា នៅពេលដែលសួរថា តើសមត្ថកិច្ចមានកំហុសឆ្គងដូចការចោទប្រកាន់របស់ស្ដ្រីម្ចាស់កសិដ្ឋានខាងលើឬយ៉ាងណានោះ? លោកវរសេនីយ៍ទោ សឿន សេន ប្រធានការិយាល័យប្រឆាំងបទល្មើសសេដ្ឋកិច្ចនៃស្នងការដ្ឋាននគរបាលខេត្ដ ដែលបានដឹកនាំកម្លាំងស្ទាក់ចាប់រថយន្ដដឹកមាន់នោះបានច្រានចោលរាល់ការចោទប្រកាន់ដោយលោកបញ្ជាក់ថា សមត្ថកិច្ចបានអនុវត្ដទៅតាមនីតិវិធីត្រឹមត្រូវគ្មានការចន្លោះប្រហោងនោះទេ។
លោកបានបន្ថែមថា យើងមិនអាចស្ដាប់រឿងហេតុតែភាគីម្ខាងនោះទេ ត្រូវតែស្ដាប់ទាំងសងខាងទើបវាមានការប្រាកដប្រជាក្នុងអាជីពយើងជាអ្នកនាំព័ត៌មានទៅឱ្យសង្គម ។ មុននឹងឈានទៅដល់ការចាប់រថយន្ដដឹកមាន់នោះ យើងបានការពឹងពាក់ពីសំណាក់លោកសាន វិជ្ជាសារា៉វុធ ជាអនុប្រធានសាខាកាំកុងត្រូលខេត្ដបន្ទាយមានជ័យ ព្រោះមានការសង្ស័យថា មាន់ទាំងនោះត្រូវបានលួចនាំចូលពីប្រទេសសៀមឆ្ពោះទៅកាន់ទីផ្សារខេត្ដសៀមរាប ហើយក៏មានអនុប្រធានសាខាកាំកុងត្រូលខេត្ដមួយរូបទៀតតាមរថយន្ដដឹកមាន់នោះយ៉ាងប្រកិតទៀតផង។
លោកវរសេនីយ៍ទោ សឿន សេន បានបញ្ជាក់ថា តាមសេចក្ដីរាយការណ៍ដែលទទួលបានគឺកសិដ្ឋានរបស់ស្ដ្រីឈ្មោះផុន សុភ័ណ្ឌ នេះស្ថិតនៅតែប្រមាណជា៥០០ម៉ែត្រទៅ៦០០ម៉ែត្រពីព្រំដែនខ្មែរ-សៀមប៉ុណ្ណោះ ដែលអាចជាចំណុចសង្ស័យខ្ពស់ថា មានការលួចនាំមាន់ចឹញ្ចឹមដែលមានសារធាតុគីមីពីប្រទេសសៀមចូលមកបន្លំធ្វើជាមាន់ចិញ្ចឹមក្នុងកសិដ្ឋាននោះ។ ទន្ទឹមនោះ ដូចទាំងអស់គ្នាបានដឹងហើយថា កាលពីពេលថ្មីៗកន្លងទៅនេះនៅឯប្រទេសសៀមមានការផ្ទុះជំងឺមាន់ងាប់រាប់ម៉ឺនក្បាល ហើយក្រសួងពាណិជ្ជកម្មក៏បានចេញសេចក្ដីប្រកាសមិនអនុញ្ញាតឱ្យមានការនាំចូលមាន់ទាពីប្រទេសសៀមដែរ បើទោះជាមានច្បាប់ក្ដី ដូច្នេះក្នុងនាមជាកងកម្លាំងយើងត្រូវតែអនុវត្ដឱ្យបានជាដាច់ខាត។
លោកបានបន្ដថា យើងមិនខ្លាចទេចំពោះការប្ដឹងខណៈដែលយើងប្រតិបត្ដិការតាមនីតិវិធី ដើម្បីបម្រើប្រយោជន៍សុខុមាលភាពជូនប្រជាពលរដ្ឋ និងភ្ញៀវទេសចរ ហើយរឿងនោះបើសិនជាគាត់ចង់ប្ដឹង យើងនឹងប្ដឹងកូនគាត់ពីបទរារាំងប្រតិបត្ដិការរបស់សមត្ថកិច្ច ព្រោះនៅពេលនោះគេបានដកសោរថយន្ដមិនព្រមប្រគល់ទៅឱ្យសមត្ថកិច្ច រួចហើយនាំគ្នាអង្គុយលេងបៀរាប់ម៉ោងទាល់តែយើងសុំគោលការណ៍ពីព្រះរាជអាជា្ញ និងប្រើប្រាស់កម្លាំងអន្ដរាគមន៍បន្ថែមទើបគេព្រម ដែលនេះជាមូលហេតុ៕
ចែករំលែកព័តមាននេះ