រាជធានីភ្នំពេញ ៖ លោកឧបនាយករដ្ឋមន្ត្រីហោ ណាំហុង រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ បានមានប្រសាសន៍ថា រដ្ឋាភិបាលថៃថ្មីដែលចេញពីការបោះឆ្នោតកាលពីថ្ងៃទី៣ កក្កដា ២០១១ អាចនឹងធ្វើការដោះស្រាយបញ្ហាព្រំដែនជាមួយកម្ពុជាបាន ក្នុងនោះរួមទាំងព្រំដែនគោក និងការដោះស្រាយបញ្ហា
រាជធានីភ្នំពេញ ៖ លោកឧបនាយករដ្ឋមន្ត្រីហោ ណាំហុង រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ បានមានប្រសាសន៍ថា រដ្ឋាភិបាលថៃថ្មីដែលចេញពីការបោះឆ្នោតកាលពីថ្ងៃទី៣ កក្កដា ២០១១ អាចនឹងធ្វើការដោះស្រាយបញ្ហាព្រំដែនជាមួយកម្ពុជាបាន ក្នុងនោះរួមទាំងព្រំដែនគោក និងការដោះស្រាយបញ្ហាត្រួតស៊ីគ្នានៅតំបន់សមុទ្រ ដើម្បីឱ្យក្រុមហ៊ុននានារុករកប្រេង ។ ការថ្លែងរបស់លោកឧបនាយករដ្ឋមន្ត្រី ហោ ណាំហុង យ៉ាងដូច្នេះធ្វើឡើងក្នុងបទសម្ភាសន៍មួយជាមួយវិទ្យុបារាំងអន្តរជាតិ RFI ផ្សាយកាលពីយប់ថ្ងៃអាទិត្យ ទី៣ កក្កដា ២០១១នេះ។
គួរបញ្ជាក់ថា ការថ្លែងរបស់លោករដ្ឋមន្ត្រីការបរទេសកម្ពុជានេះផងដែរ ធ្វើឡើងបន្ទាប់ពីគណបក្សភឿថៃ បានឈ្នះឆ្នោតសមល្មមអាចបង្កើតរដ្ឋាភិបាលបានលើគណបក្សប្រជាធិបតេយ្យដឹកនាំដោយលោកអាប់ភីស៊ីត នៅក្នុងការបោះឆ្នោតកាលពីថ្ងៃទី៣ កក្កដា ២០១១ ។ លទ្ធផលក្នុងការរាប់សន្លឹកឆ្នោតទូទាំងប្រទេសថៃបានបង្ហាញថា គណបក្សភឿថៃបានទទួលអាសនៈក្នុងសភាចំនួន២៦១ ចំណែកគណបក្សប្រជាធិបតេយ្យរបស់លោកអាប់ភីស៊ីត បានចំនួន១៦២អាសនៈ ។ គួរបញ្ជាក់ថា ចំនួនអាសនៈនៅក្នុងសភាថៃទាំងអស់ចំនួន៥០០អាសនៈ មានន័យថា គណបក្សភឿថៃអាចបង្កើតរដ្ឋាភិបាលម្នាក់ឯងបាន ពីព្រោះគណបក្សនេះឈ្នះឆ្នោតលើសគណបក្សប្រជាធិបតេយ្យ៩៣អាសនៈ អាចចូលជាមួួយគណបក្សផ្សេងៗទៀតក៏បាន មិនចូលក៏បាន។
ចំណែកគណបក្សរបស់លោកអាប់ភីស៊ីត ចង់បូកជាមួយគណបក្សផ្សេងៗទៀតដើម្បីបង្កើតរដ្ឋាភិបាលក៏ទៅអត់រួចដែរ ពីព្រោះអត់គ្រប់ចំនួនអាសនៈភាគច្រើន ។ ដូច្នេះលោកស្រីយីង ឡាក់ ស៊ីណាវ៉ាត្រា ដែលជាប្អូនស្រីពៅបង្កើតរបស់អតីតនាយករដ្ឋមន្ត្រីថៃ ថាក់ស៊ីន នឹងក្លាយជានាយករដ្ឋមន្ត្រីទី២៩ និងជានាយករដ្ឋមន្ត្រីស្ត្រីលើកដំបូងក្នុងប្រទេសថៃ ៕
ចែករំលែកព័តមាននេះ