គណបក្សភឿថៃដែលស្មោះត្រង់ចំពោះអតីតនាយករដ្ឋមន្ត្រីថៃ លោកថាក់ស៊ីន ស៊ីណាវ៉ាត្រា ដណ្តើមបានជោគជ័យក្នុងការបោះឆ្នោតសភាកាលពីថ្ងៃទី៣ កក្កដា នៅថៃជាការបើកផ្លូវឱ្យនារីម្នាក់ក្លាយជាប្រមុខរដ្ឋាភិបាលថៃជាលើកដំបូងក្នុងប្រវត្តិសាស្ត្រប្រទេសនេះ។ នាយករដ្ឋមន្ត្រីលោកអាប់ភីស៊ីត វេចាជីវ៉ា បានទទួលស្គាល់បរាជ័យរបស់លោកហើយអបអរសាទរចំពោះលោកស្រីយីងឡាក់ ស៊ីណាវ៉ាត្រា ប្រមុខគណបក្សភឿថៃ ហើយជាប្អូនស្រីពៅរបស់លោកថាក់ស៊ីន។
ក្រោយការរាប់សន្លឹកឆ្នោតជិតចប់សព្វគ្រប់គណបក្សភឿថៃទទួលបានកៅអី២៦១ក្នុងចំណោមកៅអីទាំង៥០០របស់សភាទល់នឹង១៦២កៅអីសម្រាប់គណបក្សប្រជាធិបតេយ្យ។ នេះជាប្រកាសរបស់គណៈកម្មាធិការបោះឆ្នោត។
ការស្ទាបស្ទង់មតិចេញពីហិបឆ្នោតធ្វើឡើងដោយសាកលវិទ្យាល័យ SUAN DUSIT ក្រុងបាងកកមុននេះនិយាយថា គណបក្សភឿថៃអាចទទួលបានកៅអី៣១៣ក្នុងសភាទល់នឹង១៥២កៅអីសម្រាប់គណបក្សប្រជាធិបតេយ្យ។ លទ្ធផលនៃការបោះឆ្នោតនេះនៅពេលត្រូវប្រកាសជាផ្លូវការគឺជាការវាយបកមួយចំពោះវណ្ណៈដឹកនាំប្រពៃណី ដែលរួមមានពួកគ្រួសារអភិជនដែលមានទ្រព្យសម្បត្តិច្រើន ពួកឧត្តមសេនីយ៍កងទ័ព និងបណ្តាទីប្រឹក្សាព្រះបរមរាជវាំងថៃហៅពួកអាមាត្យដែលគាំទ្រលោកអាប់ភីស៊ីត។
លោកថាក់ស៊ីន ដែលរស់នៅនិរទេសឯក្រុងឌូបៃទទួលការកាត់ទោសកំបាំងមុខដាក់ពន្ធនាគារលោក២ឆ្នាំពីបទពុករលួយ ហើយជ័យជំនះរបស់ប្អូនស្រីលោកនឹងអាចសម្រួលដល់ការវិលត្រឡប់របស់លោកមកកាន់ប្រទេសថៃវិញ។
លោកស្រីយីងឡាក់ ថ្លែងថា លោកថាក់ស៊ីនបានទូរស័ព្ទសម្តែងការអបអរសាទរចំពោះរូបខ្ញុំ និងលើកទឹកចិត្តខ្ញុំ។ ខ្ញុំបានជំរាបលោកវិញថា យើងនៅមានការងារច្រើនទៀតដែលត្រូវបំពេញ៕
ចែករំលែកព័តមាននេះ