ព្រឹត្តិការណ៍ដែលអាចចាត់ទុកថា មិនមែនតែប្រជាពលរដ្ឋសៀមនោះទេ ដែលតាមដាន សូម្បីតែសាធារណជនកម្ពុជាក៏បានតាមដានយា៉ងប្រកិតជុំវិញការបោះឆ្នោតជ្រើសរើសអ្នកតំណាងរាស្ត្រសៀមនៅថ្ងៃទី៣ កក្កដា កន្លងមកនេះ ។ ខាងក្រោមនេះ គឺជាសេចក្តីរាយការណ៍ព័ត៌មាននានាទាក់ទងទៅនឹងការបោះឆ្នោតនៅប្រទេសសៀមនោះដែលបានបង្ហាញថា គណបក្សភឿថៃ នឹងឈ្នះក្នុងការបោះឆ្នោតនេះ ។ បើគេក្រឡេកមើលទៅក្រោយបន្តិច គណបក្សភឿថៃនេះគឺជាគណបក្សដែលបង្កើតឡើងក្រោយពីគណបក្សអំណាចប្រជាជនបានឈ្នះឆ្នោត ហើយគណបក្សនេះក៏បង្កើតឡើងដោយមន្ត្រីគណបក្សថៃស្រឡាញ់ថៃ ដែលដឹកនាំដោយលោកថាក់សីុន សីុណាវា៉ត្រា ដែលត្រូវបានក្រុមអាមាត្យ គឺទាហានធ្វើរដ្ឋប្រហារទម្លាក់លោកពីតំណែងនាយករដ្ឋមន្ត្រីនាឆ្នាំ២០០៦ ។ ដូច្នេះ ការឈ្នះឆ្នោតលើកនេះក៏គ្មានអ្វីប្លែកនោះទេ សម្រាប់គណបក្សភឿថៃដែលគណបក្សនេះមានបេក្ខភាពនាយករដ្ឋមន្ត្រី ជាប្អូនស្រីរបស់លោកថាក់សីុន គឺលោកស្រី យីងឡាក់ ។ ទោះបីជាបែបណាព្រឹត្តិការណ៍បោះឆ្នោតលើកនេះ ក៏ជាហេតុការណ៍ប្រវត្តិសាស្ត្រមួយក្នុងប្រទេសនេះ ដែលកំពុងតែឈានទៅរកការបែកបាក់យ៉ាងធ្ងន់ធ្ងរ ហើយក៏ជាសារមួយបង្ហាញថា នយោបាយរដ្ឋប្រហារដែលធ្លាប់តែកើតមានជារឿយៗគឺអស់ន័យហើយ និងមិនអាចទទួលយកបានសម្រាប់ឆាកនយោបាយសម័យថ្មីនេះ ។
បើលោកស្រី យីង ឡាក់ ក្លាយជានាយករដ្ឋមន្ត្រីនោះ គឺជាលើកទី១ហើយដែលប្រទេសសៀមមាននាយករដ្ឋមន្ត្រីជាស្ត្រីសម្រាប់នាយករដ្ឋមន្ត្រីទី២៩ ។
ការបោះឆ្នោតនៅថៃចាប់ផ្តើម ខណៈមានការបារម្ភពីការបង្កវិបត្តិនយោបាយថ្មីៗក្នុងប្រទេស ប្រជាជនថៃបានចេញទៅបោះឆ្នោតសភានាថ្ងៃទី៣ កក្កដា ដែលការបោះឆ្នោតនេះអាចបង្កនូវវិបត្តិនយោបាយថ្មីក្នុងប្រទេសនេះដែលកំពុងមានការបែកបាក់គ្នាយ៉ាងខ្លាំង។
ការបោះឆ្នោតនេះស្ថិតក្រោមស្រមោលរបស់អតីតនាយករដ្ឋមន្ត្រីលោកថាក់ស៊ីន ស៊ីណាវ៉ាត្រា ដែលកំពុងរស់នៅនិរទេសក្នុងទីក្រុងឌូបៃ គេចពីការកាត់ទោសដាក់គុកលោកពីរឿងចោទលោកថា ពុករលួយ ។
ការស្ទាបស្ទង់មតិចុងក្រោយទាំងឡាយបង្ហាញថា គណបក្សភឿថៃ នឹងជាអ្នកឈ្នះក្នុងការបោះឆ្នោតនេះលើគណបក្សប្រជាធិបតេយ្យរបស់នាយករដ្ឋមន្ត្រីបច្ចុប្បន្នលោកអាប់ភីស៊ីត វ៉េចាជីវ៉ា ។ ប្រការនេះអាចញ៉ាំងឱ្យមានដំណាក់កាលអស្ថិរភាពមួយ និងអាចមានរដ្ឋប្រហារយោធាមួយ ព្រោះលទ្ធិប្រជាធិបតេយ្យនៅថៃដែលបង្កើតឡើងចាប់តាំងពីឆ្នាំ១៩៣២ មក ធ្លាប់ឆ្លងកាត់រដ្ឋប្រហារចំនួន១៨លើក និងការកែប្រែរដ្ឋធម្មនុញ្ញ១៧លើកមកហើយ ។ រដ្ឋប្រហារយោធាចុងក្រោយកើតមានកាលពីឆ្នាំ២០០៦ ផ្តួលរំលំលោកថាក់ស៊ីន។
ប្រសិនបើគណបក្សភឿថៃដណ្តើមបានជ័យជំនះក្នុងការបោះឆ្នោតនេះ ហើយបង្កើតរដ្ឋាភិបាលមួយនោះ ប្អូនស្រីរបស់លោកថាក់ស៊ីន គឺលោកស្រីយីងឡាក់ ស៊ីណាវ៉ាត្រា នឹងឡើងកាន់តំណែងនាយករដ្ឋមន្ត្រី ។ ដោយពុំមានបទពិសោធន៍ខាងនយោបាយ លោកស្រីយីងឡាក់ ជានារីអ្នកជំនួញម្នាក់ ហើយក្នុងយុទ្ធនាការឃោសនាបោះឆ្នោតហាក់បង្ហាញថា លោកស្រីនឹងដណ្តើមបានជោគជ័យ។
ជាក់ស្តែងទៅ លោកថាក់ស៊ីន ជាអ្នកដឹកនាំគណបក្សពីចម្ងាយគឺពីទីក្រុងឌូបៃ ។ គណបក្សភឿថៃប្រសិនបើឈ្នះឆ្នោត នឹងប្រកាន់យកច្បាប់នៃការលើកលែងទោសមួយ ដែលអាចឱ្យលោកថាក់ស៊ីន វិលត្រឡប់ចូូលស្រុកវិញ ក៏ប៉ុន្តែការផ្តួចផ្តើមគំនិតនេះនឹងញ៉ាំងឱ្យមានភាពស្មុគស្មាញជាយថាហេតុមួយ ជាមួយគណបក្សតូចៗជាសម្ព័ន្ធមិត្ត។
ការស្ទាបស្ទង់មតិទាំងឡាយបង្ហាញថា គណបក្សភឿថៃនឹងពុំអាចដណ្តើមបានកៅអីភាគច្រើនដាច់ខាតឡើយ ។ ការស្ទង់មតិចេញពីហិបឆ្នោតថៃ ៖ បក្សភឿថៃទទួលបាន៣១៣អាសនៈ ចំណែកបក្សប្រជាធិបតេយ្យទទួលបាន១៥២អាសនៈតាមការស្ទង់មតិលើអ្នកបោះឆ្នោតរួចនៅក្នុងការបោះឆ្នោតជាតិរបស់ថៃ នាថ្ងៃទី៣ កក្កដា ចេញផ្សាយដោយបណ្តាញព័ត៌មានថៃនៅវេលារសៀលម៉ោងក្នុងប្រទេសថៃបង្ហាញថា គណបក្សភឿថៃ ទទួលបាន៣១៣អាសនៈ ក្នុងសភាមានចំនួន៥០០អាសនៈ ចំណែកគណបក្សប្រជាធិបតេយ្យរបស់លោកអាប់ភីស៊ីត ទទួលបានត្រឹមតែ១៥២អាសនៈប៉ុណ្ណោះ ដែលនេះជាលទ្ធផលជំហានដំបូងបង្ហាញថា គណបក្សភឿថៃទទួលជ័យជំនះទាំងស្រុងលើគណបក្សប្រជាធិបតេយ្យ។
ជាមួយគ្នានេះ ទាក់ទិននឹងការបោះឆ្នោតជាតិរបស់ថៃហាក់ដូចជាមិនមានផ្ទុះអំពើហិង្សាទាក់ទងនឹងដំណើរការបោះឆ្នោតនោះទេ ព្រោះក្នុងអំឡុងពេលនៃការបោះឆ្នោត ប៉ូលិសជាច្រើននាក់ត្រូវបានដាក់ពង្រាយនៅតាមស្ថានីយបោះឆ្នោតទូទាំងប្រទេសដើម្បីផ្តល់សន្តិសុខដល់អ្នកបោះឆ្នោត ដោយឡែកនៅតំបន់ព្រំដែនរវាងប្រទេសកម្ពុជា និងប្រទេសថៃក៏ពុំមានបាតុភាពអ្វីដែរ។
ការស្ទង់មតិនេះបង្ហាញថា គណបក្សភឿថៃ ទទួលជ័យជំនះភ្លូកទឹកភ្លូកដីធ្វើឱ្យលោកអាប់ភី ស៊ីត ចាញ់ងើបមុខលែងរួចតែម្តង។ តាមទីភ្នាក់ងារព័ត៌មានរ៉យទ័រថា លោកថាក់ស៊ីន ស៊ីណាវ៉ាត្រា បានអបអរសាទរចំពោះលោកស្រីយីងឡាក់ ក្រោយពីទទួលបានព័ត៌មានស្តីអំពីការស្ទង់មតិដែលបង្ហាញថា គណបក្សភឿថៃទទួលជ័យជំនះលើគណបក្សប្រជាធិបតេយ្យរបស់លោកអាប់ភីស៊ីត ភ្លូកទឹកភ្លូកដី។ ការទទួលជ័យជំនះរបស់គណបក្សភឿថៃ ធ្វើឱ្យលោកស្រីយីងឡាក់ ក្លាយជានាយករដ្ឋមន្ត្រីស្ត្រីដំបូងគេរបស់ប្រទេសថៃ ។ លទ្ធផលផ្លូវការដំបូងនឹងចេញនាវេលាម៉ោង២១។
ក្នុងការបោះឆ្នោតជាតិរបស់ថៃនេះដែរ គណបក្សដែលចូលរួមប្រកួតប្រជែង ហើយទទួលបានសំឡេងឆ្នោតគាំទ្រគឺគណបក្ស Bhumjai Thai ទទួលបាន១៣អាសនៈ គណបក្ស Chartthai Pattana ទទួលបាន១០អាសនៈ គណបក្ស Palung Chon ទទួលបាន៥អាសនៈ គណបក្ស Rak Thailand ទទួលបាន៣អាសនៈ គណបក្ស Chart Pattana Padin ទទួលបាន២អាសនៈ គណបក្ស Matubhum ទទួលបាន១អាសនៈ និងគណបក្ស Rak Santi ទទួលបាន១អាសនៈ ។
ការបោះឆ្នោតសៀម ៖ គណបក្សភឿថៃសង្ឃឹមថា នឹងទទួលបាន៣០០អាសនៈក្នុងសភា ការបោះឆ្នោតជាតិរបស់ប្រទេសថៃ បានចាប់ផ្តើមកាលពីព្រឹកថ្ងៃទី៣ កក្កដា ដោយតាមការប៉ាន់ស្មានជំហានដំបូងថា មានអ្នកមានសិទ្ធិបោះឆ្នោតជាង៧០ភាគរយ បានចេញទៅបោះឆ្នោត ។ ពុំទាន់មានលទ្ធផលជំហានដំបូងនៅឡើយទេ ទាក់ទិននឹងការបោះឆ្នោតនេះគិតត្រឹមវេលារសៀលថ្ងៃទី៣ កក្កដា ប៉ុន្តែសមាជិកគណបក្សភឿថៃមួយរូប លោក Sanoh Thienthong មានជំនឿថា គណបក្សរបស់លោកនឹងទទួលបានយ៉ាងហោចណាស់៣០០អាសនៈ ក្នុងសភា ហើយធានាបានភាពស្របច្បាប់ដើម្បីបង្កើតរដ្ឋាភិបាលថ្មីមួយ ។
លោក Sanoh ថ្លែងបែបនេះ ក្រោយពីលោកទៅបោះឆ្នោតនៅស្ថានីយបោះឆ្នោតលេខ៦ នៅសាលាមត្តេយ្យ Sriwatthana ក្នុងស្រុក Wathana Nakhon ខេត្តស្រះកែវ។
លោក Yongyuth Wichaidit ជាមេដឹកនាំគណបក្សភឿថៃ ថ្លែងថា ប្រសិនបើគណបក្សរបស់លោកឈ្នះឆ្នោតរដ្ឋាភិបាថ្មីមួយនឹងត្រូវបង្កើតក្នុងរយៈពេលមួយខែ ។ លោក Yong yuth ថ្លែងទៀតថា លោកមានជំនឿថា ក្នុងការបោះឆ្នោតជាតិនេះមានអ្នកមានសិទ្ធិបោះឆ្នោតជាង៧០ភាគរយ បានចេញទៅបោះឆ្នោត ហើយលោកមានផែនការតាមដានលទ្ធផលនៃការបោះឆ្នោតនៅទីស្នាក់ការគណបក្សរបស់លោកនាវេលារសៀល។ លោកថ្លែងដូច្នេះក្រោយពីលោកបោះឆ្នោតនៅស្ថានីយបោះឆ្នោតលេខ១១៤ ក្នុងស្រុក Bangyikan ទីក្រុងបាងកក ។ លោកស៊ូថេប ធឿកស៊ូបាន់ ឧបនាយករដ្ឋមន្ត្រីចាំផ្ទះទៅបោះឆ្នោតនៅស្ថានីយបោះឆ្នោតលេខ២ ក្នុងសាលា Ban Bor Krang ក្នុងស្រុក Punpin ខេត្តស៊ូរ៉ាត់ ថានី ប៉ុន្តែលោកស៊ូថេប មិនបានលើកឡើងថា គណបក្សប្រជាធិបតេយ្យរបស់លោកនឹងទទួលបានប៉ុន្មានអាសនៈនោះទេ។
លោកស្រីយីងឡាក់ ស៊ីណាវ៉ាត្រា បេក្ខនារីនាយករដ្ឋមន្ត្រីរបស់គណបក្សភឿថៃ ទៅបោះឆ្នោតនៅស្ថានីយបោះឆ្នោតលេខ៣២ ស្ថិតនៅក្នុងសាលារៀនមួយក្នុងទីក្រុងបាងកក ។ លោកប្រាវីត វង់សុវ៉ាន់ រដ្ឋមន្ត្រីក្រសួងការពារប្រទេសទៅបោះឆ្នោតនៅស្ថានីយបោះឆ្នោតលេខ១១ ក្នុងទីក្រុងបាងកក ។ ចំណែកលោកអាប់ភីស៊ីត វ៉េចាជីវ៉ា ជានាយករដ្ឋមន្ត្រីចាំផ្ទះ បោះឆ្នោតនៅស្ថានីយបោះឆ្នោតលេខ៤ ក្នុងទីក្រុងបាងកក ។
លោកថាក់ស៊ីន ៖ ការឈ្នះឆ្នោតរបស់បក្សភឿថៃ នឹងនាំមកនូវការផ្សះផ្សាគ្នា លោកថាក់ស៊ីន ស៊ីណាវ៉ាត្រា អតីតនាយករដ្ឋមន្ត្រីដែលមានប្រជាប្រិយភាពថ្លែងថា ការបោះឆ្នោតឱ្យគណបក្សភឿថៃ ឆ្លុះបញ្ចាំងពីឆន្ទៈរបស់ពលរដ្ឋដែលគាំទ្រការផ្សះផ្សាគ្នា។ លោកថាក់ស៊ីន ថ្លែងបែបនេះក្នុងបទសម្ភាសន៍តាមទូរស័ព្ទមួយចាក់ផ្សាយដោយបណ្តាញព័ត៌មានថៃរយៈពេលមួយម៉ោងក្រោយពីការបោះឆ្នោតត្រូវបញ្ចប់។
លោកអតីតនាយករដ្ឋមន្ត្រីថ្លែងថា បក្សភឿថៃគឺច្បាស់ណាស់ក្នុងការស្វះស្វែងរកមធ្យោបាយផ្សះផ្សាគ្នា ហើយលោកថ្លែងថា លោកនឹងមិនវិលត្រឡប់មកប្រទេសវិញឡើយ ប្រសិនបើការវិលត្រឡប់របស់លោកបង្កឱ្យមានបញ្ហាក្នុងប្រទេស។ លោកថាក់ស៊ីន ថ្លែងថា «ខ្ញុំមិនចាំបាច់វិលត្រឡប់ចូលស្រុកឡើយ ពីព្រោះខ្ញុំមិនចង់បង្កបញ្ហាក្នុងប្រទេសទៀតទេ»។
ដោយឡែកនៅល្ងាចថ្ងៃទី៣ កក្កដា លោកអាប់ភីស៊ីត ថ្លែងទៅកាន់អ្នកគាំទ្រលោកដែលប្រមូលផ្តុំគ្នានៅទីស្នាក់ការគណបក្សប្រជាធិបតេយ្យ ដោយថ្លែងអំណរគុណដល់អ្នកដែលបានបោះឆ្នោតគាំទ្រលោក។
លោកអាប់ភីស៊ីត ថ្លែងថា ទោះបីជាបែបណាពេលនេះលោកនៅរង់ចាំលទ្ធផលបោះឆ្នោតជាផ្លូវការទៀត។ ស្ថានទូតនានាក្រើនរំលឹកពលរដ្ឋរបស់ខ្លួនគេចពីទីប្រជុំនយោបាយ AFP ផ្សាយថា បណ្តាស្ថានទូតនានានៅក្នុងប្រទេសថៃបានក្រើនរំលឹកដល់ភ្ញៀវទេសចរ ត្រូវប្រុងប្រយ័ត្ន និងគេចពីទីប្រជុំជនផ្នែកនយោបាយនៅក្នុងថ្ងៃទី៣ កក្កដា ជាថ្ងៃដែលប្រទេសថៃបោះឆ្នោតជាលើកដំបូង ក្រោយពីកើតហេតុប្រឆាំងនឹងរដ្ឋាភិបាលឈានឆ្ពោះទៅរកការបង្ហូរឈាមកាលពីឆ្នាំ២០១០មក ។
ស្ថានទូតអូស្ត្រាលី និងអង់គ្លេស ប្រកាសថា «មានតំរុយនឹងកើតចលាចល ឬអំពើហិង្សាក្នុងអំឡុងពេលបោះឆ្នោត និងបង្កើតរដ្ឋាភិបាល ថ្មី» ។ ស្របពេលជាមួយគ្នានេះ នៅលើវ៉េបសាយស្ថានទូតអង់គ្លេសបានប្រកាសអាសន្នដល់ពលរដ្ឋប្រុងប្រយ័ត្ន ព្រោះថាស្ថានការណ៍នយោ បាយថៃអាចឈានឆ្ពោះទៅរកហេតុការណ៍ចលាចល។
ក្រៅពីនេះប្រទេសផ្សេងៗទៀតក៏បានប្រកាសដាស់តឿនដល់ប្រជាជនខ្លួនដូចជា កាណាដា អៀរឡង់ ជប៉ុន និងហូឡង់ថា«បណ្តាភ្ញៀវទេសចរគួរចាកចេញពីការដើរក្នុងក្បួនបាតុកម្ម ដើម្បីសុវត្ថិភាពផ្ទាល់ខ្លួន»។ រដ្ឋមន្ត្រីក្រសួងការពារជាតិថៃថាឈប់និយាយពីរដ្ឋប្រហារ លោកឧត្តមសេនីយ៍ប្រាវីត វង្សសុវណ្ណ រដ្ឋមន្ត្រីក្រសួងការពារជាតិ បានធ្វើដំណើរទៅបោះឆ្នោត នៅឯមណ្ឌលបោះឆ្នោតទី១១ ដោយបានអំពាវនាវឱ្យប្រជាជនប្រើសិទ្ធិបោះឆ្នោតឱ្យបានគ្រប់គ្នា ។ លោកឧត្តមសេនីយ៍រូបនេះនិយាយថា លោកមានការត្រេកអរដែលប្រជាជនទៅចូលរួមបោះឆ្នោត ព្រោះថា ប្រសិនបើប្រជាជនគ្រប់រូបប្រើសិទ្ធិ នឹងធ្វើឱ្យមានភាពប្រាកដប្រជាថា ស្រុកទេសនឹងដំណើរការទៅតាមទិសដៅដ៏ជាក់លាក់ ។
លោកបន្តទៀតថា «សូមប្រជាជនឈប់និយាយពីការធ្វើរដ្ឋប្រហារ និងកុំអូសទាញទាហានចូលទៅពាក់ព័ន្ធក្នុងរឿងនយោបាយ ព្រោះទ័ពមានតួនាទីក្នុងការការពារសន្តិសុខ និងប្រទេសជាតិ »។
ថ្ងៃបោះឆ្នោតនៅប្រទេសសៀម ច្រកទ្វារអន្តរជាតិប៉ោយប៉ែត ភ្ញៀវជាតិ-អន្តរជាតិឆ្លងទៅមកធម្មតា ឯច្រកតំបន់អូរបីជាន់សៀមបិទ
ក្រុងប៉ោយប៉ែត ៖ ស្របពេលដែលការបោះឆ្នោតនៅប្រទេសសៀមបានចូលមកដល់សម្រាប់ថ្ងៃទី៣ កក្កដា ភ្ញៀវជាតិ និងអន្តរជាតិ ពិសេសទាំងកម្មករ និងអាជីវករចេញចូលទៅរកស៊ីនៅផ្សាររុងក្លឿ ក្នុងស្រុកអារញ្ញនៃខេត្តស្រះកែវ មានលក្ខណៈធម្មតាគ្មានអ្វីកើតឡើងទេ។ ដោយឡែកច្រករបៀងតាមបន្ទាត់ព្រំដែនក៏បើកឱ្យដំណើរការធម្មតាលើកលែងតែច្រកអូរបីជាន់ត្រូវភាគីសៀមបិទមិនឱ្យឆ្លងទៅមករហូតម៉ោង៥ល្ងាចទើបបើកឱ្យដំណើរការវិញ។
សម្រាប់ការចេញចូលរបស់ភ្ញៀវជាតិ និងអន្តរជាតិ ពិសេសកម្មករ និងអាជីវករនៅព្រឹកថ្ងៃទី៣ កក្កដា គេឃើញមានឆ្លងទៅមកក្នុងលក្ខណៈធម្មតា ។ ចំណែកទំនិញបន្លែ ត្រី សាច់ ត្រូវកម្មករអូសចេញចូលទៅមកទឹកដីសៀមធម្មតា ឯភ្ញៀវទេសចរបរទេសក៏ដូច្នេះដែរគេឃើញមានចូលមកកម្ពុជាដូចសព្វមួយដង។ តាមចំនួនទិន្នន័យភ្ញៀវទេសចរបរទេស ដែលចូលមកកម្ពុជាតាមច្រកទ្វារអន្តរជាតិប៉ោយប៉ែតនៅថ្ងៃទី៣ កក្កដា មានចំនួន១៨៨នាក់ គឺច្រើនជាងថ្ងៃទី២ កក្កដា ទៅទៀតដែលមានត្រឹមតែ១១១នាក់ប៉ុណ្ណោះ។
ដោយឡែកច្រកមួយចំនួនក្នុងស្រុកអូរជ្រៅ និងស្វាយចេក និងស្រុកថ្មពួក ច្រកតំបន់បឹងត្រកួនស្ថិតក្នុងស្រុកថ្មពួកត្រូវបានលោកប្រាក់ សាំ មេប៉ុស្តិ៍ប៉ូលិសការពារព្រំដែនគោកលេខ៨០៧នៅច្រកតំបន់បឹងត្រកួនប្រាប់តាមទូរស័ព្ទថា មានសភាពធម្មតា ប្រជាពលរដ្ឋនៃប្រទេសទាំង២បានឆ្លងទៅមក ឯច្រករបៀងអូរបីជាន់ត្រូវបានមន្ត្រីយោធានៅទីនោះប្រាប់តាមទូរស័ព្ទថា ត្រូវភាគីសៀមតម្រូវឱ្យបិទរហូតម៉ោង៥ល្ងាចទើបបើកវិញដោយគេប្រាប់ថា បិទសម្រាប់ការបោះឆ្នោត ឯច្រកភូមិជោគជ័យចំណុចបង្គោលឡាក់លេខ៤៦ត្រូវបានមន្ត្រីយោធាប្រាប់តាមទូរស័ព្ទថា មានលក្ខណៈធម្មតា ដោយពុំមានការបិទច្រកនោះទេ ។ច្រករបៀងទំនប់ដាច់ក៏ដូច្នោះដែរ ត្រូវបានលោកកែវ ណារិន មន្ត្រីយោធាកងការពារព្រំដែនគោកលេខ៥០៣ប្រាប់តាមទូរស័ព្ទថា ពុំមានការបិទច្រកទេ។
តាមសេចក្តីរាយការណ៍ពីខេត្តឧត្តរមានជ័យវិញដែលមានច្រកអន្តរជាតិ២ គឺច្រកអូរស្មាច់ និងច្រកជាំមិនមានការបិទ ឬផ្អាកសកម្មភាពទេ គឺមានការបើកទ្វារចេញចូលជាធម្មតា។ ដោយឡែកនៅខេត្តកោះកុងដែលមានច្រកអន្តរជាតិចាំយាមបានរាយការណ៍ថា ច្រកទ្វារមិនបានបិទទេ តែនៅវេលាព្រឹកស្ងាត់ នៅវេលារសៀលមានសភាពធម្មតា។ ចំណែកនៅខេត្តព្រះវិហារដែលពេលនេះមានតែច្រកអានសេះមួយនោះ គឺមានសកម្មភាពជាធម្មតា និងមិនមានអ្វីគួរឱ្យកត់សម្គាល់នោះឡើយ ៕
ចែករំលែកព័តមាននេះ