រាជធានីភ្នំពេញ ៖ អំណោយជាវង់ភ្លេងបុរាណមួយកំប្លេ និងថវិកាចំនួន៧.៦៩៩ដុល្លារ របស់សប្បុរសជនខ្មែរនៅអាមេរិក គឺលោកសាស្ត្រាចារ្យបណ្ឌិតដាំ ច្ឆ័ត្ររីយ៍ ប្រធានក្រុមប្រឹក្សាភិបាលមូលនិធិមនុស្សធម៌ អូ អាយ ធី ស៊ី អង្គរ (OITC Humanitarian Angkor Foun-dation) និងជាប្រធានក្រុមប្រឹក្សាអ្នកច្បាប់ប្រចាំសហព័ន្ធមូលនិធិអូ អាយ ធី ស៊ី អន្តរជាតិ តាមរយៈលោកជំទាវហូ សុវណ្ណ ជំនួយការផ្ទាល់របស់លោកសាស្ត្រាចារ្យបណ្ឌិតដាំ ច្ឆ័ត្ររីយ៍ ត្រូវបានថ្វាយសម្តេចព្រះអគ្គមហាសង្ឃរាជាធិបតីទេព វង្ស សម្តេចព្រះមហាសង្ឃរាជគណៈមហានិកាយនៃព្រះរាជាណាចក្រកម្ពុជា នៅព្រះវិហារវត្តឧណ្ណាលោម កាលពីថ្ងៃទី១ តុលា ឆ្នាំ២០១០ ។
សម្តេចព្រះមហាសង្ឃរាជទេព វង្ស បានសព្វព្រះរាជហឫទ័យ ប្រទានព្រះរាជអំណោយថវិកា និងឧបករណ៍ភ្លេងបុរាណនេះដល់មជ្ឈមណ្ឌលពិភពនៃក្តីសង្ឃឹមខេត្តបាត់ដំបង ក្នុងគោលបំណងជួយដល់ជនរងគ្រោះដោយសារគ្រឿងញៀន ។ សម្តេចព្រះមហាសង្ឃរាជទេព វង្ស មានព្រះរាជបន្ទូលថា ថវិកាជាអំណោយដ៏ថ្លៃថ្លានេះនឹងចូលរួមចំណែកយ៉ាងសំខាន់សំរាប់ជួយដល់យុវជន ដែលកំពុងរងគ្រោះដោយសារគ្រឿងញៀន ។ ចំណែកឧបករណ៍ភ្លេងខ្មែរមួយឈុតនេះក៏មានសារសំខាន់ខ្លាំងណាស់ដែរ ដែលអាចជួយពួកគេឱ្យចេះលេងប្រគំ និងក្លាយជារបរអាជីពសំរាប់ជីវិត ។ ម្យ៉ាងទៀតការហ្វឹកហាត់ភ្លេងបុរាណនេះ ក៏មានប្រយោជន៍ក្នុងការអភិរក្សវប្បធម៌ភ្លេងបុរាណខ្មែរឱ្យនៅគង់វង្សផងដែរ ។
ព្រះគ្រូធម្មសត្ថាចារ្យឈិត សំណាង ជំនួយការសម្តេចព្រះមហាសង្ឃរាជទេព វង្ស និងជាប្រធានឧត្តមក្រុមប្រឹក្សាផ្នែកសាសនា និងជានាយកប្រតិបត្តិមូលនិធិមនុស្សធម៌ អូ អាយ ធី ស៊ី អង្គរបានមានថេរដីកាឱ្យដឹងថា លោកសាស្ត្រាចារ្យបណ្ឌិតដាំ ច្ឆ័ត្ររីយ៍ គឺជាអតីតជំនួយការពិសេសរបស់ប្រធានាធិបតីអាមេរិក លោកចច ដាប់ប៊ែលយូប៊ូស បច្ចុប្បន្នជាសមាជិកឧត្តមក្រុមប្រឹក្សាពិសេសកែទំរង់សេដ្ឋកិច្ចរបស់ប្រធានាធិបតីសហរដ្ឋអាមេរិក លោកបារ៉ាក់ អូបាម៉ា ។
លោកដាំ ច្ឆ័ត្ររីយ៍ បានបង្កើតមូលនិធិ OITC និងបានជួយដល់ប្រទេសកម្ពុជាអស់ថវិកាមិនក្រោម១លានដុល្លារទេ ។ មូលនិធិរបស់លោកដាំ ច្ឆ័ត្ររីយ៍ បានកសាងមន្ទីរពេទ្យព្រះសង្ឃឈ្មោះមន្ទីរពេទ្យសម្តេចព្រះសង្ឃរាជ នៅខេត្តបន្ទាយមានជ័យ កសាងសាកលវិទ្យាល័យព្រះសង្ឃនៅខេត្តបន្ទាយមានជ័យ និងមជ្ឈមណ្ឌលវប្បធម៌ព្រះពុទ្ធសាសនានៅខេត្តសៀមរាប ។ ក្រៅពីនេះ មូលនិធិនេះ បានជួយដល់យុវជនរងគ្រោះដោយសារគ្រឿងញៀន ជួយបណ្តុះបណ្តាលដល់កុមារកំព្រា និងចាស់ជរា ពិសេសគឺជួយលើផ្នែកព្រះពុទ្ធសាសនានៅក្នុងប្រទេសកម្ពុជា ៕
ចែករំលែកព័តមាននេះ