ក្រុងប៉ោយប៉ែត ៖ នៅច្រកទ្វារអន្តរជាតិប៉ោយប៉ែតសំរាប់ថ្ងៃទី៣០ មិថុនា គេសង្កេតឃើញរថយន្តដឹកទំនិញចេញពីប្រទេសសៀមចូលមកកម្ពុជាហាក់ មានចំនួនច្រើនខុសសព្វមួយដង ដោយគេឃើញរថយន្តចេញមកជាបន្តបន្ទាប់រហូតដល់ល្ងាច ខណៈដែលចំនួនពលករខុសច្បាប់ដែលធ្លាប់តែសៀមចាប់បញ្ជូនមកកម្ពុជា វិញរាប់រយ
ក្រុងប៉ោយប៉ែត ៖ នៅច្រកទ្វារអន្តរជាតិប៉ោយប៉ែតសំរាប់ថ្ងៃទី៣០ មិថុនា គេសង្កេតឃើញរថយន្តដឹកទំនិញចេញពីប្រទេសសៀមចូលមកកម្ពុជាហាក់មានចំនួនច្រើនខុសសព្វមួយដង ដោយគេឃើញរថយន្តចេញមកជាបន្តបន្ទាប់រហូតដល់ល្ងាច ខណៈដែលចំនួនពលករខុសច្បាប់ដែលធ្លាប់តែសៀមចាប់បញ្ជូនមកកម្ពុជាវិញរាប់រយនាក់បែរជាមានចំនួនតិចខុសសព្វមួយដងដោយគិតត្រឹមម៉ោង៥ល្ងាច ថ្ងៃទី៣០ មិថុនា មានត្រឹមតែចំនួន៣០នាក់ប៉ុណ្ណោះ។
មន្ត្រីឈរជើងនៅច្រកទ្វារប្រាប់ថា រថយន្តដឹកទំនិញចេញពីទឹកដីសៀមចូលមកច្រើនខុសប្លែកពីធម្មតាមែន។ កន្លងមកមានការចេញ ចូលដែរ ប៉ុន្តែមិនមែនហូរហែបន្តបន្ទាប់ដូចថ្ងៃទី៣០ មិថុនាទេ ។ ដោយឡែកពលករដែលត្រូវភាគីសៀមចាប់បញ្ជូនមកកម្ពុជាតាមច្រកទ្វារអន្តរជាតិប៉ោយប៉ែតវិញត្រូវគេកត់សំគាល់ថា មានការថយចុះច្រើនខុសពីសព្វមួយដង គឺមានត្រឹមតែ៣០នាក់ប៉ុណ្ណោះ នេះបើគិតត្រឹមម៉ោង៥ល្ងាចថ្ងៃដដែល។
អ្នកចាំដូរលុយក៏ដូចជាអ្នករត់តាក់ស៊ីនៅចំណតមួយក្បែរស្នាក់ការប៉ូលិសអន្តោប្រវេសន៍និយាយថា ថ្ងៃទី៣០ មិថុនា ពលករពុំសូវមានទេ គឺខុសពីសព្វមួយដងដែលពលករយ៉ាងហោចណាស់ក៏មានជាង១០០នាក់ដែរក្នុងមួយថ្ងៃៗ ឯថ្ងៃខ្លះរហូតពី៤០០ទៅ៥០០នាក់ឯណោះ។ លោកលាក់ រម្មនា ប្រធានសេនាធិការប៉ូលិសអន្តោប្រវេសន៍ច្រកទ្វារអន្តរជាតិប៉ោយប៉ែតបានទទួលស្គាល់ថា ចំនួនពលករដែលទទួលពីភាគីសៀមមានចំនួនតិចបំផុតថ្ងៃទី៣០ មិថុនា ។
ពលករខុសច្បាប់ដែលឆ្លងដែនទៅដីសៀមមុនពេលសភាពការណ៍ព្រំដែនពុំទាន់រឹតបន្តឹង ឬតានតឹងត្រូវបានបញ្ជូនមកច្រើនក្នុងមួយថ្ងៃៗ លុះដល់បញ្ហាព្រំដែនមានការតានតឹងដោយកំលាំងជួរមុខនៃប្រទេសទាំង២ប្រុងប្រយ័ត្នខ្ពស់នោះ ចំនួនពលករ២ថ្ងៃកន្លងមកធ្លាក់ចុះច្រើន។ ដោយឡែកចំនួនភ្ញៀវទេសចរបរទេសចេញចូលកម្ពុជាមានលក្ខណៈធម្មតាសំរាប់ថ្ងៃទី៣០ មិថុនា គឺមានចំនួន១៦៤នាក់ ៕
ចែករំលែកព័តមាននេះ