ខេត្តកណ្តាល ៖ កាលពីព្រឹកថ្ងៃទី៣០ មិថុនា ម្ចាស់អាជីវកម្មឡូត៍នេសាទលេខ១១ លោកឧកញ៉ា ឡូវ ហ៊ឹង បានរៀបចំពិធីលែងត្រីពូជគ្រប់ប្រភេទជាង២០តោន និងដាំកូនឈើប្រភេទព្រៃលិចទឹកជាង៥ពាន់ដើម ដើម្បីធ្វើការអភិវឌ្ឍក្នុងឡូត៍នេសាទ ។ ពិធីនេះប្រារព្ធធ្វើឡើងនៅក្នុងដែនឡូត៍លេខ១១ ស្ថិតនៅក្នុងឃុំព្រែកជ្រៃ ស្រុកកោះធំ ក្រោមអធិបតីភាពលោកឈុន ស៊ីរុន អភិបាលខេត្ត និងមានការអញ្ជើញចូលរួមពីមន្ត្រីជលផល កងកម្លាំងប្រដាប់អាវុធ មន្ត្រីរាជការ និងប្រជាពលរដ្ឋយ៉ាងច្រើនកុះករ។
លោកឧកញ៉ាឡូវ ហ៊ឹង ម្ចាស់អាជីវកម្មឡូត៍នេសាទលេខ១១ មានប្រសាសន៍ថា ដោយអនុ វត្តតាមសារាចរលេខ០០១ របស់រាជរដ្ឋាភិបាល ក៏ដូចជាអនុវត្តតាមបទបញ្ជារបស់ក្រសួងកសិកម្មរុក្ខាប្រមាញ់ និងនេសាទ ក្នុងនាមលោកជាម្ចាស់អាជីវកម្មឡូត៍តែងតែអនុវត្តតាម និងខិតខំអភិវឌ្ឍន៍ឡូត៍នេសាទជារៀងរាល់ឆ្នាំ ដើម្បីបង្កើនទិន្នផលនេសាទ និងបានខិតខំបំផុសប្រជាពលរដ្ឋកុំឱ្យប្រើប្រាស់ឧបករណ៍នេសាទខុសច្បាប់។
ជាក់ស្តែងក្នុងថ្ងៃនេះ យើងប្រារព្ធពិធីនេះដោយមានដុតបំផ្លាញឧបករណ៍នេសាទខុសច្បាប់ដូចជាស្បៃមុង និងឧបករណ៍ឆក់ត្រីជាដើម ។ លោកបានបន្តទៀតថា ត្រីពូជ ដែលត្រូវលែងនាពេលនេះ មានជាង២០តោន ក្នុងនោះមានកូនត្រីកន្ធរ ១៤៤.០០០ក្បាល ត្រីរ៉ស់ ៥០០គីឡូក្រាម ត្រីប្រា ត្រីក្រាយ ត្រីកាប និងត្រីសណ្តាយ៤០០គីឡូក្រាម។ ជាមួយគ្នានេះ កូនឈើប្រភេទព្រៃលិចទឹក មានកូនរាំង ក្តុល សណ្តាន់ ត្រស់ និងកូនប្ញស្សី សរុបចំនួន៥.៤០០ដើម ក៏ត្រូវបានដាំបន្ថែមដើម្បីជាជម្រកសម្រាប់ត្រីពងកូនដែរ ។ កន្លងមកនៅក្នុងដែនឡូត៍លេខ១១នេះ នៅចំណុចខ្លះមានមមោក ល្បាប់គរច្រើន ធ្វើឱ្យទឹករាក់ ហើយយើងក៏បានបូមស្តារ ឱ្យជ្រៅឡើងវិញ កុំឱ្យទឹកគោកបាត់បង់ពូជត្រី នៅក្នុងដែនឡូត៍ ។ លោកបានសំណូមពរដល់ប្រជាពលរដ្ឋ សូមកុំឱ្យប្រើប្រាស់ឧបករណ៍នេសាទខុសច្បាប់ និងជួយថែរក្សាពូជត្រី និងកូនឈើដែលបានលែង និងដាំថ្ងៃនេះឱ្យបានគង់វង្ស ។
មានប្រសាសន៍សំណេះសំណាលនាឱកាសនោះដែរ លោកឈុន ស៊ីរុន អភិបាលខេត្តបានថ្លែងថា ត្រីជាអាហារមួយសំខាន់របស់ប្រជាពលរដ្ឋខ្មែរយើងមិនអាចខ្វះបាន ដូចនេះក្នុងនាមលោកជាអភិបាលខេត្ត លោកតែងតែដឹកនាំកម្លាំងសមត្ថកិច្ច និងសមត្ថកិច្ចជំនាញជលផលធ្វើការទប់ស្កាត់រាល់បទល្មើសនេសាទខុសច្បាប់ និងបានជំរុញឱ្យសមត្ថកិច្ចជំនាញចុះធ្វើការពន្យល់ណែនាំដល់ប្រជាពលរដ្ឋកុំឱ្យប្រើប្រាស់ឧបករណ៍នេសាទខុសច្បាប់ ។ លោកមានប្រសាសន៍ទៀតថា នៅទូទាំងខេត្តកណ្តាល ឡូត៍ នេសាទដែលសំបូរត្រីច្រើនជាងគេ គឺឡូត៍លេខ ១១នេះ ។
លោកឈុន ស៊ីរុន បានរំលឹកថា កាលពីឆ្នាំ១៩៩៣ លោកនៅជាអភិបាលរងខេត្តកណ្តាលនៅក្នុងឡូត៍លេខ១០ និងឡូត៍លេខ១ គឺមានតែដើមក្តុលមួយដើមគត់ដែលធំ ។ រហូតមកដល់បច្ចុប្បន្ននេះ យើងសង្កេតឃើញថា មានដើមឈើប្រភេទព្រៃលិចទឹកច្រើនគួរឱ្យកត់សម្គាល់ ។ លោកបានក្រើនរំលឹកដល់ប្រជាពលរដ្ឋ ក៏ដូចជាម្ចាស់អាជីវកម្មឡូត៍នេសាទ ត្រូវខិតខំថែរក្សាព្រៃលិចទឹក និងដាំឱ្យបានច្រើនទៀតសម្រាប់ត្រីពងកូនទៅថ្ងៃអនាគត ដើម្បីបង្កើនទិន្នផលត្រីដែលជាអាហាររបស់ខ្មែរមិនអាចខ្វះបាន ៕
ចែករំលែកព័តមាននេះ