នាងលីនសេ ឡូហាន ដែជាតារាភាពយន្តហូលីវូដល្បីឈ្មោះ ហើយមានរឿងអាស្រូវច្រើនបំផុតទាក់ទងនឹងការប្រើប្រាស់គ្រឿងញៀន និងគ្រឿងស្រវឹងនេះត្រូវបានតុលាការដោះលែងពីការឃុំខ្លួនក្នុងផ្ទះឱ្យមានសេរីភាពវិញ ហើយ កាលពីព្រឹកថ្ងៃទី៣០ មិថុនា ក្រោយពីនាងត្រូវឃុំខ្លួនក្នុងផ្ទះអស់រយៈពេល៣៥ថ្ងៃមក។ នាងឡូហាន និយាយទៅកាន់អ្នកកាសែតក្រោយពីនាងត្រូវដោះលែងថា «ខ្ញុំមានការរំភើប និងរីករាយណាស់ ក្នុងការចាប់ផ្តើមការបំពេញការងារនៅតាមសហគមន៍របស់ខ្ញុំ»។
នាងលីនសេ ឡូហាន អាយុ២៤ឆ្នាំ បានត្រូវកាត់ទោសដាក់ពន្ធនាគាររយៈពេល១២០ថ្ងៃ កាលពីខែឧសភា កន្លងមក ប៉ុន្តែទោសរបស់នាងត្រូវបានបន្ធូរបន្ថយមកនៅត្រឹមជាប់ឃុំឃាំងក្នុងផ្ទះដោយសារនាងមិនប្រព្រឹត្តអំពើហិង្សា។ នាងបានត្រូវចាប់ខ្លួន និងកាត់ទោសដាក់ពន្ធនាគារក្រោយពីរងការចោទប្រកាន់ពីបទលួចខ្សែ.កមួយខ្សែ ។ ប៉ុន្តែនៅពេលនេះនាងត្រូវបានដោះលែងវិញ ក្រោយពីជាប់ឃុំឃាំងក្នុងផ្ទះរយៈពេល៣៥ថ្ងៃមក ។ ប៉ុន្តែទោះបីជាបែបណា ក្រោយពីការដោះលែងឱ្យមានសេរីភាពវិញ នាងឡូហាន នៅតម្រូវឱ្យធ្វើការងារតាមសហគមន៍រយៈពេល៤៨០ម៉ោងទៀត។
នាងលីនសេ ឡូហាន ដែលទទួលបានភាពល្បីល្បាញក្នុងខ្សែភាពយន្តរឿង “The Mean Girls” មានរឿងអាស្រូវយ៉ាងច្រើនក្នុងរយៈពេល២-៣ឆ្នាំ ចុងក្រោយនេះទាក់ទងទៅនឹងការចោទប្រកាន់សេពគ្រឿងស្រវឹង និងគ្រឿងញៀន ព្រមទាំងអំពើចោរកម្មផងដែរ ។ ទង្វើទាំងនេះធ្វើឱ្យប្រជាប្រិយភាព និងភាពល្បីល្បាញរបស់នាងមានការធ្លាក់ចុះយ៉ាងខ្លាំង លើសពីនេះទៀត នាងក៏ត្រូវចាប់ខ្លួនយកមកអប់រំជាច្រើនលើកច្រើនសារួចមកហើយ ទាក់ទងនឹងទង្វើទាំងនេះរបស់នាង ៕
ចែករំលែកព័តមាននេះ