ទីក្រុងវ៉ាស៊ីនតោន៖ លោកត្រាំបង្ហើបឱ្យដឹងថាលោកត្រៀមប្រកាសដំឡើងពន្ធ២៥%ទៅលើទំនិញរបស់សហភាពអឺរ៉ុបនៅពេលឆាប់ៗនេះក្រោមហេតុផលថាស្ថាប័ននេះបង្កើតឡើងដើម្បីកេងប្រវ័ញ្ចលើផលប្រយោជន៍អាមេរិក។ ហេតុនេះលោកត្រូវតែដំឡើងពន្ធឱ្យបានខ្ពស់បន្តិចដើម្បីយកត្រឡប់មកវិញនូវអ្វីដែលអាមេរិកបានខាតបង់។ លោកថាយើងនឹងប្រកាសអំពីការសម្រេចចិត្តដំឡើងពន្ធនៅក្នុងពេលឆាប់ៗបំផុតនេះ។
លោកត្រាំថាលោកនឹងដំឡើងពន្ធ២៥%ទៅលើទំនិញរបស់អឺរ៉ុបជាទូទៅដែលមានជាអាទិ៍រថយន្ត និងទំនិញដទៃទៀត។ ប្រតិកម្មចំពោះបញ្ហានេះ សហភាពអឺរ៉ុបប្រកាសថាខ្លួននឹងចាត់វិធានការវាយបកវិញយ៉ាងម៉ឺងម៉ាត់ និងជាបន្ទាន់ប្រឆាំងនឹងអ្វីដែលស្ថាប័ននេះចាត់ទុកថាជាការដំឡើងពន្ធមិនសមហេតុផល។ ឥឡូវនេះ កាណាដា និងម៉ិកស៊ីកូក៏មិនទាន់រួចខ្លួនដែរ។
គម្រោងដំឡើងពន្ធ២៥%ទៅលើប្រទេសទាំង២នេះគ្រាន់តែស្ថិតនៅក្នុងដំណាក់កាលព្យួរទុករយៈពេល៣០ថ្ងៃតែប៉ុណ្ណោះ ហើយនឹងដល់ពេលកំណត់នៅថ្ងៃទី៤ ខែមីនា។ លោកត្រាំថ្លែងថាលោកក៏ត្រៀមដំឡើងពន្ធទៅលើប្រទេសទាំង២នេះដែរ។មន្ត្រីរដ្ឋាភិបាលអាមេរិកបង្ហើបឱ្យដឹងថាគម្រោងដំឡើងពន្ធនៅជាធរមាននៅឡើយទេ។ ការព្យួរទុកពន្ធលើប្រទេសទាំង២ដោយសារពួកគេសន្យាថានឹងខិតខំទប់ស្កាត់គ្រឿងញៀន និងជនអន្តោប្រវេសន៍។
ដូច្នេះ លោកត្រាំនឹងពិនិត្យមើលលទ្ធផលការងាររបស់ពួកគេដើម្បីចង់ដឹងថាតើសម្រេចបានកម្រិតណា។ នៅពេលអ្នកសារព័ត៌មានសាកសួរអំពីបញ្ហាដំឡើងពន្ធទៅលើម៉ិកស៊ីកូ និងកាណាដាដើម្បីចង់ដឹងថាតើលោកប្រកាន់ជំហរបែបណាសម្រាប់ពេលនេះ? លោកត្រាំតបថាពន្ធនេះនឹងចូលជាធរមាននៅថ្ងៃទី២ ខែមេសា។ រដ្ឋមន្ត្រីក្រសួងពាណិជ្ជកម្មអាមេរិកក៏បញ្ជាក់បន្ថែមថាថ្ងៃទី២ ខែមេសាជាកាលកំណត់ដំឡើងពន្ធជាផ្លូវការ។
ដោយឡែកសម្រាប់សហភាពអឺរ៉ុប លោកត្រាំបាននិយាយរិះគន់គោលនយោបាយរបស់ស្ថាប័ននេះយ៉ាងខ្លាំងកាលពីយប់មិញ។ លោកថាអឺរ៉ុបធ្វើឱ្យក្រុមហ៊ុននាំស្បៀងអាហារ និងរថយន្តរបស់អាមេរិក (ទៅលក់នៅអឺរ៉ុប) រកស៊ីចាញ់ប្រៀបគេខ្លាំងណាស់។ លោកថាសហភាពអឺរ៉ុបបង្កើតឡើងដើម្បីកេងប្រវ័ញ្ចទៅលើអាមេរិក។ នេះជាគោលបំណងពិតប្រាកដរបស់ពួកគេ ។ ហើយពួកគេធ្វើកិច្ចការនេះបានល្អណាស់។ ប៉ុន្តែឥឡូវនេះ លោកជាប្រធានាធិបតីអាមេរិក (ដូច្នេះ លោកចង់មានន័យថាមិនបណ្ដោយឱ្យពួកគេធ្វើព្យុះធ្វើភ្លៀងតទៅទៀតទេ)។
បើគេងាកទៅស្ដាប់ជំហររបស់សហភាពអឺរ៉ុបវិញម្ដង អឺរ៉ុបច្រានចោលការអះអាងរបស់លោកត្រាំ។ អឺរ៉ុបថាការបង្កើតសហភាពអឺរ៉ុបដើម្បីធ្វើឱ្យក្រុមហ៊ុន ឬអ្នកវិនិយោគរបស់អាមេរិកបណ្ដាក់ទុនរកស៊ីនៅអឺរ៉ុបកាន់តែងាយស្រួល។ អ្នកនាំពាក្យគណៈកម្មការអឺរ៉ុបថ្លែងថាសហភាពអឺរ៉ុបជាអ្នកជួយជ្រោមជ្រែងឱ្យអាមេរិករីកចម្រើនដូចសព្វថ្ងៃនេះ។ យើងត្រៀមខ្លួនចាប់ដៃគូសហការគ្នា។ សំខាន់ឱ្យតែអាមេរិកអនុវត្តត្រឹមត្រូវតាមវិធានជាគោល។ ប៉ុន្តែយើងក៏ត្រៀមខ្លួនផងដែរដើម្បីការពារអតិថិជន និងម្ចាស់អាជីវកម្មរបស់យើងគ្រប់ជំហានទាំងអស់។
យោងតាមរបាយការណ៍ជាផ្លូវការរបស់រដ្ឋាភិបាលអាមេរិកកាលពីឆ្នាំ២០២៣ បើប្រៀបធៀបទំហំនាំចេញ-នាំចូលរវាងអាមេរិក និងអឺរ៉ុបឃើញថាអាមេរិកមានឱនភាពពាណិជ្ជកម្មជាង២៣៥ពាន់លានដុល្លារ។ នេះជាចំនួនដែលអឹរ៉ុបនាំចូលលើសអាមេរិក ឬក៏ថាចំណេញលើអាមេរិកក៏បានដែរ។ បើសិនអាមេរិកដំឡើងពន្ធ២៥%លើរថយន្ត អ្នកដែលរងផលប៉ះពាល់ខ្លាំងជាងគេគឺអាល្លឺម៉ង់ក្នុងនាមជាប្រទេសមហាអំណាចសេដ្ឋកិច្ចលេខមួយនៅសហភាពអឺរ៉ុប និងជាប្រទេសនាំមុខគេខាងនាំចេញរថយន្តទៅកាន់ទីផ្សារពិភពលោក៕
ចែករំលែកព័តមាននេះ