ទីក្រុងវ៉ាស៊ីនតោន៖ លោកត្រាំថ្លែងថាលោកពូទីនត្រូវតែធ្វើសម្បទានខ្លះៗនៅក្នុងការចរចាគ្នាដើម្បីបិទបញ្ចប់សង្គ្រាមអ៊ុយក្រែន។ លោកថ្លែងដូច្នេះនៅក្នុងកិច្ចប្រជុំគណៈរដ្ឋមន្ត្រីលើកដំបូងនៅសេតវិមាន។ លោកត្រាំយល់ថាវាជារឿងចាំបាច់ណាស់ដែលត្រូវតែរួមគ្នាបិទបញ្ចប់សង្គ្រាមនេះឱ្យខាងតែបាន។
នៅពេលអ្នកសារព័ត៌មានសួរថាតើលោកពូទីនគួរណាស់ធ្វើសម្បទាននៅក្នុងការចរចាគ្នាដើម្បីបិទបញ្ចប់សង្គ្រាមដែរឬទេ? លោកត្រាំតបថា «ត្រូវហើយ! គាត់ (លោកពូទីន) ត្រូវតែធ្វើដូច្នេះ»។ លោកត្រាំក៏បានបញ្ចេញមតិផ្ទាល់ខ្លួនពាក់ព័ន្ធនឹងបុគ្គលិកលក្ខណៈរបស់លោកពូទីនផងដែរ។ លោកថាលោកពូទីនជាមនុស្សឆ្លាតវៃណាស់ និងក៏ជាមនុស្សមានល្បិចខ្ពស់ណាស់ដែរ។
ជាថ្មីម្ដងទៀត លោកត្រាំបញ្ជាក់អំពីគុណសម្បត្តិរបស់ខ្លួននៅក្នុងបញ្ហាអ៊ុយក្រែន។ លោកអះអាងថាលោកពូទីនគ្មានចិត្តចង់បញ្ចប់សង្គ្រាមអ៊ុយក្រែនម្ដងណាទេកាលពីមុនលោកជាប់ឆ្នោតឡើងកាន់អំណាចនៅវ៉ាស៊ីនតោន។ ប៉ុន្តែនៅពេលលោកចូលកាន់កាប់កិច្ចការប្រទេសជាតិនៅសេតវិមាន លោកពូទីនក៏ប្រកាសអំពីបំណងចង់បញ្ចប់សង្គ្រាមតែម្ដង។
លោកថាបើលោកមិនជាប់ឆ្នោតទេ លោកពូទីននឹងនៅតែបន្តធ្វើសង្គ្រាមអ៊ុយក្រែនគ្មានថ្ងៃបញ្ចប់។ មនុស្សជាច្រើននឹងត្រូវស្លាប់នៅក្នុងសង្គ្រាម។ ក្រោយមក នៅពេលអ្នកសារព័ត៌មានស្នើសុំឱ្យលោកត្រាំបញ្ជាក់ឱ្យបានច្បាស់លាស់ថាតើលោកចង់ឃើញលោកពូទីនធ្វើសម្បទានអ្វីខ្លះ លោកត្រាំក៏បង្វែរទៅនិយាយអំពីបញ្ហាអ៊ុយក្រែន និងអង្គការណាតូវិញម្ដង។
លោកថ្លែងថាអ៊ុយក្រែនគួរណាស់បោះបង់ចោលគម្រោងចូលជាសមាជិកអង្គការណាតូ។ លោកនិយាយស្រដៀងនឹងលោកពូទីន និងរុស្ស៊ីដែរ។ លោកថាលោកពូទីនដុតបញ្ឆេះសង្គ្រាមអ៊ុយក្រែនក៏ដោយសារអ៊ុយក្រែនចង់ចូលជាសមាជិកអង្គការណាតូហ្នឹងហើយ។ មានន័យថាបើនៅតែចង់ចូលណាតូទៀត មើលទៅដំណើរការនេះប្រហែលមិនងាយនិយាយត្រូវគ្នាទេ។
លោកត្រាំធ្លាប់បាននិយាយជាបណ្ដើរៗតាំងពីមុននេះថាតាមមើលទៅអ៊ុយក្រែនប្រហែលជាមិនអាចចូលជាសមាជិកអង្គការណាតូបានទេ។ លោកចាត់ទុកថាករណីនេះមិនសមទំនង ឬមិនអាចទៅរួច។ ទន្ទឹមនឹងនោះ លោកហ្សេឡិនស្គីនៅតែនិយាយយ៉ាងទទូចថាបើអ៊ុយក្រែនមិនអាចចូលណាតូ គួរណាស់មានវត្តកងរក្សាសន្តិភាពរបស់ក្រុមសម្ព័ន្ធមិត្តទៅឈរជើងនៅអ៊ុយក្រែន។ យោងតាមលោកហ្សេឡិនស្គី ជម្រើសនៃការមិនចូលណាតូគឺដាក់ពង្រាយកងទ័ពនៃរដ្ឋជាសមាជិកណាតូ។
ចំណុចហ្នឹងក៏មិនបានដែរ។ អ្នកនាំពាក្យវិមានក្រឹមឡាំងទើបតែបញ្ជាក់ពីម្សិលមិញថាខ្លួនសូមបដិសេធការអះអាងថា «លោកពូទីនយល់ព្រមអនុញ្ញាតឱ្យអឺរ៉ុបបញ្ជូនកងរក្សាសន្តិភាពទៅអ៊ុយក្រែនក្នុងនាមជាអ្នកសង្កេតការណ៍»។ វិមានក្រឹមឡាំងមិនបានធ្វើអត្ថាធិប្បាយបន្ថែមទេ ប៉ុន្តែបាននិយាយយោងទៅលើការលើកឡើងរបស់រដ្ឋមន្ត្រីការបរទេសរុស្ស៊ីដែលថាម៉ូស្គូសូមជំទាស់នឹងសំណើនេះ។ លោកថាធ្វើដូច្នេះជាការគំរាមកំហែងដោយផ្ទាល់ទៅលើសន្តិសុខជាតិរបស់រុស្ស៊ី៕
ចែករំលែកព័តមាននេះ