រាជធានីភ្នំពេញ ៖ ឯកអគ្គរដ្ឋទូតគោចរអាមេរិកទទួលបន្ទុកបញ្ហាឧក្រិដ្ឋកម្មសង្គ្រាម Stephen Rapp ដែលកំពុងស្ថិតនៅក្នុងប្រទេសកម្ពុជាដើម្បីចូលរួមសវនាការនៃសំណុំ រឿង០០២បានចាត់ទុកសវនាការនេះមានសារសំខាន់បំផុតក្នុងពិភពលោក។ ដូច្នេះហើយបានជារដ្ឋាភិបាលអាមេរិកនឹងពិចារណាជាមួយរដ្ឋសភារបស់ ខ្លួន
រាជធានីភ្នំពេញ ៖ ឯកអគ្គរដ្ឋទូតគោចរអាមេរិកទទួលបន្ទុកបញ្ហាឧក្រិដ្ឋកម្មសង្គ្រាម Stephen Rapp ដែលកំពុងស្ថិតនៅក្នុងប្រទេសកម្ពុជាដើម្បីចូលរួមសវនាការនៃសំណុំរឿង០០២បានចាត់ទុកសវនាការនេះមានសារសំខាន់បំផុតក្នុងពិភពលោក។ ដូច្នេះហើយបានជារដ្ឋាភិបាលអាមេរិកនឹងពិចារណាជាមួយរដ្ឋសភារបស់ខ្លួនដើម្បីផ្តល់ជំនួយដល់សាលាក្តីខ្មែរក្រហមបន្តទៀត។
ថ្លែងនៅក្នុងសន្និសីទកាសែតកាលពីល្ងាចថ្ងៃទី២៨ ខែមិថុនា ឆ្នាំ២០១១ នៅសណ្ឋាគារសាន់វេ លោក Stephen Rapp មានប្រសាសន៍ថាប្រសិនបើមានការផ្តល់ជំនួយបន្តទៀតដល់សាលាក្តីខ្មែរក្រហមនោះ គឺជំនួយអាចនឹងមានចំនួនប្រហាក់ប្រហែលឆ្នាំមុន តែការផ្តល់ជំនួយ គឺអាស្រ័យលើរដ្ឋាភិបាល និងរដ្ឋសភាអាមេរិកដែលកំពុងពិចារណានៅឡើយ។
លោក Stephen Rapp បានមកប្រទេសកម្ពុជាកាលពីពេលថ្មីៗនេះដើម្បីចូលរួមក្នុងសវនាការនៃសំណុំរឿង០០២ដែលកំពុងដំណើរការទៅលើអតីតមេដឹកនាំកំពូល៤រូបនៃរបបខ្មែរក្រហម។ លោក Stephen Rapp បានជួបពិភាក្សាការងារជាមួយមន្ត្រីរាជរដ្ឋាភិបាល ចៅក្រម និងព្រះរាជអាជ្ញា រួមនឹងបុគ្គលិកអង្គភាពការពារជនរងគ្រោះនៅសាលាក្តីខ្មែរក្រហមផងដែរដើម្បីឱ្យបានដឹងថា តើការប្រព្រឹត្តទៅនៃអង្គជំនុំជម្រះសាលាក្តីខ្មែរក្រហមមានតម្រូវការចាំបាច់អ្វីខ្លះ។
យោងតាមសេចក្តីប្រកាសព័ត៌មានរបស់ស្ថានទូតអាមេរិកប្រចាំកម្ពុជាបានដកស្រង់សំដីលោកស្រីរដ្ឋមន្ត្រីការបរទេសសហរដ្ឋអាមេរិក Hillary Clinton បានកំណត់ថា សវនាការកាត់ទោសមេដឹកនាំជាន់ខ្ពស់បំផុត៤រូបដែលនៅរស់នៃរបបខ្មែរក្រហមគឺជាអាទិភាពខ្ពស់មួយសម្រាប់ពិភពលោក។ សហរដ្ឋអាមេរិកធ្លាប់បានផ្តល់ជំនួយប្រមាណ៧លានដុល្លារសម្រាប់សាលាក្តីខ្មែរក្រហម ហើយកំពុងពិចារណាបន្តផ្តល់ជំនួយដល់តុលាការកូនកាត់មួយនេះ។
ពាក់ព័ន្ធករណី០០៣ ឬ០០៤ លោក Stephen Rappមានប្រសាសន៍ថា អាមេរិកចង់ឃើញសវនាការនេះ តែវាអាស្រ័យលើតុលាការខ្មែរក្រហមថាតើត្រូវចោទប្រកាន់ ឬមិនចោទប្រកាន់ ដំណើរការ ឬមិនដំណើរការ ព្រោះតុលាការមាននីតិវិធី និងមានអង្គច្បាប់ច្បាស់លាស់ គ្មានការជ្រៀតជ្រែកពីខាងក្រៅទេ ៕
ចែករំលែកព័តមាននេះ