រាជធានីភ្នំពេញ ៖ បុរសម្នាក់ជាមេជាងសំណង់បានត្រូវជនកំរោលម្នាក់ចាក់នឹងកូនកាំបិតចុងស្រួច បណ្តាលឱ្យធ្លាយពោះរងរបួសយ៉ាងធ្ងន់ធ្ងរ ដោយសារទំនាស់ពាក្យសំដីគ្នាបន្តិចបន្តួចពេលកំពុងផឹកស៊ីជុំគ្នារឿងជនដៃដល់ចង់ធ្វើមេជាងសំណង់ ប៉ុន្តែជនរងគ្រោះឱ្យធ្វើត្រឹមកូនជាង ព្រោះជននោះអត់ចេះអ្វីទាំងអស់
រាជធានីភ្នំពេញ ៖ បុរសម្នាក់ជាមេជាងសំណង់បានត្រូវជនកំរោលម្នាក់ចាក់នឹងកូនកាំបិតចុងស្រួច បណ្តាលឱ្យធ្លាយពោះរងរបួសយ៉ាងធ្ងន់ធ្ងរ ដោយសារទំនាស់ពាក្យសំដីគ្នាបន្តិចបន្តួចពេលកំពុងផឹកស៊ីជុំគ្នារឿងជនដៃដល់ចង់ធ្វើមេជាងសំណង់ ប៉ុន្តែជនរងគ្រោះឱ្យធ្វើត្រឹមកូនជាង ព្រោះជននោះអត់ចេះអ្វីទាំងអស់ ទើបធ្វើឱ្យជននោះផ្ទុះកំហឹងទាញកាំបិតចាក់ឱ្យរបួសតែម្តង ។ ហេតុការណ៍នេះបានកើតឡើងកាលពីវេលាម៉ោង៨យប់ថ្ងៃទី២៧ មិថុនា ឆ្នាំ២០១១ នៅចំណុចផ្ទះជួលក្នុងភូមិត្រពាំងថ្លឺង សង្កាត់ចោមចៅ ខណ្ឌដង្កោ ។
ជនរងគ្រោះឈ្មោះឈិន ម៉េង អាយុ៣៥ឆ្នាំ ជាមេជាងសំណង់ មានស្រុកកំណើតនៅស្រុកក្រូចឆ្មារ ខេត្តកំពង់ចាម ស្នាក់នៅផ្ទះជួលក្នុងភូមិកើតហេតុ ។ ចំណែកឯជនដៃដល់ឈ្មោះម៉ាប់ ហៅសំបូរ ស្នាក់នៅផ្ទះជួលភូមិកើតហេតុនោះដែរ ពេលនេះកំពុងរត់គេចខ្លួន ប៉ុន្តែភ្លាមៗនោះប៉ូលិសប៉ុស្តិ៍ចោមចៅបានធ្វើការឃាត់ខ្លួនបុរស៣នាក់ផងដែរ ដោយអះអាងថា ជាបក្សពួកជនដៃដល់។
តាមប្រភពព័ត៌មានបានឱ្យដឹងថា នៅព្រឹកថ្ងៃទី២៧ មិថុនា នោះ ម្ចាស់ផ្ទះជួលខាងលើបាននាំជនដៃដល់ឈ្មោះម៉ាប់ ហៅសំបូរ ទៅផ្ញើជនរងគ្រោះដើម្បីឱ្យធ្វើការសំណង់។ ពេលនោះជនដៃដល់បានទាមទារធ្វើជាមេជាង ប៉ុន្តែជនរងគ្រោះមិនឱ្យធ្វើ ព្រោះជននេះអត់ចេះកិច្ចការជាងឡើយ បើធ្វើត្រឹមកូនជាងកំប៉ិកកំប៉ុកបាន ហើយទោះបីជាយ៉ាងណា ក៏ជននោះធ្វើការបានរយៈពេល១ថ្ងៃដែរ ។ ប្រភពដដែលបានបន្តថា លុះដល់វេលាយប់ឡើង ជនរងគ្រោះ និងជនដៃដល់ ព្រមទាំងម្ចាស់ផ្ទះជួល បានស៊ីផឹកជុំគ្នានៅក្នុងផ្ទះជួលនោះ ប៉ុន្តែក្រោយពេលផឹកបានបន្តិចម្ចាស់ផ្ទះជួលបានក្រោកដើរចេញទៅមុននៅសល់តែជនរងគ្រោះ និងជនដៃដល់អង្គុយផឹកជាមួយគ្នា តែពីរនាក់ ។ ខណៈនោះពួកគេក៏បាននិយាយគ្នាពីរឿងធ្វើការសំណង់ ហើយជនសង្ស័យបានទាមទារធ្វើជាមេជាង បើមិនបានធ្វើជាមេជាងទេ គេមិនធ្វើការឡើយ ។
ប្រភពដដែលបានបន្តទៀតថា ចំណែកឯជនរងគ្រោះមិនព្រមឱ្យជននេះធ្វើជាមេជាងឡើយ ព្រោះជននេះអត់ចេះធ្វើកិច្ចការជាងផង ហើយការមិនយល់ព្រមនោះបានបង្កឱ្យមានការឈ្លោះប្រកែកគ្នារហូតជនសង្ស័យជេរប្រមាថជនរងគ្រោះជាច្រើន ។ ដោយទ្រាំមិនបានជនរងគ្រោះក៏ស្ទុះចូលទៅប្រុងវាយក៏ត្រូវជននេះដកកូនកាំបិតចាក់ចំពោះ បណ្តាលឱ្យរងរបួសយ៉ាងធ្ងន់ធ្ងរតែម្តង ។ ប្រភពដដែលបានបន្តថា ក្រោយពេលកើតហេតុជនសង្ស័យបានរត់គេចខ្លួនបាត់ស្រមោល ឯជនរងគ្រោះត្រូវបានគេបញ្ជូនទៅសង្គ្រោះនៅមន្ទីរពេទ្យព្រះកុសុមៈជាបន្ទាន់ ។
ក្រោយពេលកើតហេតុ ប៉ូលិសប៉ុស្តិ៍ចោមចៅបានចុះទៅឃាត់ខ្លួនបុរស៣នាក់នាំយកទៅសាកសួរដោយសង្ស័យថា ជាបក្សពួកជនដៃដល់ តែលទ្ធផលយ៉ាងណានោះពុំទាន់ដឹងទេ៕
ចែករំលែកព័តមាននេះ