ប្រធានាធិបតីប៉ាឡេស្ទីន លោកម៉ាមូដ អាប់បាស់ ក្នុងពេលបើកកិច្ចប្រជុំមួយរបស់ថ្នាក់ដឹកនាំប៉ាឡេស្ទីនកាលពីថ្ងៃទី២៦ មិថុនា នៅទីក្រុងរ៉ាម៉ាន់ឡាហ៍ ថ្លែងថា ប៉ាឡេស្ទីននឹងទាមទារលក្ខន្តិកៈជាសមាជិកពេញសិទ្ធិរបស់ អ.ស.ប ក្នុងខែកញ្ញាខាងមុខនេះ ។
ប្រធានាធិបតីប៉ាឡេស្ទីនមានប្រសាសន៍ថា កិច្ចប្រជុំនេះ នឹងផ្តោតលើបញ្ហាសំខាន់ៗទាំងឡាយ ដូចជា ការសម្រេចចិត្តស្នើសុំចូលជាសមាជិក អ.ស.ប ជាដើម ។ ពិតណាស់ នៅតែមានអ្នកដែលនិយាយថា ការសម្រេចចិត្តរបស់យើងសុំចូលជាសមាជិកពេញសិទ្ធិ អ.ស.ប គឺជាយុទ្ធវិធីមួយ និងជាល្បិចកលមួយរបស់យើង ។ ក៏ប៉ុន្តែយើងចាត់ទុកថា នេះជាវិធានការសំខាន់មួយក្នុងករណីដែលការចរចាទទួលបរាជ័យ ហើយរហូតដល់ពេលនោះពុំមានផែនការនយោបាយណាមួយដែលអាចទទួលយកបាន សម្រាប់បើកការចរចាសន្តិភាពឡើងវិញ ជាមួយអ៊ីស្រាអែល ដោយឈរលើមូលដ្ឋាននៃបណ្តាដំណោះស្រាយអន្តរជាតិ ដំណោះស្រាយអំពីរដ្ឋ២ និងការបញ្ឈប់ការធ្វើអាណានិគម។ ដូច្នេះយើងបានសម្រេចធ្វើដំណើរក្នុងខែកញ្ញាខាងមុខនេះ ទៅកាន់ អ.ស.ប ដើម្បីឱ្យទទួលបានលក្ខន្តិកៈជាសមាជិកពេញសិទ្ធិសម្រាប់ប៉ាឡេស្ទីនក្នុងអង្គការអន្តរជាតិនោះ ។
សហរដ្ឋអាមេរិក និងប្រទេសអឺរ៉ុបជាច្រើនដូចជាអាល្លឺម៉ង់ និងអ៊ីតាលីជាដើម ដែលជាសម្ព័ន្ធមិត្តរបស់អ៊ីស្រាអែល បានប្រឆាំងចំពោះសំណើមួយបែបនេះ។ ប៉ុន្តែប្រទេសឯទៀតដូចជាបារាំង បានរក្សាការជ្រើសរើសរបស់ខ្លួន ហើយនឹងអាចទទួលស្គាល់រដ្ឋប៉ាឡេស្ទីនមួយ ៕
ចែករំលែកព័តមាននេះ