ខេត្តកំពង់ចាម ៖ សង្ឃ២អង្គ គង់នៅវត្តគិរីវណ្ណរាម ហៅវត្តភ្នំចន្ទ ស្ថិតនៅភូមិ៦-១០ សង្កាត់វិហារហ្លួង ក្រុងសួង បានបាត់បង់ធម៌ខន្តី និងក្លាយជាបុគ្គលដែលយកទោសៈមោហៈមកធ្វើជាត្រីមុខ ទីបំផុតសង្ឃមួយអង្គរបួសធ្លាយពោះវៀន១ទ្រេល និងមួយអង្គទៀតត្រូវបានផ្សឹក ។ ទាល់តែជួបបញ្ហាបែបនេះ ទើបមានការទទួលស្គាល់ថា មានតែធម៌ខន្តីទេ ទើបអាចរំដោះសត្វ លោកឱ្យរួចពីទុក្ខបាន ។ ហេតុការណ៍នេះបានកើតឡើងកាលពីវេលាម៉ោង១ និង៣០នាទីរសៀលថ្ងៃទី២៤ មិថុនា ។
ទាក់ទិនទៅនឹងហេតុការណ៍នេះត្រូវបានសាមណេរនាមរស់ វណ្ណៈ ព្រះជន្ម១៦ឆ្មាំ ដែលគង់នៅវត្តខាងលើមានថេរដីកាឱ្យដឹងថា មុនមានហេតុការណ៍នេះកើតឡើងសាមណេរឈ្មោះចេង សុខគៀន អាយុ១៦ឆ្នាំ លេងឈូសជាមួយនឹងក្មេងៗនៅក្នុងវត្ត ។ ពេលឃើញបែបនេះ ភិក្ខុ បៀន ប៊ុនលី ព្រះជន្ម២៧ឆ្នាំ ជាគ្រូសូត្រស្តាំនិមន្ត មកឃើញក៏ប្រាប់កុំឱ្យលេង ព្រោះខុសនឹងវិន័យសង្ឃ ។
សាមណេររស់ វណ្ណៈ មានថេរដីកាបន្តថា ដោយសារតែមិនព្រមស្តាប់ទើបភិក្ខុអង្គនោះបានវាយនេនចេង សុខគៀន ២ ទៅ៣ដៃ ដើម្បីជាការព្រមាន ហើយនេននោះក៏ស្រែកយំបង្ហូរទឹកភ្នែកព្រមទាំងមានទឹកមុខក្រមូវទៀតផង ។ បន្ទាប់មក ភិក្ខុជាគ្រូសូត្រស្តាំបាននិមន្តឡើង
ទៅលើកុដិ បានប្រហែលជា៥នាទី ស្រាប់តែនេនចេង សុខគៀន យកដែកទំហំ១០លីកាន់នៅក្នុងដៃដើរឡើងទៅលើកុដិ និងដៃម្ខាងទៀតកាន់កាំបិតចុងស្រួច ស្រែកជេរភិក្ខុអង្គនោះដោយពាក្យអសុរោះ ហើយដោយមិនអស់ចិត្ត ក៏យកដែកនោះដេញវាយគ្រូសូត្រស្តាំទៀត តែមិនត្រូវព្រោះបានពូថៅនៅក្នុងដៃរងទប់មិនឱ្យត្រូវ។ បន្ទាប់មកទើបនេននោះយកកាំបិតចុងស្រួចគប់សំដៅគ្រូសូត្រស្តាំ១កាំបិត បណ្តាលឱ្យត្រូវចំពោះធ្លាយពោះវៀនមួយទ្រេលចេញមកក្រៅ រងរបួសជាទម្ងន់ និងត្រូវបាននាំមកសង្គ្រោះនៅមន្ទីរពេទ្យបង្អែកស្រុកត្បូងឃ្មុំ តែដោយស្ថានភាពរបួសធ្ងន់ធ្ងរពេក ក៏បាននាំមកសង្គ្រោះបន្តនៅមន្ទីរពេទ្យខេត្ត រីឯនេនដៃដល់ត្រូវបានចាប់ផ្សឹក ហើយបញ្ជូនមកអធិការដ្ឋាននគរបាលក្រុង
សួង ។
លោកវរសេនីយ៍ត្រីលាង អេង អធិការនគរបាលក្រុងសួងបានបញ្ជាក់ថា ដោយមានការសម្របសម្រួលពីគណៈកម្មការវត្ត និងញោម របស់សង្ឃទាំងសងខាងមិនប្តឹងប្តល់អ្វីនោះទេ ក៏បានអនុញ្ញាតឱ្យអន្ទិតនេះត្រឡប់ទៅលំនៅឋានវិញ ៕
ចែករំលែកព័តមាននេះ