មន្ត្រីរដ្ឋាភិបាលលីប៊ីនិយាយថា អង្គការអូតង់បានបើកការវាយប្រហារតាមអាកាសនៅលីប៊ីជាថ្មីទៀត កាលពីថ្ងៃទី២៥ មិថុនា កន្លងមក ដោយទម្លាក់គ្រាប់បែកត្រូវចំហាងដុតនំប៉័ង និងភោជនីយដ្ឋានមួយនៅក្នុងទីក្រុងប្រេហ្គា បណ្តាលឱ្យស្លា.ប់ជនស៊ីវិល១៥នាក់ ប៉ុន្តែអង្គការអូតង់បានបដិសេធ
មន្ត្រីរដ្ឋាភិបាលលីប៊ីនិយាយថា អង្គការអូតង់បានបើកការវាយប្រហារតាមអាកាសនៅលីប៊ីជាថ្មីទៀត កាលពីថ្ងៃទី២៥ មិថុនា កន្លងមក ដោយទម្លាក់គ្រាប់បែកត្រូវចំហាងដុតនំប៉័ង និងភោជនីយដ្ឋានមួយនៅក្នុងទីក្រុងប្រេហ្គា បណ្តាលឱ្យស្លាប់ជនស៊ីវិល១៥នាក់ ប៉ុន្តែអង្គការអូតង់បានបដិសេធព័ត៌មាននេះ។ អង្គការអូតង់និយាយថា ខ្លួនបានបើកការវាយប្រហារតាមអាកាសប្រឆាំងតែមូលដ្ឋានសំខាន់ដែលគ្រប់គ្រងដោយមេដឹកនាំផ្តាច់ការលីប៊ីប៉ុណ្ណោះ ហើយនិយាយថា ពុំមានការបង្ហាញពីការស្លាប់ជនស៊ីវិលដោយសារការវាយប្រហារនេះទេ។
ជាមួយគ្នានេះ អូតង់បានចេញសេចក្តីថ្លែងការណ៍មួយថា កងកម្លាំងរបស់លោកកាដាហ្វី មេដឹកនាំលីប៊ី ដែលកំពុងក្រាញអំណាចបានកាន់កាប់អគារជាច្រើននៅតំបន់ដែលបោះបង់ចោលក្នុងទីក្រុងប្រេហ្គា ដែលនៅទីនោះពួកគេបានបើកការវាយប្រហារប្រឆាំងជនស៊ីវិល។
ទីក្រុងប្រេហ្គា ជាក្រុងផលិតប្រេងដ៏សំខាន់មួយរបស់លីប៊ីមានចម្ងាយប្រហែល៥០០ម៉ាយ ភាគខាងកើតរដ្ឋធានីទ្រីប៉ូលី ជាកន្លែងមានការប្រយុទ្ធគ្នាយ៉ាងសាហាវរវាងកងកម្លាំងរដ្ឋាភិបាល និងពួកឧទ្ទាមប្រឆាំង។
អ្នកនាំពាក្យ និងជាអនុប្រធានក្រុមប្រឹក្សាជាតិបណ្តោះអាសន្នលីប៊ី លោក Abdul Hafiz Ghoga និយាយថា លោកកាដាហ្វី ជាអ្នកទទួលខុសត្រូវចំពោះការស្លាប់ជនស៊ីវិលជាច្រើននាក់ក្នុងការប្រយុទ្ធគ្នាកន្លងមក។
កាលពីថ្ងៃទី២៥ មិថុនា កន្លងមក ទូរទស្សន៍លីប៊ីរាយការណ៍ថា ការវាយប្រហារតាមអាកាសរបស់អង្គការអូតង់បានទម្លាក់គ្រាប់បែកត្រូវទីក្រុង Ghayan ភាគខាងលិចលីប៊ី បណ្តាលឱ្យស្លាប់ និងរបួសជនស៊ីវិលជាច្រើនាក់។
បើទោះបីជាអង្គការអូតង់បើកការវាយប្រហារតាមអាកាសឥតឈប់ និងមានការផ្តាច់ខ្លួនចេញជាបន្តបន្ទាប់ក៏ដោយ ក៏លោកកាដាហ្វី នៅតែមិនព្រមបោះបង់ចោលអំណាចដែរ ៕
ចែករំលែកព័តមាននេះ