ខេត្តកែប ៖ និស្សិតបណ្ឌិតនៃសាកលវិទ្យាល័យអាស៊ី អឺរ៉ុបសរុបចំនួន៣០នាក់ ក្រោមការដឹកនាំរបស់លោកឈឿន សាវន សាកលវិទ្យាធិការរងបានចុះធ្វើទស្សនកិច្ចសិក្សាស្វែងយល់ពីសក្តានុពលនៃវិស័យទេសចរណ៍នៅក្នុងសហគមន៍ទេសចរណ៍កោះទន្សាយនៃខេត្តកែបរយៈពេល២ថ្ងៃគឺថ្ងៃទី១៨ មិថុនា ដល់ថ្ងៃទី១៩ មិថុនា ឆ្នាំ២០១១។
តាមការបញ្ជាក់របស់លោកស្រីឃឹម វូចឡាយ ប្រធានសហគមន៍ទេសចរណ៍កោះទន្សាយបានឱ្យដឹងថា នៅក្នុងសហគមន៍ទេសចរណ៍កោះទន្សាយនេះ មានប្រជាពលរដ្ឋរស់នៅចំនួន១៤គ្រួសារ ដោយប្រកបមុខរបរនេសាទ ដាំសារាយ និងទទួលភ្ញៀវទេសចរដែលមកលេងកម្សាន្តនៅកោះនេះ ។ លោកស្រីបានលើកឡើងថា ពីមុននៅតំបន់មិនមានភ្ញៀវមកលេងទេ តែក្រោយមកដោយមានការគាំទ្រ និងអនុញ្ញាតពីលោកអភិបាលខេត្តកែប ប្រជាពលរដ្ឋដែលរស់នៅទីនោះ ក៏បានរៀបចំជាតំបន់ទេសចរណ៍ឡើង ដើម្បីបម្រើដល់ភ្ញៀវមកលេងកម្សាន្តដោយមើលឃើញឆ្នេរនៅកោះទន្សាយនេះមានខ្សាច់ល្អ និងខ្យល់អាការដ៏ល្អផ្តល់ផាសុកភាពដល់ភ្ញៀវមកលេង ។
មានប្រសាសន៍ក្នុងឱកាសនោះដែរ លោកឈឿន សាវន សាកលវិទ្យាធិការរងនៃសាកលវិទ្យាល័យអាស៊ី អឺរ៉ុបបានបញ្ជាក់បន្ថែមថា ដើម្បីពង្រឹងគុណភាពអប់រំនៅក្នុងសាកលវិទ្យាល័យអាស៊ីអឺរ៉ុបថ្នាក់ដឹកនាំដែលមានលោកឌួង លាង ជាសាកលវិទ្យាធិការតែងបានយកចិត្តទុកដាក់ចំពោះការសិក្សាផ្នែកទ្រឹស្តីរបស់និស្សិតទៅនឹងការអនុវត្តជាក់ស្តែងនៅក្នុងសង្គម ដោយបានសហការជាមួយក្រសួង ស្ថាប័ន ក្រុមហ៊ុន រោងចក្រសហគ្រាសនានា ដើម្បីបង្កលក្ខណៈឱ្យនិស្សិតចុះធ្វើកម្មសិក្សា និងទស្សនកិច្ចសិក្សាស្វែងយល់អំពីខ្សែសង្វាក់ផលិតកម្មរបស់ស្ថាប័នទាំងនោះ ព្រមទាំងអញ្ជើញវាគ្មិនល្បីៗប្រកបដោយបទពិសោធន៍មកធ្វើបទបង្ហាញផ្តល់នូវចំណេះដឹងថ្មីៗ ។ ជាក់ស្តែងក្នុងរយៈពេលពេញ២ថ្ងៃនេះ និស្សិតបណ្ឌិតនៃសាកលវិទ្យាល័យអាស៊ីអឺរ៉ុបសរុបចំនួន៣០នាក់បាននាំគ្នាមកទស្សនកិច្ចសិក្សានៅតំបន់ទេសចរណ៍ធម្មជាតិនៃខេត្តកែបនេះ ដើម្បីស្វែងយល់ពីសក្តានុពលនៃវិស័យទេសចរណ៍នៅក្នុងព្រះរាជាណាចក្រកម្ពុជាដែលសំបូរបែប និងមានតម្លៃដើម្បីលើកស្ទួយសេដ្ឋកិច្ច នៅកម្ពុជា ។
ឆ្លៀតក្នុងឱកាសធ្វើទស្សនកិច្ចសិក្សានេះនិស្សិតទាំងអស់បានផ្តល់ធុងសំរាមចំនួន៥ដល់សហគមន៍ទេសចរណ៍កោះទន្សាយផងដែរ ។ លោកបានឱ្យដឹងដែរថា បច្ចុប្បន្ននេះ សាកលវិទ្យាល័យអាស៊ីអឺរ៉ុបមានការរីកចំរើនគួរឱ្យកត់សម្គាល់ដោយបានបង្កើនការបណ្តុះបណ្តាលរហូតដល់ថ្នាក់បណ្ឌិតជាច្រើនជំនាញឯកទេសដូចជាវិទ្យាសាស្ត្រនយោបាយ ច្បាប់ រដ្ឋបាលសាធារណៈទំនាក់ទំនងអន្តរជាតិគ្រប់គ្រងពាណិជ្ជកម្ម ហិរញ្ញវត្ថុ និងវិទ្យាសាស្ត្រសេដ្ឋកិច្ច ទៀតផង ៕
ចែករំលែកព័តមាននេះ