អគ្គលេខាធិការ អ.ស.ប លោកបានគីមូនថ្លែងកាលពីថ្ងៃទី១០ មីនា ថា បេកសកកម្ម អ.ស.ប នៅកូតឌីវ័រ ONCI នឹងរក្សាការហោះហើររបស់ខ្លួនក្នុងប្រទេសនេះ ទោះបីជាមានការសម្រេចចិត្តរបស់ប្រធានាធិបតីចប់អាណត្តិលោកឡូរ៉ង់ ហ្សេបាបូ ចេញការហាមឃាត់មិនឱ្យមានការហោះហើរ ឬចុះចតរបស់យន្តហោះ ឬឧទ្ធម្ភាគចក្រអ.ស.ប និងរបស់កងកម្លាំងLICONE បារាំងនៅលើដែនដីប្រទេសនេះក៏ដោយ ។
អ្នកនាំពាក្យរបស់អគ្គលេខាធិការអ.ស.បលោក MARTIN NESIRKY បញ្ជាក់ថា លោកបាន គីមូន បានបរិហារចំពោះការប៉ុនប៉ងរបស់លោកឡូរ៉ង់ ហ្សេបាបូ រាំងខ្ទប់មិនឱ្យយន្តហោះ ឬឧទ្ធម្ភាគចក្ររបស់អ.ស.បធ្វើការហោះហើរហើយយល់ថា វិធានការនេះមិនអាចទទួលយកបានឡើយ ។ អគ្គលេខាធិការអ.ស.ប អះអាងថា ONCI នឹងរក្សាប្រតិបត្តិការហោះហើររបស់ខ្លួន ហើយនឹងចាត់រាល់វិធានការដែលចាំបាច់ស្របតាមដំណោះស្រាយទាំងឡាយរបស់ក្រុមប្រឹក្សាសន្តិសុខ ដើម្បីបំពេញអាណត្តិរបស់ខ្លួនពិសេសខាងកិច្ចការពារជនស៊ីវិល ។
លោកឡូរ៉ង់ ហ្សេបាបូ បានសម្រេចចេញការហាមឃាត់នេះហាក់ដូចជាមានបំណងរារាំងការវិលត្រឡប់របស់គូប្រជែងលោកគឺលោកអា ឡាសសាន អ៊ូអាតារ៉ា ដែលបច្ចុប្បន្នស្ថិតក្នុងប្រទេសអេត្យូពីចូលរួមក្នុងកិច្ចប្រជុំកំពូលសហភាពអាហ្វ្រិកផ្តោតលើវិបត្តិនយោបាយនៅកូតឌីវ័រ៕
ចែករំលែកព័តមាននេះ