ខេត្តពោធិ៍សាត់ ៖ យុវជនទំនើងម្នាក់ស្រវឹងទឹកត្នោតជូរនៅកន្លែងផ្សេង ពេលដើរត្រឡប់ទៅផ្ទះវិញ ឃើញយុវជនមួយក្រុមទៀតកំពុងផឹកស្រាជុំគ្នា ស្រាប់តែកាន់ដំបងដើរចូលទៅវាយក្បាលគេដោយគ្មានមូលហេតុ ក៏ត្រូវបានគេប្តឹងសមត្ថកិច្ចឱ្យធ្វើការឃាត់ខ្លួនភ្លាមៗនោះដែរ
ខេត្តពោធិ៍សាត់ ៖ យុវជនទំនើងម្នាក់ស្រវឹងទឹកត្នោតជូរនៅកន្លែងផ្សេង ពេលដើរត្រឡប់ទៅផ្ទះវិញ ឃើញយុវជនមួយក្រុមទៀតកំពុងផឹកស្រាជុំគ្នា ស្រាប់តែកាន់ដំបងដើរចូលទៅវាយក្បាលគេដោយគ្មានមូលហេតុ ក៏ត្រូវបានគេប្តឹងសមត្ថកិច្ចឱ្យធ្វើការឃាត់ខ្លួនភ្លាមៗនោះដែរ ។
តាមព័ត៌មានពីមន្ត្រីប៉ូលិសមូលដ្ឋានឱ្យដឹងថា យុវជនដៃដល់នោះឈ្មោះរឿម រុយ ភេទប្រុស អាយុ២០ឆ្នាំ រស់នៅភូមិតានុក ឃុំលាច ស្រុកភ្នំក្រវាញ ឯជនរងគ្រោះឈ្មោះម៉េង សុខឌី ភេទ ប្រុស អាយុ៣៣ឆ្នាំ រស់នៅភូមិប៉ែន ឃុំលាច ស្រុកភ្នំក្រវាញ ជាកម្មករបើកគ្រឿងចក្រឱ្យក្រុមហ៊ុន ចិន ។ តាមពាក្យបណ្តឹង គឺកាលពីថ្ងៃទី១៦ មិថុនា ២០១១ វេលាម៉ោង៩ និង៣០នាទីយប់ ឈ្មោះម៉េង សុខឌី កំពុងអង្គុយផឹកស្រាជាមួយមិត្តភក្តិដែលរួមការងារ៤-៥នាក់ទៀត នៅផ្ទះភូមិប៉ែន ។ ខណៈពេលកំពុងហូបចុក និងសើចសប្បាយជុំគ្នានោះ គេឃើញឈ្មោះរឿម រុយដើរម្នាក់ឯង មិនដឹងមកពីណាទេ ។ ពេលមកដល់ឃើញពួកគេកំពុងផឹកស្រាសើចសប្បាយនោះ ស្រាប់តែដើរចូលមកទាញដំបងវាយផ្អើលតែម្តង បណ្តាលឱ្យជនរងគ្រោះឈ្មោះម៉េង សុខឌី ត្រូវក្បាលមួយដំបង បែកឈាមរបួសធ្ងន់ ។ ឃើញដូច្នេះសមាជិកក្នុងវង់ផឹកបម្រុងវាយឱ្យសន្លប់នៅទីនោះដែរ ប៉ុន្តែមានអ្នកហាមឃាត់មិនឱ្យបញ្ចេញកំហឹង សុខចិត្តប្តឹងប៉ូលិសឱ្យធ្វើតាមច្បាប់វិញ ។
នៅចំពោះមុខសមត្ថកិច្ចជនសង្ស័យសារភាពថា ខ្លួនពិតជាបានវាយឈ្មោះម៉េង សុខឌី មែន ព្រោះឃើញខ្លួនដើរកាត់ហើយអត់មានអ្នកណាហៅផឹក ។ តាមពិតខ្លួនស្រវឹងទឹកត្នោតជូរជាមួយមិត្តភក្តិពីកន្លែងផ្សេងមកហើយ ពេលដើរទៅផ្ទះវិញជួបក្រុមខាងលើផឹកស៊ីសើចក្អាកក្អាយគួបផ្សំនឹងស្រវឹងផងនោះ ក៏ដើរចូលទៅវាយតែម្តង
ទៅ ។ ជនសង្ស័យត្រូវបានបញ្ជូនទៅសាលាដំបូងកាលពីថ្ងៃទី១៩ មិថុនា ដើម្បីផ្តន្ទាទោសតាមច្បាប់ ៕
ចែករំលែកព័តមាននេះ