ខេត្តកំពង់ចាម ៖ កម្លាំងប៉ុស្តិ៍រដ្ឋបាលឃុំទន្លូង បានសហការជាមួយកម្លាំងព្រហ្មទណ្ឌស្រុកមេមត់ ចាប់ខ្លួនបុរសចំណាស់ម្នាក់ឈ្មោះស៊ុំ អ៊ូច អាយុ៥៦ឆ្នាំ រស់នៅភូមិចង្គុំកណ្តាល ឃុំទន្លូង នាព្រឹកថ្ងៃទី២០ មិថុនា ២០១១ ដោយជាប់ចោទពីបទចាប់ក្មេងស្រីអាយុ១០ឆ្នាំ រំលោភសេពសន្ថវៈរហូតបានសំរេចនៅក្បែរគុម្ពឫស្សីខាងក្រោយផ្ទះ ក្នុងខណៈពេលដែលឪពុក ម្តាយនាងចេញទៅចម្ការបាត់ ។
តាមលោកអនុសេនីយ៍ឯក កែវ សំនៀង អធិការរងនគរបាលស្រុកមេមត់បានឲ្យដឹងថា នៅវេលាម៉ោង៨ និង៣០នាទីព្រឹកថ្ងៃទី២០ មិថុនា កម្លាំងប៉ុស្តិ៍រដ្ឋបាលទន្លូងបានទទួលពាក្យបណ្តឹងពីស្ត្រីជាម្តាយរបស់ក្មេងស្រីថាមាន ករណីចាប់រំលោភកូនស្រីគាត់ ដែលបង្កឡើងដោយបុរសកំហូចត្រូវជាឪពុកធំ ។ ក្រោយពីទទួលបានព័ត៌មាននេះភ្លាម រូបលោកបានចាត់ឲ្យកម្លាំងជំនាញព្រហ្មទណ្ឌស្រុកចុះស្រាវជ្រាវជាបន្ទាន់ និងបានហៅបុរសសង្ស័យឈ្មោះ អ៊ូច មកកាន់អធិការដ្ឋាននគរបាលស្រុកមេមត់ ដើម្បីសួរនាំ ។
ក្មេងស្រីរងគ្រោះដែលទើបមានអាយុ១០ឆ្នាំបានរៀបរាប់ថា កាលពីវេលាម៉ោង៧ព្រឹកថ្ងៃទី១៦ មិថុនា ឪពុកម្តាយរបស់នាងបានចេញទៅចម្ការដំឡូងអស់ នៅតែនាងនិងប្អូនតូចម្នាក់ប៉ុណ្ណោះ លុះដល់ម៉ោងប្រហែល១០ព្រឹកនាងបានចេញទៅលេងផ្ទះអ្នកជិតខាង បន្តិចក្រោយមកទើបនាងដើរត្រឡប់មកផ្ទះវិញ។ ខណៈនោះស្រាប់តែឃើញបុរសចំណាស់ឈ្មោះអ៊ូចនៅខាងក្រោមផ្ទះ ហើយទាញយកលុយចំនួន១.០០០ រៀលហុចមកឲ្យនាង ប៉ុន្តែនាងមិនព្រមទទួល យកទេ ។ ពេលនាងកំពុងដើរនោះស្រាប់តែបុរសនេះមកស្ទាក់ចាប់នាង ដែលឃើញបែបនេះប្អូនប្រុសតូចនាងបានស្រែកយំ ហើយឈ្មោះ អ៊ូច ហុចលុយឲ្យចំនួន១.០០០រៀលទើបបាត់យំ ។ បន្ទាប់មកបុរសនេះបានបីនាងទៅព្រៃឫស្សីខាងក្រោយផ្ទះ ហើយនាងមិនហ៊ានស្រែកហៅអ្នកណាឱ្យជួយទេ ព្រោះតែបុរសនេះមានកាំបិតដាក់នៅតាមខ្លួន រួចក៏ធ្វើសកម្មភាពរំលោភរហូតបានសម្រេច ។
ចំណែកបុរសកំហូចឈ្មោះស៊ុំ អ៊ូច បានឆ្លើយសារភាពថា កាលពីវេលាម៉ោង៦ព្រឹកថ្ងៃទី១៦ មិថុនា ២០១១ ខ្លួនបានចេញទៅភ្ជួរស្រែរហូតដល់ម៉ោង១០ព្រឹកទើបត្រឡប់មកផ្ទះវិញ លុះដើរមកផ្ទះអ្នកក្បែរខាងស្រាប់តែឃើញក្មួយស្រី ខាងលើនៅផ្ទះជាមួយនឹងប្អូនប្រុសតូចរបស់គេ ។ ពេលនោះខ្លួនក៏បានចាប់បីនាងយកទៅខាងក្រោយផ្ទះរំលោភរហូតបានសម្រេចតាមបំណងមែន ។
លោកអធិការរងនគរបាលស្រុកមេមត់ បានបញ្ជាក់ថា កាលពីថ្ងៃទី២៥ កុម្ភៈ ២០១០ បុរសកំហូចឈ្មោះ ស៊ុំ អ៊ូច ធ្លាប់បានចាប់ក្មួយស្រីនេះរំលោភម្តងរួចមកហើយដោយមានកិច្ចសន្យាអប់រំមិនឲ្យមានជាលើកទី២នោះទេ ។ ប៉ុន្តែបុរសនេះមិនរាងចាលឡើយ ហើយបានប្រព្រឹត្តអំពើអាក្រក់មកលើក្មួយស្រីដដែល និងត្រូវបានម្តាយនាងប្តឹងទាមទារសំណងជំងឺចិត្តចំនួន៣លានរៀលនិងឲ្យផ្តន្ទាទោសតាមច្បាប់ ៕
ចែករំលែកព័តមាននេះ