ខេត្តព្រះសីហនុ ៖ បុរសម្នាក់បានស្លាប់ភ្លាមៗនៅនឹងកន្លែង ក្នុងឧប្បត្តិហេតុគ្រោះថ្នាក់ចរាចរណ៍មួយកាលពីយប់ថ្ងៃទី២១មិថុនា វេលាម៉ោង១១ និង២០នាទី នៅខាងកើតស្ពានអូសេតេ ស្ថិតក្នុងក្រុមទី១១ ភូមិ៣ សង្កាត់លេខ២ ក្រុងព្រះសីហនុ ។ មន្ត្រីប៉ូលិសចរាចរជើងគោកខេត្តនិយាយថា បុរសដែលស្លាប់នេះឈ្មោះសុខ សុផល អាយុ៥៣ឆ្នាំ មុខរបររត់ម៉ូតូឌុប បច្ចុប្បន្នស្នាក់នៅផ្ទះជួលក្នុងសង្កាត់លេខ៤ ក្រុងព្រះសីហនុ ជិះម៉ូតូម្នាក់ឯងម៉ាកហុងដាC125 ពណ៌ខ្មៅ ស៊េរីឆ្នាំ២០០៤ ពាក់ស្លាកលេខព្រះសីហនុ 1B 3856 បើកបរក្នុងទិសដៅពីលិចទៅកើត។
ពេលបើកម៉ូតូមកដល់ចំណុចខាងលើ ក៏បានបុកជាមួយរថយន្តមួយគ្រឿងម៉ាកប៉ាហ្សេរ៉ូ ពណ៌ស្លែ ពាក់ស្លាកលេខភ្នំពេញ 2H 5207 ដែលធ្វើដំណើរបញ្ច្រាសទិសគ្នា បើកបរដោយឈ្មោះ SLOOF DIRK ភេទប្រុស អាយុ៧២ឆ្នាំ ជនជាតិហូឡង់ កាន់លិខិតឆ្លងដែនលេខ MN775 បច្ចុប្បន្នស្នាក់នៅក្រុម៥ ភូមិ២ សង្កាត់លេខ៣ ក្រុងព្រះសីហនុ ។
យោងតាមសាក្សីដែលឃើញហេតុការណ៍ផ្ទាល់ភ្នែកនិយាយថា ម៉ូតូមួយគ្រឿងនេះដែលជិះតែម្នាក់ឯងបើកបរក្នុងល្បឿនយ៉ាងលឿន និងបានបុកជាមួយរថយន្តដែលបើកបញ្ច្រាសទិសគ្នាចំពីមុខទំហឹង បណ្តាលឱ្យម៉ូតូរួញចូលគ្នា ហើយអ្នកបើកស្លាប់ភ្លាមៗដោយមានរបួសបាក់ជើង និងធ្លាយពោះ ។ ប្រភពដដែលបានបន្តថា ក្រោយកើតហេតុគេឃើញអ្នកបើកបររថយន្តដែលជាជនបរទេសចុះមកឈរមើលសព ហើយក៏ត្រូវអ្នកជិតខាងឃាត់ខ្លួនប្រគល់ឱ្យសមត្ថកិច្ចប៉ូលិស និងបានបញ្ជូនខ្លួនទាំងម្ចាស់ទាំងរថយន្តទៅកាន់ការិយាល័យចរាចរណ៍ជើងគោកភ្លាមៗដែរ ។ រីឯសពជនរងគ្រោះត្រូវបានប៉ូលិសចរាចរខេត្តដឹកយកទៅរក្សាទុកនៅវត្តក្រោមរង់ចាំសាច់ញាតិមកទទួលយកទៅធ្វើបុណ្យតាមប្រពៃណី ៕
ចែករំលែកព័តមាននេះ