រាជធានីភ្នំពេញ ៖ សមត្ថកិច្ចការិយាល័យគ្រប់គ្រង និងអនុវត្តដីកានៃនាយកដ្ឋាននគរបាលព្រហ្មទណ្ឌក្រសួងមហាផ្ទៃបានចាប់ខ្លួន យុវជន២នាក់កាលពីថ្ងៃទី២០ មិថុនា ក្រោយពីពួកគេបានធ្វើសកម្មភាពចូលលួចសម្ភារក្នុងផ្ទះប្រជាពលរដ្ឋពេលយប់។ យុវជនទាំង២នាក់នេះ ម្នាក់ឈ្មោះទុយនាង អាយុ២៣ឆ្នាំ ស្នាក់នៅផ្ទះជួលតាមផ្លូវវេងស្រេងសង្កាត់ចោមចៅ ខណ្ឌដង្កោ និងម្នាក់ទៀតឈ្មោះខន មករា អាយុ១៥ឆ្នាំ ទីលំនៅភូមិទ្រា សង្កាត់ស្ទឹងមានជ័យ ខណ្ឌមានជ័យ ។
ទាក់ទិននឹងការឃាត់ខ្លួនយុវជនទាំង២នាក់ខាងលើនេះត្រូវសមត្ថកិច្ចនគរបាលការិយាល័យគ្រប់គ្រង និងអនុវត្តដីកាឱ្យដឹងថា នៅវេលាម៉ោង៣ និង១៥នាទីរំលងអធ្រាត្រឈានចូលថ្ងៃទី២០ មិថុនា មានករណីចោរចូលលួចទ្រព្យសម្បត្តិនៅផ្ទះលេខ២៨៣B ផ្លូវលេខ៦៣ សង្កាត់ស្ទឹងមានជ័យ ដែលមានម្ចាស់ឈ្មោះសុំ ច័ន្ទតារា ភេទប្រុស អាយុ២៥ឆ្នាំ ជាមន្ត្រីរាជការ។ បន្ទាប់ពីពួកគេធ្វើសកម្មភាពចូលលួចរបស់របរក្នុងផ្ទះនោះហើយនៅវេលាម៉ោងប្រមាណ៧ និង៣០នាទីព្រឹក ថ្ងៃទី២០ មិថុនា ខណៈពួកគេឈររេរានៅម្តុំក្បែរផ្សារសូនី ក៏ត្រូវសមត្ថកិច្ចសង្ស័យ ហើយឃាត់ខ្លួននាំទៅសាកសួរក៏ធ្លាយរឿងចូលលួចទ្រព្យសម្បត្តិនៅផ្ទះខាងលើនេះ។
មន្ត្រីសមត្ថកិច្ចឱ្យដឹងទៀតថា តាមចម្លើយពួកគេ គឺតាំងពីឆ្នាំ២០០៩មកបានប្រកបមុខរបរដើររើសអេតចាយ ក្រោយមកក៏ដើរចូលជាមួយក្រុមគាស់ផ្ទះ និងធ្លាប់ចូលរួមធ្វើសកម្មភាពផងដែរ។ ប៉ុន្តែក្រុមគាស់ផ្ទះប៉ុន្មាននាក់នោះជាប់គុកអស់ទៅ ពួកគេក៏ប្តូរមកលួចក្នុងផ្ទះពេលយប់វិញ និងលួចមិនរើសមុខឱ្យតែម្ចាស់ប្រហែស។ ដោយឡែកក្រោយពេលឃាត់ខ្លួននេះ សមត្ថកិច្ចដកហូតបានមកវិញមានឡេបថប២គ្រឿង ទូរស័ព្ទដៃ៤គ្រឿង ដែលសម្ភារទាំងអស់នេះត្រូវប្រគល់ឱ្យម្ចាស់វិញ ចំណែកជនសង្ស័យរៀបចំកសាងសំណុំរឿងបញ្ជូនទៅសាលាដំបូងតាមនីតិវិធីច្បាប់ ៕
ចែករំលែកព័តមាននេះ