ខេត្តបន្ទាយមានជ័យ ៖ បុរស-នារីពីរនាក់បានរងរបួសយ៉ាងធ្ងន់ធ្ងរដោយគ្រោះថ្នាក់ចរាចរណ៍ក្នុងយប់តែមួយកន្លែងផ្សេងគ្នា គឺម្នាក់នៅលើផ្លូវជាតិលេខ៦ ក្នុងភូមិសាស្ត្រស្រុកព្រះនេត្រព្រះ ម្នាក់ទៀតនៅផ្លូវជាតិលេខ៥ក្នុងភូមិសាស្ត្រស្រុកមង្គលបុរី ។
តាមព័ត៌មានលោកវរសេនីយ៍ត្រីផុន សាលីម អធិការនគរបាលស្រុកមង្គលបុរី បានឱ្យដឹងថា នៅវេលាម៉ោង៨យប់ថ្ងៃទី១៧ មិថុនា ឆ្នាំ២០១១ នៅលើផ្លូវជាតិលេខ៥ ចំណុចមុខហាងលក់បុកសណ្តែក ស្ថិតក្នុងឫស្សីក្រោក ឃុំឫស្សីក្រោក ស្រុកមង្គលបុរី មានគ្រោះថ្នាក់ចរាចរណ៍ដោយរថយន្តបុកអ្នកដើរឆ្លងថ្នល់រួចបើករត់គេចខ្លួនបាត់ស្រមោល ។ ជនរងគ្រោះឈ្មោះរ៉ែ ណាត ភេទស្រី អាយុ១៨ឆ្នាំ នៅភូមិអូរប្រាសាទឃុំអូរប្រាសាទ ស្រុកមង្គលបុរី ។
លោកផុន សាលីម បានបន្តថា តាមការសាកសួរនៅកន្លែងកើតហេតុ នារីរងគ្រោះបានដើរចេញឆ្លងថ្នល់ពីកន្លែងលក់បុកសណ្តែក ពីកើតទៅលិច ស្របពេលនោះមានរថយន្តម៉ាកកាមរី បាឡែន បើកពីត្បូងទៅជើងយ៉ាងលឿនបុកជនរងគ្រោះជាប់នឹងកាបូឡានពីកន្លែងកើតហេតុដល់រង្វង់មូលយាយជីប្រមាណជា៣០០ម៉ែត្រទើបជនរងគ្រោះធ្លាក់ ហើយក៏យកទៅព្យាបាលសង្គ្រោះបន្ទាន់នៅមន្ទីរពេទ្យអេមេចេនស៊ីខេត្តបាត់ដំបង ។
ដោយឡែកឯស្រុកព្រះនេត្រព្រះឯណោះវិញ នៅយប់ថ្ងៃទី១៧ មិថុនា លើផ្លូវជាតិលេខ៦ ក៏មានគ្រោះថ្នាក់ចរាចរណ៍មួយទៀតបានកើតឡើងផងដែរ ។ អ្នកជិះម៉ូតូងងឹតមុខក៏ដួលបោកទៅលើថ្នល់បណ្តាលឱ្យរថយន្តបើកពីក្រោយកិនបាក់ជើងហើយរក៏បើករថយន្តរត់គេចខ្លួនបាត់ដោយសុវត្ថិភាព ។
លោកវរសេនីយ៍ត្រីកែវ ប៊ុនយឿន អធិការនគរបាលស្រុកព្រះនេត្រព្រះបានឱ្យដឹងថា បុរសរងគ្រោះបានជិះម៉ូតូពីកើតទៅលិចដល់ចំណុចចម្ងាយ១.០០០ម៉ែត្រពីភូមិគោក លុន ឃុំជប់វ៉ារី បានដួលម៉ូតូបណ្តាលឱ្យរថយន្តមកពីក្រោយជាន់បាក់ជើងខាងស្តាំ រួចហើយរថយន្តនោះបានបើកគេចខ្លួនបាត់ ជនរងគ្រោះសន្លប់បាត់ស្មារតី ក្រោយពីទទួលបានព័ត៌មានកម្លាំងជំនាញបានចុះទៅដល់កន្លែងកើតហេតុ ។
លោកកែវ ប៊ុនយឿន បានបញ្ជាក់ថា ក្រោយពីជនរងគ្រោះដឹងខ្លួនបានបំភ្លឺប្រាប់សមត្ថកិច្ចថា គាត់ឈ្មោះសន សុខរ៉ា អាយុ៤៣ឆ្នាំ នៅភូមិអណ្តូងចេញ ឃុំអូរចា ខេត្តបាត់ដំបង ជាមន្ត្រីអង្គភាព CMAC គាត់មកពីធ្វើបុណ្យជីដូននៅខេត្តកំពង់ធំ ។ ពេលជិះម៉ូតូមកដល់ចំណុចកើតហេតុ គាត់ក៏ងងឹតមុខបណ្តាលឱ្យដួលម៉ូតូស្របពេលនោះមានរថយន្តមួយគ្រឿងមិនស្គាល់ភិនភាគច្បាស់បានបើកកិនជើងស្តាំរបស់គាត់បណ្តាលឱ្យបាក់និងសន្លប់បាត់ស្មារតី។ លោកអធិការបានបញ្ជាក់ថា បុរសរងគ្រោះត្រូវបានបញ្ជូនទៅព្យាបាលនៅមន្ទីរពេទ្យអេមេចេនស៊ីខេត្តបាត់ដំបងផងដែរ ៕
ចែករំលែកព័តមាននេះ