ខេត្តព្រះសីហនុ ៖ យុវជនម្នាក់ បានត្រូវរថយន្តសង្គ្រោះនៃគ្លីនិកឯកជនមួយដឹកមកកាន់មន្ទីរពេទ្យបង្អែកចំការចេក បន្ទាប់ពីជួបឧប្បត្តិហេតុគ្រោះថ្នាក់ចរាចរណ៍មួយកាលពីវេលាម៉ោង១១និង១៥នាទីយប់ ថ្ងៃទី១៨ មិថុនា តាមបណ្តោយវិថីឯករាជ្យ ចំណុចភ្លើងស្តុបអតីតភោជនីយដ្ឋានសូរិយាតូច ស្ថិតនៅក្នុងភូមិ៤ សង្កាត់លេខ៤ ក្រុងព្រះសីហនុ ។
មន្ត្រីប៉ូលិសចរាចរនិយាយថា ឧប្បត្តិហេតុនេះបង្កឡើងដោយរថយន្តមួយគ្រឿងម៉ាកនីស្សាន់២បាំង ពណ៌ស ពាក់ស្លាកលេខកំពត 2A-0223 បើកបរពីត្បូងទៅជើង បានបុកជាមួយម៉ូតូមួយគ្រឿងម៉ាកហុងដា ធុន C125 ស៊េរីឆ្នាំ២០១១ ពណ៌ខ្មៅ ពាក់ស្លាកលេខព្រះសីហនុ 1C-5118 បើកបរដោយឈ្មោះសុខ ភារុណ ហៅប្រជ្រុញ អាយុ២៤ឆ្នាំ មានទីលំនៅភូមិ៥ សង្កាត់លេខ៤ ក្រុងព្រះសីហនុ ដែលជិះបញ្ច្រាសទិសគ្នាពេញទំហឹង ។ ក្នុងហេតុការណ៍នេះ បណ្តាលឱ្យអ្នកជិះម៉ូតូរងរបួសធ្ងន់ និងបានបញ្ជូនបន្តទៅសង្គ្រោះនៅមន្ទីរពេទ្យកាល់ម៉ែត ឯរាជធានីភ្នំពេញទៀត ។
ប្រភពដដែលបានបន្តទៀតថា រថយន្តនីស្សាន់នេះត្រូវបានសមត្ថកិច្ចរកឃើញនៅក្នុងកូនប្រឡាយមួយស្ថិតក្នុងសង្កាត់លេខ៣ ក្រុងព្រះសីហនុ មានចម្ងាយប្រមាណ៥គីឡូម៉ែត្រ ពីកន្លែងកើតហេតុ បន្ទាប់ពីរថយន្តមានបំណងរត់គេច ។ យោងតាមសាក្សីនៅក្បែរកន្លែងកើតហេតុបានឱ្យដឹងថា រថយន្តមួយគ្រឿងនេះបើកបរក្នុងទិសដៅពីត្បូងទៅជើង លុះមកដល់ចំណុចខាងលើក៏បានបត់ឆ្វេង ហើយប៉ះជាមួយម៉ូតូមួយគ្រឿងដែលជិះម្នាក់ឯង និងបើកបរបញ្ច្រាសទិសគ្នាពេញទំហឹង បណ្តាលឱ្យយុវជនជាអ្នកបើកម៉ូតូរងរបួសសន្លប់ស្តូកស្តឹងនៅចិញ្ចើមផ្លូវ រីឯរថយន្តក៏បើកគេចខ្លួន ។
ក្រោយកើតហេតុទាំងរថយន្ត និងម៉ូតូត្រូវបានប៉ូលិសចរាចរខេត្ត នាំយកមករក្សាទុកនៅការិយាល័យចរាចរណ៍ជើងគោក រង់ចាំការដោះស្រាយនៅពេលក្រោយ ៕
ចែករំលែកព័តមាននេះ