រាជធានីភ្នំពេញ ៖ បុរសអ្នកអីវាន់អនឡាញម្នាក់ បានរងរបួសធ្ងន់ធ្ងរ ហើយត្រូវបានក្រុមសង្គ្រោះអង្គភាព ៧១១ ដឹកយកទៅកាន់មន្ទីរពេទ្យ ដើម្បីសង្គ្រោះបន្ទាន់ភ្លាមៗ ក្រោយពីបុរសនោះជិះម៉ូតូ ១គ្រឿង…
រាជធានីភ្នំពេញ ៖ បុរសអ្នកអីវាន់អនឡាញម្នាក់ បានរងរបួសធ្ងន់ធ្ងរ ហើយត្រូវបានក្រុមសង្គ្រោះអង្គភាព ៧១១ ដឹកយកទៅកាន់មន្ទីរពេទ្យ ដើម្បីសង្គ្រោះបន្ទាន់ភ្លាមៗ ក្រោយពីបុរសនោះជិះម៉ូតូ ១គ្រឿង ក្នុងល្បឿនលឿន ។ បន្ទាប់មកបានវ៉ាឆ្វេងម៉ូតូម៉ាកហុងដាស្កូបពី ១គ្រឿងទៀត ដែលជិះដោយស្ត្រីម្នាក់ កំពុងធ្វើដំណើរក្នុងទិសដៅស្របគ្នា ប៉ុន្តែវ៉ាខ្វះការប្រុងប្រយ័ត្ន ក៏បានទាក់ដៃចង្កូតគ្នា ហើយក៏រេចង្កូតជ្រុលទៅបុកដងឆ័ត្រ នៅមុខផ្ទះប្រជាពលរដ្ឋមួយកន្លែង បណ្ដាលឲ្យដួលបោកផ្ទប់ថ្នល់ពេញទំហឹង ។
ឧប្បត្តិហេតុខាងលើនេះបានកើតឡើង កាលពីវេលាម៉ោង២រសៀល ថ្ងៃទី២៨ ខែកញ្ញា ឆ្នាំ២០២៤ នៅតាមផ្លូវបេតុងស្ថិតនៅក្នុងភូមិត្រពាំងក្រសាំង សង្កាត់ត្រពាំងក្រសាំង ខណ្ឌពោធិ៍សែនជ័យ រាជធានីភ្នំពេញ ។
បុរសខាងលើនោះ មិនត្រូវបានស្គាល់អត្តសញ្ញាណនោះទេ គ្រាន់តែដឹងថា ជាអ្នកដឹកអីវាន់អនឡាញ និងជិះម៉ូតូ១គ្រឿង ម៉ាកហុងដាឌ្រីមសេ១២៥ ពណ៍ខ្មៅ ស៊េរីឆ្នាំ២០២៤ ពាក់ស្លាកលេខភ្នំពេញ1KV-8036 ។ ដោយឡែកស្ត្រី ដែលជាភាគីម្ខាងទៀត ក៏មិនត្រូវបានស្គាល់អត្តសញ្ញាណដូចគ្នា គាត់ជិះម៉ូតូម៉ាកហុងដាស្កូបពី ១គ្រឿង ពណ៍ផ្កាឈូកលាយស ពាក់ស្លាកលេខភ្នំពេញ 1BP-9747 ។
អ្នកភូមិខាងលើបានប្រាប់ឲ្យដឹងថា នៅមុនពេលកើតហេតុ គាត់បានឃើញម៉ូតូម៉ាកហុងដាស្កូបពី ធ្វើដំណើរក្នុងទិសដៅពីត្បូងទៅជើង លុះពេលទៅជិតដល់ត្រង់ចំណុចកើតហេតុ ស្រាប់តែឃើញបុរសអ្នកដឹកអីវាន់អនឡាញខាងលើនោះ ជិះម៉ូតូក្នុងទិសដៅស្របគ្នាទៅដល់ដែរ ។ បន្ទាប់មក បុរសនោះបានវ៉ាជែងម៉ូតូស្កូបពីស្ត្រីរូបនោះ ប៉ុន្តែដោយវ៉ាខ្វះការប្រុងប្រយ័ត្ន ក៏បានទាក់ដៃចង្កូតគ្នា បណ្ដាលឲ្យម៉ូតូហុងដាឌ្រីរេចង្កូតជ្រុលទៅបុកដងឆត្រនៅមុខផ្ទះប្រជាពលរដ្ឋមួយកន្លែង ដួលបោកផ្ទប់ថ្នល់រងរបួសធ្ងន់ខ្លួនឯងតែម្ដង ។
ប្រភពដដែល បានប្រាប់ទៀតថា ចំណែកស្ត្រីអ្នកជិះម៉ូតូហុងដាស្កូបពីរងរបួសស្រាល ហើយក្រោយពេលកើតហេតុ ដោយខ្ជិលមានរឿងវែងឆ្ងាយ ស្ត្រីរូបនោះ ក៏បានចេញសំណងទៅអ្នកដឹកអីវាន់អនឡាញនោះ ចំនួន៣០ដុល្លារ បញ្ចប់រឿង ។ បន្ទាប់មក ក្រុមសង្គ្រោះអង្គភាព៧១១ បានចេញទៅដឹកយកបុរសនោះ ទៅកាន់មន្ទីរពេទ្យដើម្បីសង្គ្រោះបន្ទាន់ ចំណែកម៉ូតូបុរសនោះ ត្រូវបាននគរបាល នាំយកទៅរក្សាទុកបណ្ដោះអាសន្ននៅប៉ុស្តិ៍ត្រពាំងក្រសាំង ៕
ចែករំលែកព័តមាននេះ