រាជធានីភ្នំពេញ ៖ រថយន្តមួយគ្រៀងម៉ាកកាមរីឆ្លាម ពណ៌ទឹកមាស ពាក់ស្លាកលេខ ភ្នំពេញ 2Q-8216 បានបើកមកដល់កែងមហាវិថីព្រះនរោត្តម និងវិថីព្រះសុរាម្រឹត ខាងជើងវិមានឯករាជ្យ ស្ថិតក្នុងសង្កាត់ចតុមុខ ខណ្ឌដូនពេញ ស្រាប់តែហ៊ុយផ្សែងទ្រលោម និងមានអណ្តាតភ្លើងបង្កឱ្យមានការភ្ញាក់ផ្អើលកកស្ទះចរាចរណ៍កាលពីវេលាម៉ោង៧និង១៥នាទីយប់ថ្ងៃទី១៨ មិថុនា ២០១១។
សាក្សីដែលឃើញហេតុការណ៍បាននិយាយថា មុនពេលកើតហេតុមានរថយន្តមួយគ្រឿងម៉ាកកាមរីឆ្លាម ពណ៌ទឹកមាស បើកមកដល់កែងមហាវិថីព្រះនរោត្តម និងវិថីព្រះសុរាម្រឹតខាងជើងវិមានឯករាជ្យ ស្ថិតក្នុងសង្កាត់ចតុមុខ ខណ្ឌដូនពេញ ស្រាប់តែរថយន្តនោះឆេះហ៊ុយផ្សែងទ្រលោម និងមានអណ្តាតភ្លើងពេលនោះរថយន្តឈប់ ហើយឃើញមានប្រុសស្រី២នាក់ទំនងជាប្តីប្រពន្ធបានបើកទ្វាររថយន្តចេញមកខាងក្រៅទាំងទឹកមុខស្លេកស្លាំង ។ នៅក្នុងហេតុការណ៍នោះបង្កឱ្យមានការភ្ញាក់ផ្អើលជាខ្លាំង និងកកស្ទះចរាចរណ៍ ខណៈពេលប្រជាពលរដ្ឋធ្វើដំណើរឆ្លងកាត់នាំគ្នាឈប់ម៉ូតូមើល ។ នៅពេលរថយន្តឈប់ គេឃើញអង្គរក្សជាច្រើននាក់ដែលឈរយាមភូមិគ្រឹះក្បែរនោះ បានទាញទុយោទឹកជួយបាញ់ទៅលើរថយន្តកាមរីឆ្លាម រង់ចាំរថយន្តពន្លត់អគ្គិភ័យស្នងការដ្ឋាននគរបាលរាជធានីភ្នំពេញ មកអន្តរាគមន៍ ។ បន្តិចក្រោយមក ទើបឃើញរថយន្តពន្លត់អគ្គិភ័យមួយគ្រឿងមកដល់តែមិនបានបាញ់ពន្លត់នោះទេ ព្រោះរថយន្តរលត់ទៅហើយ។
ម្ចាស់រថយន្តដែលជួបសំណាងអាក្រក់ឈ្មោះប៉ិច ចាន់ធី ភេទស្រី អាយុ៤៦ឆ្នាំ ជាមន្ត្រីនគរបាលស្នាក់នៅផ្ទះជួលម្តុំបុរីសុភមង្គល ផ្លូវជាតិលេខ៦A សង្កាត់ជ្រោយចង្វា ខណ្ឌឫស្សីកែវ បានឱ្យសមត្ថកិច្ចដឹងថា គាត់ទើបតែទិញរថយន្តនេះនៅវេលាម៉ោង៤ល្ងាចនាថ្ងៃកើតហេតុ ហើយក៏នាំប្តីជិះសាកមើល លុះមកដល់ចំណុចកែងមហាវិថីព្រះនរោត្តម និងវិថីព្រះសុរាម្រឹត ខាងជើងវិមានឯករាជ្យស្រាប់តែមានឆេះផ្សែងហ៊ុយទ្រលោមតែម្តង ៕
ចែករំលែកព័តមាននេះ