ខេត្តកណ្តាល ៖ បុរសម្នាក់បានលង់ទឹកព្រែកស្លាប់ ហើយត្រូវគេប្រទះឃើញសពកាលពីវេលាម៉ោង១១ព្រឹក ថ្ងៃទី២០ មីនា នៅភូមិព្រែកតាមេម ឃុំព្រែកស្តី ស្រុកកោះធំ។ មូលហេតុនៃការលង់ទឹកនោះគេអះអាងថា មកពីបុរសនោះស្រវឹងស្រា។ អ្នកស្លាប់ឈ្មោះសន ខុម អាយុ៤១ឆ្នាំ រស់នៅភូមិព្រែកតាមេម ជាកសិករ មានកូន៤នាក់។ ប្រពន្ធគាត់បានចង.កសម្លាប់ខ្លួនកាលពីឆ្នាំ២០០៩។ បើតាមការអះអាងរបស់អ្នកភូមិថា ស្ត្រីរូបនោះចង.កធ្វើអត្តឃាតដោយសារតែតូចចិត្តជំពាក់លុយធនាគារឯកជនច្រើនរកសងមិនបាន។ បន្ទាប់ពីប្រពន្ធស្លាប់បាត់ទៅ បុរសជាប្តីខូចចិត្តផឹកស្រាស្រវឹងរាល់ថ្ងៃ។
អ្នកភូមិនិយាយថា នៅថ្ងៃទី១៩ មីនា បុរសឈ្មោះសន ខុម បានផឹកស្រារហូតស្រវឹង ហើយនៅវេលាម៉ោង៦និង៣០នាទីល្ងាច គាត់ជិះកង់ទៅងូតទឹកនៅក្នុងព្រែកហម។ នៅទីនោះគាត់ជួបកូនម្នាក់ក៏ឱ្យយកកង់ជិះទៅផ្ទះមុន។ នៅល្ងាចថ្ងៃដដែល អ្នកភូមិដែលចុះទៅងូតទឹកព្រែកបានប្រទះឃើញស្បែកជើងមួយគូនៅក្បែរមាត់ទឹក តែមិនដឹងថា ជារបស់អ្នកណាទេ។ ចំណែកកូនៗពេលបាត់ឪពុកដើរសួរគេឯង ហើយតាមរយៈស្បែកជើងនោះគេសង្ស័យថា គាត់លង់ទឹកស្លាប់ ប៉ុន្តែដោយពេលយប់គ្មានអ្នកចុះរាវទេ។ លុះស្អែកឡើងវេលាម៉ោង១១ព្រឹក ថ្ងៃទី២០ មីនា ទើបសាកសពបានអណ្តែតឡើង។ ប៉ូលិសបច្ចេកទេសខេត្តទៅពិនិត្យសាកសពសន្និដ្ឋានថា បុរសនោះស្លាប់ដោយសារលង់ទឹក ព្រោះមានទឹកនៅក្នុងពោះ និងគ្មានស្លាកស្នាមអ្វីផ្សេងគួរឱ្យកត់សម្គាល់ទេ៕
ចែករំលែកព័តមាននេះ