ព្រលឹងព្រះវិហារ (បទពាក្យប្រាំបី)


ព្រលឹងព្រះវិហារ
(បទពាក្យប្រាំបី)

-សម័យឪពុកឆ្នាំហុកសិបពីរ ល្បីពេញទីប្រាសាទព្រះវិហារ
បច្ចាមិត្តមានចិត្តធ្វើជាមារ ស្រែកទាមទារឆក់ប្លន់យកទ្រព្យខ្មែរ ។
-ខ្មែរមានជ័យដោយក្តីយុត្តិធម៌ កេរតំណដូនតារក្សាថែ
មិនកាឡៃច្នៃគិតប្រឌិតកែ ថ្ងៃដប់ប្រាំនៃខែមិថុនា ។
-ឆ្លងសង្គ្រាមអោបទុក្ខយូរខែថ្ងៃ ឈរក្នុងព្រៃទោះបីនឿយម្តេចម្តា
នៅញញឹមសង្ឃឹមកូនខេមរា ស្ទួយសិលាឱ្យខ្ពស់ថ្កុំថ្កើងថ្កល់ ។
-រឿងកន្លងខ្មែរចងជាប្រវត្តិ ចិត្តទៀងទាត់ប្រាកដមិនឱ្យខ្វល់
ប្រាង្គប្រាសាទស្អាងស្អាតអស់អំពល់ ជួយឱ្យដល់ស្គាល់ល្បីល្បាញរន្ទឺ ។
-ដល់វេនកូនឆ្នាំពីរពាន់ប្រាំបី មានស្មារតីបីដូចថ្ងៃរះភ្លឺ
ព្រះវិហារគេគ្រប់គ្នាដឹងលឺ ថ្ងៃនោះគឺប្រាំពីរកក្កដា ។
-ក្រុងកេបិចរំលេចនូវរឿងពិត មិនប្រឌិតបន្លំជាតិសាសន៍ណា
ជាសម្បត្តិមនុស្សជាតិពេញលោកា ពិតថ្លៃថ្លាជាទ្រព្យគាប់បណ្តូល ។
-ថ្ងៃដប់ប្រាំក្នុងខែឆ្នាំដដែល កងទ័ពសៀមច្រើនក្រែលទន្ទ្រានចូល
ព្រះវិហារហៅខ្មែរគ្រប់ត្រកូល សូមប្រមូលមកជុំខំការពារ ។
-ខ្មែរក្លាហានតែមិនអាងកម្លាំង ហ៊ានតតាំងតែមិនចង់ច្បាំងគ្នា
ព្រោះខ្មែរខ្ញុំគឺពូជពង្សអ្នកជា តែខ្មែរហ៊ានពុះពារមិនរាទេ ៕
​ ​ និពន្ធដោយលោក អ៊ុន វុធត្រា

Facebook Google Twitter Email

សូម​ subscribe Channel Youtube របស់​កោះ​សន្តិភាព​លោក​​អ្នក​នឹង​ទទូល​បាន​ព័ត៌មាន​ជា​វីដេអូ​ថ្មី​ៗ​បន្ថែម​ទៀត សូម​អគុណ!!!!!

កំណាព្យ

អត្រាប្តូរប្រាក់

អត្រាប្តូរប្រាក់ផ្សេងទៀត

Live

Sponsored News

To Top

ការស្ទង់មតិគេហទំព័រថ្មី




សូម​អរគុណ